કોણ છે સારાંશ જૈન? જેણે 33 વર્ષની ઉંમરે ભારતીય ટેસ્ટ ટીમમાં ડેબ્યૂ કરી ઈતિહાસ રચ્યો
Summarized by AI; it may make mistakes. Check important info
Summarized by AI; it may make mistakes. Check important info
Saransh Jain India Debut : શ્રીલંકા સામે રમાઈ રહેલી બીજી ટેસ્ટ મેચમાં ભારત તરફથી 33 વર્ષીય ઓલરાઉન્ડર સારાંશ જૈને આંતરરાષ્ટ્રીય ક્રિકેટમાં ડેબ્યૂ કર્યું છે. ટોસ પહેલાં અનુભવી ઓલરાઉન્ડર રવિન્દ્ર જાડેજાએ તેમને ભારતની ટેસ્ટ કેપ એનાયત કરી હતી. 33 વર્ષ કે તેથી વધુ ઉંમરે ભારતીય ટેસ્ટ ટીમમાં ડેબ્યૂ કરનાર સારાંશ દેશના બીજા ખેલાડી બન્યા છે. આ અગાઉ વર્ષ 1998માં રોબિન સિંહે 33 વર્ષની ઉંમરે ભારત માટે ટેસ્ટ ડેબ્યૂ કર્યું હતું. ઇજાગ્રસ્ત વોશિંગ્ટન સુંદરના સ્થાને સારાંશને ટીમમાં સ્થાન આપવામાં આવ્યું છે.
બેટિંગ અને બોલિંગમાં શાનદાર સંતુલન
સારાંશ જૈન જમણેરી ઓફ-સ્પિનર છે અને ડાબોડી બેટર છે. નીચલા ક્રમમાં ટીમ માટે બેટિંગ અને બોલિંગ બંનેમાં શાનદાર સંતુલન જાળવવાની ક્ષમતા ધરાવે છે. મધ્યપ્રદેશ તરફથી રમતા સારાંશે 54 ફર્સ્ટ ક્લાસ મેચોમાં 31.75ની સરેરાશથી 2223 રન બનાવ્યા છે અને બોલિંગમાં 27.30ની સરેરાશથી 188 વિકેટો ઝડપી છે. સારાંશ જૈન દિગ્ગજ ખેલાડી રવિચંદ્રન અશ્વિનને પોતાના સૌથી મોટા રોલ મોડેલ માને છે અને તેમની પાસેથી પ્રેરણા મેળવે છે.
સ્થાનિક ક્રિકેટમાં શાનદાર પ્રદર્શન અને સફળ સફર
ફર્સ્ટ ક્લાસ ક્રિકેટર સુબોધ જૈનના પુત્ર સારાંશ જૈને વર્ષ 2014માં રણજી ટ્રોફીમાં ડેબ્યૂ કર્યું હતું. વર્ષ 2022ની રણજી ટ્રોફીમાં મધ્યપ્રદેશ માટે નોકઆઉટ રાઉન્ડમાં 13 વિકેટ અને હાફ સેન્ચુરી ફટકારીને ટીમને પ્રથમવાર ચેમ્પિયન બનાવવામાં મહત્ત્વપૂર્ણ ભૂમિકા ભજવી હતી. તાજેતરના રણજી સીઝનમાં તેમણે 57.55ની સરેરાશથી 518 રન બનાવ્યા અને 20.43ની સરેરાશથી 30 વિકેટ લીધી હતી. આ ઉપરાંત દુલીપ ટ્રોફીમાં સેન્ટ્રલ ઝોન તરફથી રમતા તેમણે 16 વિકેટ અને 2 અર્ધશતક ફટકારી પ્લેયર ઓફ ધ સિરીઝનો એવોર્ડ જીત્યો હતો.
ટીમ ઇન્ડિયામાં સિલેક્શનનું મુખ્ય કારણ
વોશિંગ્ટન સુંદર હેમસ્ટ્રિંગની ઇજાના કારણે પસંદગી માટે ઉપલબ્ધ નહોતા. વળી, શ્રીલંકાની ટીમમાં ડાબોડી બેટ્સમેનોની સંખ્યા વધુ હોવાથી પસંદગીકારો ટીમમાં એક ગુણવત્તાયુક્ત ઓફ-સ્પિનર ઇચ્છતા હતા. સારાંશ જૈન તાજેતરમાં ભારત એ ટીમ સાથે શ્રીલંકાના પ્રવાસે ગયા હતા, જ્યાં બીજી મેચમાં તેમણે અણનમ 70 રન બનાવ્યા હતા અને 6 વિકેટ ઝડપીને પોતાનો દાવો મજબૂત કર્યો હતો. શ્રીલંકાની સ્પિન ફ્રેન્ડલી પિચો અને વિરોધી ટીમના ડાબોડી બેટ્સમેનો સામે સારાંશ જૈન ટીમ ઇન્ડિયા માટે ટ્રમ્પ કાર્ડ સાબિત થઈ શકે છે.
