અબુ બકરનું અભિમાન .

પાછલા દિવસોમાં શ્રીલંકામાં થયેલા શ્રેણીબદ્ધ વિસ્ફોટો બાદ દુનિયામાં ઇસ્લામિક સ્ટેટના આતંકવાદના એશિયન પ્રકરણ વિશે ધૂમ ચર્ચાઓ ચાલી રહી છે. અમેરિકા અને રશિયાએ સ્વતંત્ર રીતે પોતે જેને મોતને ઘાટ ઉતાર્યો હોવાનો વારાફરતે દાવો કરેલો છે તે ઇસ્લામિક સ્ટેટ ઓફ ઇરાક એન્ડ સિરિયા (ટૂંકમાં આઇએસ)નો વડો અબુ બકર અલ બગદાદી એકાએક જ શ્રીલંકામાં તબાહી મચાવનારા આતંકવાદીઓને શાબાશી આપતો ફરી દેખાયો છે એથી મહાસત્તાઓમાં નવેસરથી સનસનાટી મચી ગઈ છે. અંદાજે પાંચ વરસ પછી ઇસ્લામિક સ્ટેટ દ્વારા પ્રસારિત કરાયેલા વીડિયોમાં આ અબુ બકરે દુનિયાના તમામ નિર્દોષ મુસ્લિમોને સંકટમાં મૂકવા માટેના જ વિધાનો તરતા મૂક્યા હોય એમ લાગે છે. 

જો કે મુસ્લિમોના બહુસંખ્ય સમાજે આઇએસનો શરૂઆતથી જ ઘોર વિરોધ કરેલો છે. બહુસંખ્ય એટલે ચપટીક આતંકવાદીઓ સિવાય તમામ મુસ્લિમ પંથ અને પેટા પંથ. શરૂઆતમાં અલ કાયદાએ આઇએસને ટેકો આપ્યો હતો પરંતુ અબુ બકરની તમામ મુસ્લિમોને બદનામ અને બરબાદ કરવાની પોલિસી જોઈને અલ કાયદાએ એની સાથે છેડો ફાડી નાખ્યો.

અબુ બકરનો શ્રીલંકાના વિસ્ફોટો વિશે પોતાના પર જવાબદારી લેતો વીડિયો વાયરલ થયો કે તુરત જ અમેરિકન મીડિયાના પ્રથમ પ્રત્યાઘાત એ રહ્યા કે આ તો અબુ બકરના જૂના વીડિયોમાં એડિટિંગ કરીને શ્રીલંકાની વિગતો ઉમેરવામાં આવી છે. હૂબહૂ અબુ જેવો જ અવાજ શોધીને આ કરતબ થયેલા છે. પરંતુ પછીથી એ વીડિયો અસલ હોવાની વાત સ્વીકારાવા લાગી છે. પ્રથમ તો અબુ બકરના નવા ભાષણે એના મોતનો દાવો કરનારા રશિયા અને અમેરિકાનું નાક કાપ્યું છે.

અબુએ એ વાત સ્વીકારી કે સિરિયાનો જંગ પૂરો થઈ ગયો છે. તો પણ આજે સિરિયા અને બગદાદના બહુ નાના વિસ્તારો પર એનો કબજો છે. વાર્ષિક બે અબજ ડોલરનું બજેટ ધરાવતા દુનિયાના સૌથી અમીર આતંકવાદી સંગઠન આઇએસના વડાનું સ્વાસ્થ્ય ખરાબ છે અને તે મરવાને વાંકે જીવે છે એ પ્રચાર પણ ખૂલ્લો પડી ગયો છે, કારણકે અબુ બકર વીડિયોમાં તંદુરસ્ત દેખાય છે.

આઇએસની હયાતી પુરવાર કરવા માટે શ્રીલંકાની પસંદગી એ અબુ બકરની જ પ્રકાણ્ડ ભૌગોલિક બુદ્ધિમત્તા છે, એમાં કોઈ શંકા નથી. ઓસામા બિન લાદેન હયાત હતો ત્યારે દુનિયાના કોઈ પણ ભૂગોળવેત્તા કરતા અધિક જ્ઞાાની હતો. અબુ બકર પણ પહેલેથી જ ભૂગોળનો નિષ્ણાત જ છે એમ નથી, બલ્કે એણે આઇએસનું સર્જન જ પોતાની ભૌગોલિક વિચારધારામાંથી કરેલું છે.

