273 મેચ રમી ચૂકેલા ઈન્ટરનેશનલ ક્રિકેટરને નશો કરવાની કૂટેવ પડી, ટીમમાંથી તગેડી મૂકાયો

Sean Williams: ક્રિકેટરોને ખૂબ જ અનુશાસિત માનવામાં આવે છે કારણ કે તેમને લાંબા સમય સુધી મેદાન પર રહેવા માટે એનર્જીની જરૂર હોય છે. આ જ કારણ છે કે તેઓ નશાથી દૂર રહે છે, કારણ કે તેનાથી તેમનું કરિયર જોખમમાં મૂકાઈ શકે છે, પરંતુ ઝિમ્બાબ્વેના દિગ્ગજ ક્રિકેટર સીન વિલિયમ્સ કદાચ આ વાત ભૂલી ગયા છે. કરિયરના અંતિમ પડાવમાં આવીને તેમને મુશ્કેલીઓનો સામનો કરવો પડી રહ્યો છે. તેને નશાની કૂટેવ પડી ગઈ છે. આ જ કૂટેવના કારણે તેને ટીમમાંથી તગેડી મૂકાયો છે. ભવિષ્યમાં પણ તેના સિલેક્શનની શક્યતા ઓછી છે. 

273 મેચ રમી ચૂકેલા ઈન્ટરનેશનલ ક્રિકેટરને નશાની લત લાગી

વાસ્તવમાં ઝિમ્બાબ્વે માટે 273 ઈન્ટરનેશનલ મેચ રમી ચૂકેલ સીન વિલિયમ્સનું નેશનલ ટીમમાં સિલેક્શન માટે વિચાર કરવામાં નહીં આવશે. તેનો સેન્ટ્રલ કોન્ટ્રાક્ટ પણ રિન્યુ કરવામાં નહીં આવશે. ઝિમ્બાબ્વે ક્રિકેટ (ZC) એ કહ્યું કે તેણે જણાવ્યું છે કે તેને ડ્રગ્સની લત લાગી ગઈ છે. એક નિવેદનમાં ZCએ 'શિસ્તના મુદ્દાઓ અને વારંવાર ગેરહાજરીના ઈતિહાસનો ઉલ્લેખ કર્યો, જેણે ટીમની તૈયારીઓ અને પ્રદર્શનને અસર કરી છે.'

39 વર્ષીયસીન વિલિયમ્સે 20 વર્ષથી વધુના ઈન્ટરનેશનલ કરિયરમાં ઝિમ્બાબ્વે માટે તમામ ફોર્મેટમાં 273 મેચ રમી છે, પરંતુ ઝિમ્બાબ્વે ક્રિકેટે પુષ્ટિ કરી છે કે, 2025 પછી તેનો કોન્ટ્રાક્ટ રિન્યુ કરવામાં નહીં આવશે. વિલિયમ્સે તાજેતરમાં વ્યક્તિગત કારણોનો હવાલો આપીને મેન્સ T20 વર્લ્ડ કપ આફ્રિકા ક્વોલિફાયરની પૂર્વસંધ્યાએ ઝિમ્બાબ્વે ટીમમાંથી નામ પાછું ખેંચી લીધુ હતું. 

આ પણ વાંચો: હરિયાણામાં વોટ ચોરી કરીને સરકાર રચી, 25 લાખ ફેક વોટર્સ, હવે બિહારનો વારો: રાહુલ ગાંધી

મંગળવાર 4 નવેમ્બરના રોજ ઝિમ્બાબ્વે ક્રિકેટ બોર્ડે ખુલાસો કર્યો કે, અમે તેની ગેરહાજરીનું કારણ જાણવા માટે એક આંતરિક તપાસ કરી હતી, ત્યારબાદ વિલિયમ્સે બોર્ડને જણાવ્યું હતું કે, 'હું ડ્રગ્સની લતથી પીડાઈ રહ્યો છું અને સ્વેચ્છાએ પુનર્વસન કેન્દ્રમાં દાખલ થયો છું.'

તમામ ફોર્મેટમાં 8,000થી વધુ રન બનાવ્યા 

2005માં ઈન્ટરનેશનલ ક્રિકેટમાં ડેબ્યૂ કર્યા બાદ વિલિયમ્સે ઝિમ્બાબ્વે માટે તમામ ફોર્મેટમાં 8,000થી વધુ રન બનાવ્યા છે. વનડેમાં તેનું પ્રદર્શન સૌથી વધુ રહ્યુ, તેણે 37.53ની એવરેજથી 5217 રન બનાવ્યા છે, જેમાં 8 સદી અને 37 અડધી સદી સામેલ છે. આ વર્ષની શરૂઆતમાં તેણે જેમ્સ એન્ડરસનને પાછળ છોડીને સૌથી લાંબા સમય સુધી એક્ટિવ ઈન્ટરનેશનલ ક્રિકેટર બન્યો છે.