8th Pay Commission: 2.0 ફિટમેન્ટ ફેક્ટર લાગુ થાય તો શું સેલરી ડબલ થશે? જાણો ગ્રોસ પગારનું સાચું ગણિત
Summarized by AI; it may make mistakes. Check important info
Summarized by AI; it may make mistakes. Check important info
8th Pay Commission 2 Fitment Factor: 8મા પગાર પંચની ભલામણોની કેન્દ્રીય કર્મચારીઓ આતુરતાપૂર્વક રાહ જોઈ રહ્યા છે. પગાર પંચની ભલામણો શું હશે તે તો આવનારો સમય જ બતાવશે, પરંતુ અત્યારથી જ ચર્ચાઓ શરૂ થઈ ગઈ છે. સૌથી વધુ ચર્ચા ફિટમેન્ટ ફોર્મ્યૂલાને લઈને થઈ રહી છે.
2.0 ફિટમેન્ટ ફેક્ટરની ચર્ચા
જોકે હજુ સુધી 8મા પગાર પંચે ફિટમેન્ટ ફોર્મ્યૂલા નક્કી કરી નથી, પરંતુ 2.0 ફિટમેન્ટ ફેક્ટરને લઈને ચર્ચા જરૂર થઈ રહી છે. જો ભવિષ્યમાં 2.0 ફિટમેન્ટ ફોર્મ્યૂલા લાગુ કરવામાં આવે છે, તો વર્તમાન બેઝિક પે (મૂળ પગાર) ગણિતના હિસાબે બમણો થઈ જશે. જોકે, કેટલાક લોકોને એવું લાગી રહ્યું છે કે, કેન્દ્રીય કર્મચારીઓની ગ્રોસ સેલરી (કુલ પગાર) પણ બમણો થઈ જશે, પરંતુ એવું નથી.
શું છે એનું કારણ?
બેઝિક પે એ સરકારી કર્મચારીના માસિક પગારનો માત્ર એક હિસ્સો હોય છે. ગ્રોસ પે માં મોંઘવારી ભથ્થું (DA), હાઉસ રેન્ટ એલાઉન્સ (HRA) અને ટ્રાન્સપોર્ટ એલાઉન્સ જેવા અન્ય ભથ્થાં પણ સામેલ હોય છે. આથી બેઝિક પે વધવાથી ગ્રોસ સેલરીમાં વધારો ચોક્કસ થશે, પરંતુ તે બમણી થઈ શકે નહીં.
ઉદાહરણ દ્વારા સમજો
ધારો કે લેવલ 6 ના કોઈ કર્મચારીનો વર્તમાન બેઝિક પે ₹35,400 છે. જો 2.0 ફિટમેન્ટ ફેક્ટર લાગુ થાય તો, બેઝિક પે વધીને ₹70,800 થઈ જશે (એટલે કે 100% નો વધારો). પરંતુ, કર્મચારીની વર્તમાન ગ્રોસ સેલરી માત્ર ₹35,400 નથી હોતી. X-કેટેગરીવાળા શહેર માટે 60% DA અને 30% HRA ગણીએ, તો અન્ય એલાઉન્સ પહેલા ગ્રોસ સેલરી લગભગ ₹67,260 થાય છે.
હવે માની લો કે, નવું પે-સ્ટ્રક્ચર લાગુ થવા પર DA ને 0% થી ફરી શરૂ કરવામાં આવે છે, અને HRA ને સુધારિત બેઝિકના 24% માનવામાં આવે છે:
નવો બેઝિક પે: ₹70,800
HRA (24%): ₹16,992
DA: ₹0
અંદાજિત ગ્રોસ સેલરી: ₹87,792
એટલે કે, બેઝિક પે ભલે બમણો થઈ જાય, પરંતુ આ ઉદાહરણમાં ગ્રોસ સેલરીમાં માત્ર 30.5% જેટલો જ વધારો થાય છે.
ઉલ્લેખનીય છે કે, 8મા કેન્દ્રીય પગાર પંચની રચના નવેમ્બર 2025 માં કરવામાં આવી હતી, અને હાલમાં તે કર્મચારીઓ, પેન્શનરો અને અન્ય હિતધારકો પાસેથી સલાહ-સૂચનો લઈ રહ્યું છે. ફિટમેન્ટ ફેક્ટરને હજુ સુધી આખરી ઓપ આપવામાં આવ્યો નથી.
7મા પગાર પંચમાં શું હતું ફોર્મ્યૂલા?
7મા પગાર પંચે 2.57 નો ફિટમેન્ટ ફેક્ટર વાપર્યો હતો, પરંતુ સરકારની ગણતરીનો અર્થ એ નહોતો કે, કર્મચારીઓની કુલ સેલરીમાં 157% નો વધારો થયો હતો. તે વખતે મોંઘવારી ભથ્થાને બેઝિક પે માં મર્જ કર્યા બાદ સેલરી અને પેન્શનમાં વાસ્તવિક વધારો લગભગ 14.29% રહ્યો હતો.