શ્રીલંકામાં વસતા મુસ્લિમો એ ટાપુ પર શાંત સામાજિક જીવન પસાર કરતા હતા, એ શાંત જળને અબુ બકરે એવા ડહોળ્યા છે કે છાને પગલે શ્રીલંકન સરકાર ખુદ હવે ત્યાં વસતા મુસ્લિમોની દુશ્મન બની ગઈ છે.

શ્રીલંકામાં બુરખા પર પ્રતિબંધ તો એ સરકારના આક્રમક પગલાની માત્ર શરૂઆત છે. ભારતની નેશનલ ઇન્વેસ્ટીગેશન એજન્સી (એનઆઇએ)એ વિશેષ ટુકડીઓ બનાવીને કેરળ અને તમિલનાડુમાં આઇએસના જાતે બની બેઠેલા ફોલ્ડરોને શોધવા નવી ઝુંબેશ શરૂ કરી છે.

શ્રીલંકામાં માર્યા ગયેલા નિર્દોષ નાગરિકોમાં યુરોપ અને અમેરિકાના પ્રવાસીઓ પણ હતા એનો ઉલ્લેખ કરીને અબુ બકરે પશ્ચિમી દેશો તરફની પોતાની ખિન્નતા અને વેર એવા ને એવા જ છે એની દુનિયાને ખાતરી કરાવી છે. સમગ્ર વિશ્વને મુસ્લિમોની વિરુદ્ધ ઉશ્કેરવા માટે જે કંઈ ઝેર ઠાલવી શકાય એ બધું જ અબુ બકરે પોતાના અભિમાની ભાષણમાં સમાવી લીધું છે.

એનાથી એક વાત સ્પષ્ટ થાય છે કે આઇએસ નામક આ આતંકી સંગઠન તમામ પંથના મુસ્લિમો માટે ખતરનાક દુશ્મનની ભૂમિકા અદા કરી રહ્યું છે. અબુ બકરે સ્પષ્ટ કહ્યું છે કે સિરિયા પરની અમેરિકાની એરસ્ટ્રાઇકનો બદલો લેવા અમે શ્રીલંકા પર હૂમલો કર્યો છે. સિરિયન પરાજયનું વેર લેવા માટેનું આ અમારું આક્રમણ છે.

આ વીડિયોની અગાઉ ઇ.સ. ૨૦૧૪માં જાહેર થયેલા વીડિયોમાં અબુ બકરે ઈરાકી શહેર મોસુલમાં પોતાને ખલીફા ઘોષિત કરતો બતાવવામાં આવ્યો હતો પરંતુ ત્યાર પછી આઇએસના એક પછી એક ગઢ ધ્વસ્ત થતા ગયા અને છેવટે એ ભૂગર્ભમાં ચાલ્યો ગયો અથવા મૃત્યુ પામ્યો હોવાની વાત વહેતી થઈ હતી આ વખતના નવા વીડિયો દ્વારા એનો એક હેતુ પોતાના સમર્થકોને એ મેસેજ આપવાનો પણ છે કે સહુ માને છે એમ આઇએસ હજુ પૂરેપૂરું વિનાશ પામ્યું નથી.

અબુ બકરે જે અભિમાની છટાથી વાત કરી છે એ બતાવે છે કે દુનિયાએ હજુ પણ આઇએસના નવા હુમલાઓનો સામનો કરવા માટે તૈયાર રહેવું પડશે. અબુ બકરની આતંકવાદી વિચારધારાની જાળ આખી દુનિયામાં ફેલાયેલી છે. પોતાની વાતોથી અબુ બકર દુનિયાભરના મુસ્લિમો માટે કેટલી બધી તકલીફો ઊભી કરે છે એની અબુને કંઈ પડી નથી એમ એનો નવો વીડિયો કહે છે.

દુનિયા માટે તો આ અબુ બકર સૌથી મોટો ખતરો છે જ પરંતુ એકેએક મુસ્લિમ માટે પણ આના જેવો ભયાનક ખતરો બીજો કોઈ નથી. માણસાઈમાં વિશ્વાસ ધરાવતા કોઈ પણ લોકો હોય, ચાહે તે ઇસ્લામની અંદર હોય કે ઇસ્લામની બહાર હોય, તે તમામે એકસંપ થઈને અબુ બકર અને તેના જેવા અન્ય આતંકીઓ સામે લડવું પડશે.