ગજબ! ઈન્ટરનેશનલ ક્રિકેટમાં પહેલીવાર 1 જ ઓવરમાં 5 વિકેટ, 28 વર્ષના બોલરે રચ્યો ઈતિહાસ

Five Wickets in One Over : ક્રિકેટના ઈતિહાસમાં એક નવો અને ચોંકાવનારો અધ્યાય જોડાઈ ગયો છે. ઈન્ડોનેશિયાના 28 વર્ષીય ફાસ્ટ બોલર ગેડે પ્રિયંદાનાએ ઈન્ટરનેશનલ T20 ક્રિકેટમાં એવું કારનામું કરી દેખાડ્યું છે, જે આ પહેલા કોઈ પુરુષ કે મહિલા ખેલાડીએ નહોતું કર્યું. પ્રિયંદાના T20Iમાં એક જ ઓવરમાં 5 વિકેટ લેનારો વિશ્વનો પ્રથમ બોલર બની ગયો છે.

મેચનો ટર્નિંગ પોઈન્ટ બની 16મી ઓવર

મંગળવારે બાલીના ઉદયના ક્રિકેટ ગ્રાઉન્ડ પર 168 રનના લક્ષ્યનો પીછો કરી રહેલી કંબોડિયાની ટીમે 15 ઓવર બાદ 5 વિકેટ ગુમાવીને 106 રન બનાવ્યા હતા, પરંતુ મેચ સંપૂર્ણપણે એકતરફી નહોતી. ત્યારબાદ કેપ્ટને ગેડે પ્રિયંદાનાને ઓવર આપી, જે તેની પહેલી ઓવર હતી.

ઓવરના પ્રથમ ત્રણ બોલમાં પ્રિયંદાનાએ હેટ્રિક પૂરી કરી

ઓવરના પ્રથમ ત્રણ બોલમાં પ્રિયંદાનાએ હેટ્રિક પૂરી કરી. તેણે શાહ અબરાર હુસૈન, નિર્મલજીત સિંહ, ચાંથોએન રથાનકને આઉટ કર્યા. ત્યારબાદ એક ડોટ બોલ આવ્યો અને પછી બીજા બે બોલ પર મોંગડારા સોક અને પેલ વેન્નાકને પવેલિયન મોકલીને ઈતિહાસ રચી દીધો. 

આખી ઓવરમાં કંબોડિયા માત્ર 1 જ રન બનાવી શકી અને તે પણ વાઈડ દ્વારા. ટીમ લક્ષ્યથી 60 રન પાછળ રહી ગઈ અને મેચ ત્યાં જ પૂરી થઈ ગઈ. 

બેટિંગમાં પણ એક્ટિવ રહ્યો

બોલિંગમાં શાનદાર પ્રદર્શન પહેલા પ્રિયંદાનાએ બેટિંગમાં પણ યોગદાન આપ્યું. તેણે ઈનિંગની શરૂઆત કરતા 11 બોલમાં 6 રન બનાવ્યા. જોકે, ઈન્ડોનેશિયાની બેટિંગનો અસલી સ્ટાર વિકેટકીપર-બેટ્સમેન ધર્મા કેસુમા હતો, જેણે અણનમ 110 (68 બોલ) રનની વિસ્ફોટક ઈનિંગ રમી હતી. તેની ઈનિંગમાં 8 ચોગ્ગા અને 6 છગ્ગા સામેલ હતા. 

આ પહેલા ક્યાં થયું હતું આવું?

ડોમેસ્ટિક ક્રિકેટ કે લીગ T20 ક્રિકેટમાં એક ઓવરમાં 5 વિકેટ લેવાની સિદ્ધિ અગાઉ બે બોલરો મેળવી ચુક્યા છે. બાંગ્લાદેશના અલ-અમીન હુસૈને 2013-14 વિજય દિવસ T20 કપમાં UCB-BCB XI મેચ દરમિયાન આવું કર્યું હતું, જ્યારે પૂર્વ ભારતીય ક્રિકેટર અભિમન્યુ મિથુને 2019-20 સૈયદ મુશ્તાક અલી ટ્રોફી સેમિફાઈનલમાં કર્ણાટક માટે એક ઓવરમાં 5 વિકેટ લીધી હતી. પરંતુ T20I સ્તર પર આ સિદ્ધિ પહેલી વાર નોંધાઈ છે.

4 બોલમાં 4 વિકેટ

T20Iમાં આ પહેલા 14 વખત એક ઓવરમાં ચાર વિકેટ પડી ચૂકી છે. સૌથી ચર્ચિત ઉદાહરણ લસિથ મલિંગા છે, જેણે 2019માં ન્યુઝીલેન્ડ સામે 4 બોલમાં 4 વિકેટ લીધી હતી. પરંતુ એક જ ઓવરમાં પાંચ વિકેટ, આ ઈતિહાસમાં પહેલી વાર બન્યું છે.

આ પણ વાંચો: વિજય હઝારે ટ્રોફીમાં રમીને કેટલું કમાશે વિરાટ કોહલી અને રોહિત શર્મા? જાણો મેચ ફીસ

એસોસિએટ ક્રિકેટ માટે મોટી ક્ષણ

ગેડે પ્રિયંદાનાની આ સિદ્ધિ માત્ર ઈન્ડોનેશિયા માટે જ નહીં પરંતુ એસોસિએટ દેશોની ક્રિકેટ માટે પણ મોટા સમાચાર છે. તે સાબિત કરે છે કે વૈશ્વિક ક્રિકેટ હવે માત્ર મોટા દેશો સુધી મર્યાદિત નથી રહી.