VIDEO: 2 બોલ 2 રન..ડેવિડ મિલરના એક નિર્ણયે દિલ્હીને જીતેલી બાજી હરાવી, IPLમાં મોટો અપસેટ
Summarized by AI; it may make mistakes. Check important info
Summarized by AI; it may make mistakes. Check important info
David Miller: IPL 2026ની 14મી મેચમાં દિલ્હી કેપિટલ્સ અને ગુજરાત ટાઇટન્સ વચ્ચે અરુણ જેટલી સ્ટેડિયમમાં રસાકસીભર્યો મુકાબલો જોવા મળ્યો. શ્વાસ અધ્ધર કરી દે તેવી આ મેચમાં દિલ્હી કેપિટલ્સની માત્ર 1 રને હાર થઈ. ગુજરાત ટાઇટન્સે પ્રથમ બેટિંગ કરતા 20 ઓવરમાં 4 વિકેટે 210 રન બનાવ્યા હતા. દિલ્હી કેપિટલ્સને જીતવા માટે 211 રનનો ટાર્ગેટ મળ્યો હતો, પરંતુ ટીમ 20 ઓવરમાં 8 વિકેટે 209 રન જ બનાવી શકી હતી. આ મેચ છેલ્લી ઘડી સુધી ચાલી હતી, જ્યાં ડેવિડ મિલરની એક ભૂલ ટીમને ભારે પડી ગઈ હતી.
છેલ્લા 2 બોલમાં પલટાઈ મેચ
211 રનના લક્ષ્યાંકનો પીછો કરતા દિલ્હી તરફથી કેએલ રાહુલે શાનદાર 52 બોલમાં 92 રનની ઇનિંગ રમી હતી, જેમાં 11 ચોગ્ગા અને 4 છગ્ગા સામેલ હતા. પાથુમ નિસાંકાએ 24 બોલમાં 41 રન બનાવ્યા હતા. આ ઇનિંગ દરમિયાન ડેવિડ મિલર ઈજાના કારણે રિટાયર્ડ હર્ટ થયો હતો, પરંતુ તેણે વાપસી કરી અને દિલ્હીની હારેલી મેચને ખૂબ જ નજીક લઈ ગયો હતો. તેણે 20 બોલમાં 41 રનની વિસ્ફોટક ઇનિંગ રમી હતી, પરંતુ દિલ્હીની ટીમ જીતથી માત્ર 1 રન દૂર રહી ગઈ હતી.
દિલ્હીને છેલ્લી 2 બોલમાં 2 રનની જરૂર હતી. પરંતુ 20મી ઓવરના પાંચમા બોલે ડેવિડ મિલરે 1 રન લેવાની ના પાડી દીધી, જે ટીમને ભારે પડી. હકીકતમાં, તે લયમાં હતો, તેથી તેણે સ્ટ્રાઈક પોતાની પાસે જ રાખી અને છેલ્લા બોલે 2 રન બનાવવાનો પ્રયાસ કર્યો, પરંતુ મેચનો છેલ્લો બોલ તે ડોટ રમી ગયો. જેના કારણે ગુજરાતે આ મુકાબલો 1 રને પોતાના નામે કરી લીધો. ગુજરાતની આ સિઝનની પ્રથમ જીત છે, જ્યારે દિલ્હીને પ્રથમ હારનો સામનો કરવો પડ્યો છે.
ગુજરાતની તોફાની બેટિંગ
ટોસ હારીને પ્રથમ બેટિંગ કરવા ઉતરેલી ગુજરાતની શરૂઆત આક્રમક રહી હતી. શુભમન ગિલે કેપ્ટન ઇનિંગ રમતા 70 રન બનાવ્યા હતા. તો બીજી તરફ, જોસ બટલરે 27 બોલમાં 52 રનની ફટકાબાજીથી ભરપૂર ઇનિંગ રમી હતી. વોશિંગ્ટન સુંદરે પણ નંબર 4 પર આવીને 30 બોલમાં 55 રનનું યોગદાન આપ્યું હતું. આ ઇનિંગ્સના જોરે ગુજરાત 210 રન સુધી પહોંચવામાં સફળ રહ્યું હતું. દિલ્હીની બોલિંગમાં મુકેશ કુમારે 2 વિકેટ ઝડપી હતી, જ્યારે લુંગી એનગિડી અને કુલદીપ યાદવને 1-1 વિકેટ મળી હતી.
જાણો છેલ્લી ઓવરનો રોમાંચ
19મી ઓવર સુધી ટાઇટન્સની રમત સંપૂર્ણપણે નિયંત્રણમાં હતી અને હોમ ટીમ દિલ્હીને છેલ્લી બે ઓવરમાં 36 રનની જરૂર હતી. મિલર અને વિપ્રજની જોડી આગળની સિરાજની ઓવરમાં 23 રન ફટકાર્યા હતા. પ્રસિદ્ધ ક્રિષ્નાએ છેલ્લા છ બોલમાં 13 રનનો બચાવ કરવાનો હતો. વિપ્રજ નિગમ પ્રથમ બોલ પર ચોગ્ગો માર્યા બાદ આઉટ થઈ ગયો હતો, જે બાદ કુલદીપ સ્ટ્રાઈક પર આવ્યો તેને એક રન લીધો, મિલરને છેલ્લા ત્રણ બોલમાં 8 રન બનાવવાના હતા. ત્યારબાદ ચોથા બોલ પર લોન્ગ-ઓફ પર એક મોટો શોટ ફટકારવામાં આવ્યો, જેના કારણે દિલ્હી કેપિટલ્સની જીત લગભગ નક્કી જેવી હતી.
પરંતુ પ્રસિદ્ધ ક્રિષ્નાએ ડેવિડ મિલરને જે પાંચમો બોલ ફેંક્યો, તેના પર કોઈ રન આવ્યો નહીં. શોર્ટ ઓફ લેન્થ બોલને એન્ગલથી રમતા મિલરે ફરીને ડીપ સ્ક્વેર લેગ પર પુલ કર્યો. જ્યારે કુલદીપને પાછો મોકલવામાં આવ્યો ત્યારે તે અડધી પિચ પર હતો. મિલર 1 રન લેવા માગતો ન હતો. જો સ્કોર બરાબર હોત તો સિંગલ મળી ગયો હોત અને જો કુલદીપ ચૂકી પણ ગયો હોત, તો પણ મેચ ટાઈ થઈ જાત. ત્યારબાદ સમીકરણ 1 બોલમાં 2 રન થઈ ગયું હતું.
