લીંબડી-અમદાવાદ હાઈવે પર દ્વારકા જતા પદયાત્રિકોના સંઘને ટ્રકે અડફેટે લીધો, 1નુ મોત, 7ની હાલત ગંભીર

Surendranagar accident case : ભગવાન દ્વારકાધીશના દર્શનની પરમ આસ્થા અને ભક્તિભાવ સાથે પગપાળા યાત્રા કરી રહેલા શ્રદ્ધાળુઓ માટે સુરેન્દ્રનગર જિલ્લાનો લીંબડી-અમદાવાદ હાઈવે લોહિયાળ સાબિત થયો છે. કાનપરા ગામ નજીક 65થી વધુ પદયાત્રીઓના સંઘને એક પૂરઝડપે અને બેફામ રીતે આવી રહેલા ટ્રકે અડફેટે લીધા હતા. આ દુર્ઘટનામાં એક શ્રદ્ધાળુનું ઘટનાસ્થળે જ મોત નીપજ્યું છે, જ્યારે અન્ય 7 પદયાત્રીઓ ગંભીર રીતે ઈજાગ્રસ્ત થયા છે. અકસ્માત સર્જ્યા બાદ ટ્રક ચાલક પોતાનું વાહન લઈને ઘટનાસ્થળેથી ફરાર થઈ ગયો હતો.

ભક્તિમય વાતાવરણમાં અચાનક ચીસાચીસ અને અફરાતફરી મચી

મળતી માહિતી પ્રમાણે દ્વારકાધીશના દર્શન કરવા માટે 65થી વધુ શ્રદ્ધાળુઓનો એક સંઘ પગપાળા દ્વારકા તરફ આગળ વધી રહ્યો હતો. તમામ પદયાત્રીઓ શિસ્તબદ્ધ રીતે એકસાથે ચાલીને પોતાની ધાર્મિક યાત્રા પૂર્ણ કરવા આગળ વધી રહ્યા હતા. આ દરમિયાન, જ્યારે આ સંઘ સુરેન્દ્રનગર જિલ્લાના લીંબડી-અમદાવાદ હાઈવે પર આવેલા કાનપરા નજીકથી પસાર થઈ રહ્યો હતો, ત્યારે પાછળથી યમદૂત બનીને પૂરઝડપે ધસી આવેલા એક ટ્રક ચાલકે સ્ટીયરિંગ પરથી કાબૂ ગુમાવ્યો હતો અને પદયાત્રીઓને અડફેટે લીધા હતા. અચાનક બનેલી આ દુર્ઘટનાને પગલે અનેક પદયાત્રીઓ ફંગોળાઈને રસ્તા પર પટકાયા હતા. થોડી ક્ષણો પહેલાં જ્યાં ભજન અને જયઘોષનું ભક્તિમય વાતાવરણ હતું, ત્યાં અચાનક ચીસાચીસ, કણસવાનો અવાજ અને અફરાતફરીનો માહોલ સર્જાયો હતો.

સ્થાનિકોની મદદથી ઈજાગ્રસ્તોને તાત્કાલિક હોસ્પિટલ ખસેડાયા

આ ભયાનક અકસ્માતમાં એક પદયાત્રીને માથા તેમજ શરીરના ભાગે ગંભીર ઈજાઓ પહોંચતા તેમનું મોત નીપજ્યું હતું. જ્યારે અન્ય 7 જેટલા પદયાત્રીઓ ઈજાગ્રસ્ત થયા હતા. અકસ્માતનો અવાજ સાંભળીને આસપાસના વિસ્તારના લોકો અને અન્ય વાહનચાલકો તાત્કાલિક મદદ માટે દોડી આવ્યા હતા. સ્થાનિક લોકોએ માનવતા દાખવીને બચાવ કામગીરી શરૂ કરી હતી અને તમામ 7 ઈજાગ્રસ્તોને તાત્કાલિક સારવાર અર્થે નજીકની હોસ્પિટલમાં ખસેડવાની વ્યવસ્થા કરી હતી. હાલ તમામ ઈજાગ્રસ્ત શ્રદ્ધાળુઓ હોસ્પિટલમાં તબીબોની દેખરેખ હેઠળ સારવાર લઈ રહ્યા છે. બીજી તરફ, યાત્રામાં સાથે નીકળેલા સાથી પદયાત્રીનું અકાળે અવસાન થતાં સમગ્ર સંઘમાં ઘેરા શોકની લાગણી છવાઈ ગઈ છે અને અન્ય પદયાત્રીઓમાં પણ ભારે ચિંતાનો માહોલ જોવા મળી રહ્યો છે.

હિટ એન્ડ રનના બનાવથી રોષ, હાઈવે પર પદયાત્રીઓની સુરક્ષા સામે ગંભીર સવાલ

અકસ્માત સર્જ્યા બાદ માનવતા નેવે મૂકીને ટ્રક ચાલક પોતાનું વાહન હંકારીને સ્થળ પરથી ફરાર થઈ ગયો હતો. ઘટનાની જાણ થતાં જ પોલીસ કાફલો પણ ઘટનાસ્થળે દોડી ગયો હતો અને મૃતદેહને પોસ્ટમોર્ટમ અર્થે ખસેડી, ફરાર ટ્રક ચાલકને ઝડપી પાડવા માટે કાર્યવાહી હાથ ધરી છે. આ ઘટનાએ ફરી એકવાર રાજ્યના ધોરીમાર્ગો પર બેફામ દોડતા ભારે વાહનોના આતંક અને ધાર્મિક યાત્રાએ નીકળતા પદયાત્રીઓની સુરક્ષા સામે ગંભીર સવાલો ઊભા કર્યા છે.