વૈભવ સૂર્યવંશીને મળી મોટી જવાબદારી, સૈયદ મુશ્તાક અલી ટ્રોફીમાં બિહાર ટીમનો કૅપ્ટન બન્યો, પ્રથમ મેચ સૌરાષ્ટ્ર સામે

Syed Mushtaq Ali Trophy 2026 : યુવા બેટ્સમેન વૈભવ સૂર્યવંશીને બિહારની સિનિયર ક્રિકેટ ટીમનો કૅપ્ટન બનાવવામાં આવ્યો છે. તે પહેલીવાર સિનિયર ટીમનું નેતૃત્વ કરશે. 14 નવેમ્બરથી શરૂ થઈ રહેલી સૈયદ મુશ્તાક અલી ટ્રોફીની શરૂઆતની 2 મેચ માટે તેને 17 સભ્યોની ટીમની કમાન સોંપવામાં આવી છે, જ્યારે સૂરજ કશ્યપને ટીમનો વાઇસ-કૅપ્ટન બનાવવામાં આવ્યો છે. બિહાર ક્રિકેટ એસોસિએશન(BCA) દ્વારા શુક્રવારે ટીમની જાહેરાત કરવામાં આવી હતી. બિહાર પોતાની પ્રથમ મેચ 14 નવેમ્બરે ઇન્દોરમાં સૌરાષ્ટ્ર સામે રમશે.

બિહાર ગ્રૂપ-B માં સામેલ, આ ટીમો સામે થશે મુકાબલો

સૈયદ મુશ્તાક અલી ટ્રોફીમાં બિહારને ગ્રૂપ-Bમાં રાખવામાં આવ્યું છે. આ ગ્રૂપમાં દિલ્હી, હરિયાણા, જમ્મુ-કાશ્મીર, પંજાબ, રેલવે, સૌરાષ્ટ્ર અને તમિલનાડુ જેવી ટીમો પણ સામેલ છે. બિહારની ટીમ પોતાના અભિયાનની શરૂઆત સૌરાષ્ટ્ર સામે કરશે, જેમાં વૈભવ સૂર્યવંશી શરૂઆતની 2 મેચોમાં ટીમની કપ્તાની કરશે.

કપ્તાની અંગે BCA પ્રમુખનું નિવેદન

બિહાર ક્રિકેટ એસોસિએશનના પ્રમુખ હર્ષ વર્ધને જણાવ્યું કે કપ્તાની મળવાથી વૈભવને એક લીડર તરીકે આગળ વધવાની તક મળશે. તેમણે કહ્યું કે વૈભવે નાની ઉંમરે શાનદાર પ્રતિભા, આત્મવિશ્વાસ અને રમતની ઊંડી સમજ દર્શાવી છે. બોર્ડને આશા છે કે તેની કપ્તાનીમાં ટીમ શિસ્ત સાથે સારું પ્રદર્શન કરશે.

બિહારની 17 સભ્યોની ટીમ અને સ્ટેન્ડબાય ખેલાડીઓ

મુખ્ય ટીમમાં વૈભવ સૂર્યવંશી (કૅપ્ટન), આલોક કુમાર, આયુષ લોહારુકા (વિકેટકીપર), અલ્તમશ અશરફ, પરમ કુમાર સિંહ, અનમોલ કુમાર (વિકેટકીપર), ઋત્વિક રાજ, સૂરજ કશ્યપ (વાઇસ-કૅપ્ટન), મયંક કુમાર, રાઘવેન્દ્ર પ્રતાપ, આશિષ કુમાર, વાસુદેવ પ્રતાપ સિંહ, મોહમ્મદ ઇઝહાર, આમોદ યાદવ, પ્રશાંત સિંહ, નવાઝ ખાન અને હિમાંશુ સિંહનો સમાવેશ થાય છે.

સ્ટેન્ડબાય ખેલાડીઓમાં બિપિન સૌરભ, સુમન કુમાર, આકાશ રાજ, ખાલીદ આલમ, ભાસ્કર દુબે, કુમાર રજનીશ, સુયશ, અભિજીત સાકેત, યશસ્વી ઋષભ, લખન રાજા, પવન કુમાર, અમિત ચૌધરી, પીયૂષ સિંહ, ભાનુ કુમાર, લોકેશ બાબુલાલ કુમાર અને પ્રશાંત શ્રીવાસ્તવ સામેલ છે. મંગલ મહૌર અને શાકિબ હુસૈનની ઉપલબ્ધતા શરૂઆતની 2 મેચ પછી ફિટનેસ ટેસ્ટના આધારે નક્કી થશે.

IPL 2026 માં બનાવ્યા હતા 776 રન

વૈભવ સૂર્યવંશી IPL માં રાજસ્થાન રોયલ્સ તરફથી રમે છે. IPL 2026 માં તેનું પ્રદર્શન શાનદાર રહ્યું હતું અને તે ટુર્નામેન્ટમાં સૌથી વધુ રન બનાવનારો બેટ્સમેન બન્યો હતો. તેણે 16 ઇનિંગ્સમાં 237થી વધુના સ્ટ્રાઇક રેટથી 776 રન બનાવ્યા હતા. તે ભારતની T20 ઇન્ટરનેશનલ ટીમ તરફથી પણ રમી ચૂક્યો છે અને અત્યાર સુધીમાં તેણે 10 મેચ રમી છે.

અંડર-19 વર્લ્ડ કપ ફાઇનલમાં ફટકારી હતી 175 રનની ઇનિંગ

વૈભવે અંડર-19 વર્લ્ડ કપની ફાઇનલમાં ઇંગ્લેન્ડ સામે માત્ર 80 બોલમાં 175 રનની શાનદાર ઇનિંગ રમી હતી, જેની મદદથી ભારતે ફાઇનલ મુકાબલો 100 રનથી જીત્યો હતો. આ સિવાય તાજેતરમાં ન્યૂઝીલેન્ડ સામે રમાયેલી ત્રીજી T20 મેચમાં પણ તેણે 19 બોલમાં 45 રન ફટકાર્યા હતા અને અભિષેક શર્મા સાથે મળીને ઓપનિંગ ભાગીદારીમાં 133 રન બનાવ્યા હતા.