બાંગ્લાદેશ સામે વિકેટ ચટકાવતા જ મિચેલ સ્ટાર્કના નામે થયો વર્લ્ડ રેકોર્ડ, કપિલ દેવ પણ ટોપ 5ની લિસ્ટમાં સામેલ
Summarized by AI; it may make mistakes. Check important info
Summarized by AI; it may make mistakes. Check important info
Mitchell Starc Record : મેકેમાં બાંગ્લાદેશ સામે રમાઈ રહેલી સિરીઝની બીજી ટેસ્ટ મેચમાં ઓસ્ટ્રેલિયાના ફાસ્ટ બોલર મિચેલ સ્ટાર્કે કહેર વર્તાવ્યો છે. સ્ટાર્કે માત્ર 22 બોલમાં બાંગ્લાદેશના ટોપ ઓર્ડરને વેરવિખેર કરી નાખ્યો હતો. તેણે પોતાની શરૂઆતની 4 ઓવરમાં કરિયરની 19મી વખત પાંચ વિકેટ (ફાઈફર) ઝડપવાની સિદ્ધિ મેળવી હતી. આ શાનદાર પ્રદર્શનની શરૂઆત મેચના પહેલા જ બોલથી થઈ હતી, જ્યારે તેણે શાદમાન ઈસ્લામને પોતાનો શિકાર બનાવ્યો હતો. સ્વિંગ થતા બોલ પર શાદમાન ઈસ્લામે પોતાની વિકેટ ગુમાવી દીધી હતી.
149 વર્ષના ઈતિહાસમાં પ્રથમ ઘટના
આ ચોથી વખત હતું જ્યારે કોઈ ટેસ્ટ મેચના પહેલા જ બોલ પર મિચેલ સ્ટાર્કે વિકેટ લીધી હોય. આ સાથે જ આ કાંગારુ બોલર ટેસ્ટ ક્રિકેટના 149 વર્ષના ઈતિહાસમાં 4 વખત આવું કરનાર પ્રથમ અને એકમાત્ર બોલર બની ગયો છે. ACS ક્રિકેટ સ્ટેટિસ્ટિક્સના ડેટા અનુસાર, ટેસ્ટ મેચના પહેલા બોલ પર વિકેટ લેનારા બોલરોની યાદીમાં સ્ટાર્ક હવે ટોચ પર છે. તેણે સૌથી પહેલા 2016 માં દિમુથ કરુણારત્નેને આઉટ કર્યો હતો. ત્યારબાદ 2021 માં ઈંગ્લિશ બેટ્સમેન રોરી બર્ન્સ, 2024 માં યશસ્વી જયસ્વાલ અને હવે શાદમાન ઈસ્લામની વિકેટ પહેલા બોલ પર ઝડપી છે.
ટોપ-5 ની યાદીમાં કપિલ દેવ ત્રીજા સ્થાને
ટેસ્ટમાં સૌથી વધુ વખત પહેલા બોલ પર વિકેટ લેવાની આ વિશેષ યાદીમાં બીજા સ્થાને વેસ્ટ ઈન્ડિઝના પેડ્રો કોલિન્સ છે, જેમણે બાંગ્લાદેશના હનન સરકારને 3 વખત મેચના પહેલા જ બોલ પર આઉટ કર્યા છે. ત્યારબાદ ત્રીજા નંબરે ભારતના દિગ્ગજ ખેલાડી કપિલ દેવનું નામ આવે છે. 1983 ના વિશ્વ વિજેતા કપ્તાને પોતાના ટેસ્ટ કરિયરમાં 2 વખત આ કમાલ કર્યો છે. રિચાર્ડ હેડલી અને જ્યોફ આર્નોલ્ડે પણ 2-2 વખત આ સિદ્ધિ મેળવી છે.
જેમ્સ એન્ડરસનનો રેકોર્ડ તોડવાની તૈયારી
આ 28 મી વખત બન્યું છે જ્યારે મિચેલ સ્ટાર્કે ટેસ્ટની પહેલી ઓવરમાં વિકેટ ઝડપી હોય. હાલમાં, ટેસ્ટ ઈનિંગ્સની પહેલી ઓવરમાં સૌથી વધુ વિકેટ લેવાનો રેકોર્ડ ઈંગ્લેન્ડના જેમ્સ એન્ડરસનના નામે છે, જેણે 29 વિકેટ લીધી છે. સ્ટાર્કને આ દિગ્ગજથી આગળ નીકળવા માટે હવે માત્ર 2 વધુ વિકેટની જરૂર છે. આ મેચમાં સ્ટાર્કે 43 મિનિટમાં માત્ર 4 રન આપીને 5 વિકેટ ઝડપીને અવિશ્વસનીય આંકડો નોંધાવ્યો હતો. પીચ પરથી ફાસ્ટ બોલરોને મદદ મળી રહી હતી, અને બાંગ્લાદેશી બેટ્સમેનોએ ખરાબ શોટ રમીને પોતાના પર વધુ દબાણ ઊભું કર્યું હતું.
