IND vs ENG: સેમસન સહિત 3 સ્ટાર્સ પર લટકી તલવાર, વાઇસ-કેપ્ટન પર પણ ખતરો મંડરાયો

Sanju Samson And 3 other Uncertain Future in Team: ભારત અને ઇંગ્લેન્ડ વચ્ચે રમાયેલી પ્રથમ T20 મેચ વરસાદના કારણે રદ્દ થઈ ગઈ હતી. આ મેચમાં ટોસ જીતીને પ્રથમ બેટિંગ કરતા ભારતીય ટીમે 20 ઓવરમાં 7 વિકેટે 189 રન બનાવ્યા હતા. કેપ્ટન શ્રેયસ અય્યર અને ઓપનર અભિષેક શર્માએ શાનદાર અડધી સદી ફટકારી હતી, જ્યારે શિવમ દુબેએ 21 બોલમાં અણનમ 42 રનની તોફાની ઇનિંગ રમી હતી. જોકે, વરસાદના કારણે મેચનું કોઈ પરિણામ આવી શક્યું નહોતું, પરંતુ કેટલાક ભારતીય ખેલાડીઓનું નબળું પ્રદર્શન ટીમ મેનેજમેન્ટ માટે ચિંતાનો વિષય બન્યું છે. આ ખેલાડીઓમાં સંજુ સેમસન, ઇશાન કિશન અને વાઇસ કેપ્ટન તિલક વર્માનો સમાવેશ થાય છે.

સંજુ સેમસન માટે મુશ્કેલીઓ વધી
વિકેટકીપર બેટ્સમેન સંજુ સેમસનનું બેટ આ UK પ્રવાસ પર અત્યાર સુધી તદ્દન શાંત રહ્યું છે. આયરલેન્ડ સામેની T20 સીરિઝમાં પણ તે કોઈ મોટી ઇનિંગ રમી શક્યો નહોતો અને ઇંગ્લેન્ડ સામેની પ્રથમ T20 મેચમાં પણ તે સસ્તામાં આઉટ થઈ ગયો હતો. સતત ફ્લોપ પ્રદર્શનના કારણે હવે પ્લેઇંગ ઇલેવનમાં તેના સ્થાન પર સવાલો ઉઠવા લાગ્યા છે. જો આગામી મેચોમાં પણ તે રન નહીં બનાવી શકે, તો ટીમ મેનેજમેન્ટ તેને પડતો મૂકીને અન્ય વિકલ્પ પર વિચાર કરી શકે છે.

ઇશાન કિશન પણ ભારે દબાણમાં
ICC T20 રેન્કિંગમાં નંબર-1 બેટ્સમેન બનેલા ઇશાન કિશન માટે પણ આ પ્રવાસ અત્યાર સુધી ઘણો નિરાશાજનક રહ્યો છે. આયરલેન્ડ સામે તે માત્ર 1 અને 12 રન જ બનાવી શક્યો હતો, જ્યારે ઇંગ્લેન્ડ સામેની પ્રથમ T20માં તે ખાતું ખોલાવ્યા વિના જ પેવેલિયન પરત ફર્યો હતો. સૌથી મોટી ચિંતાની વાત એ છે કે છેલ્લી ત્રણ ઇનિંગ્સમાંથી તે બે વાર રનઆઉટ થયો છે. જો આગામી મેચોમાં ઇશાન પોતાની લય પાછી નહીં મેળવે, તો તેની જગ્યા પણ જોખમમાં આવી શકે છે.

વાઇસ કેપ્ટન તિલક વર્માની ધીમી બેટિંગ બની ચિંતા
ભારતીય ટીમના વાઇસ કેપ્ટન તિલક વર્માએ આ પ્રવાસ પર રન ચોક્કસ બનાવ્યા છે, પરંતુ તેનો સ્ટ્રાઈક રેટ સવાલોના ઘેરામાં છે. નંબર-5 પર બેટિંગ કરતા તેણે છેલ્લી ત્રણ ઇનિંગ્સમાં અનુક્રમે 19 (21 બોલ), 55 (46 બોલ) અને 13 (13 બોલ) રન કર્યા છે. મિડલ ઓર્ડરના આ ક્રમ પર બેટ્સમેન પાસેથી ઝડપી ગતિએ રન બનાવવાની અપેક્ષા રાખવામાં આવે છે, પરંતુ તિલક હજુ સુધી આ ભૂમિકામાં સંપૂર્ણપણે સફળ સાબિત થયો નથી.

ટીમ ઇન્ડિયા પાસે શું છે વિકલ્પો?
ઇશાન કિશન અને તિલક વર્માને આ સીરિઝમાં હજુ વધુ તકો મળે તેવી પૂરેપૂરી સંભાવના છે. જોકે, જો તેમનું ફોર્મ સતત ખરાબ રહેશે તો ટીમ મેનેજમેન્ટ મોટો નિર્ણય લઈ શકે છે. બીજી તરફ, સંજુ સેમસન માટે ખતરાની ઘંટી સૌથી વધુ વાગી રહી છે, કારણ કે તેના સ્થાને યુવા બેટ્સમેન વૈભવ સૂર્યવંશી ડેબ્યૂની રાહ જોઈ રહ્યો છે. આ ઉપરાંત, જો મિડલ ઓર્ડરમાં તિલક વર્માના સ્થાને કોઈ ફેરફાર કરવાની જરૂર પડશે, તો ટીમ મેનેજમેન્ટ પાસે રિંકુ સિંહ અથવા હાર્દિક પંડ્યા જેવા શાનદાર વિકલ્પો પણ ઉપલબ્ધ છે.