વૈભવ સૂર્યવંશીને વાઈસ કેપ્ટન બનાવતા હર્ષા ભોગલે રોષે ભરાયા, આંકડા બતાવી ઊઠાવ્યા સવાલ

A Controversial Captaincy For Teenager: આગામી 23 ઓગસ્ટથી બેંગલુરુમાં શરૂ થઈ રહેલી પ્રતિષ્ઠિત ડોમેસ્ટિક રેડ-બોલ ટૂર્નામેન્ટ દલીપ ટ્રોફી 2026-27 માટે ઈસ્ટ ઝોનની 15 સભ્યોની ટીમની જાહેરાત કરવામાં આવી છે. કોલકાતાના ઈડન ગાર્ડન્સ ખાતે મળેલી સિલેક્શન કમિટીની બેઠકમાં પસંદગીકારોએ મોટો દાવ ખેલ્યો છે. આ ટીમમાં વિકેટકીપર બેટ્સમેન ઈશાન કિશનને કેપ્ટન બનાવવામાં આવ્યો છે, જ્યારે બિહારના માત્ર 15 વર્ષના યુવા બેટ્સમેન વૈભવ સૂર્યવંશીને વાઇસ-કેપ્ટનની મોટી જવાબદારી સોંપવામાં આવી છે. સિલેક્ટર્સના આ ચોંકાવનારા નિર્ણય પર ભારતના જાણીતા ક્રિકેટ કોમેન્ટેટર હર્ષા ભોગલેએ ભારે આશ્ચર્ય વ્યક્ત કર્યું છે અને રેડ-બોલ ક્રિકેટના વાસ્તવિક આંકડાઓ રજૂ કરીને સોશિયલ મીડિયા પર પસંદગીકારોની નીતિ સામે ગંભીર સવાલો ઉઠાવ્યા છે.

હર્ષા ભોગલેએ આંકડા બતાવીને કીધું- 'આ કઈ પ્રકારની વિચારસરણી છે?'

વૈભવ સૂર્યવંશીને આટલી નાની ઉંમરે સીનિયર રેડ-બોલ ટીમની ઉપ-કપ્તાની સોંપવા પર હર્ષા ભોગલેએ સોશિયલ મીડિયા પ્લેટફોર્મ X પર પોતાની નારાજગી ઠાલવી છે. હર્ષા ભોગલેએ પોસ્ટ શેર કરતા લખ્યું કે,

"મને એ સમજાતું નથી કે વૈભવ સૂર્યવંશીને એક સીનિયર રેડ-બોલ ટીમનો વાઇસ-કેપ્ટન બનાવવા પાછળ પસંદગીકારોની શું વિચારસરણી છે? તેણે ફર્સ્ટ ક્લાસ ક્રિકેટમાં અત્યાર સુધી માત્ર 12 ઇનિંગ્સ રમી છે, જેમાં 17.25ની સામાન્ય એવરેજથી ફક્ત 207 રન બનાવ્યા છે. તેનું ટેલેન્ટ અસાધારણ છે તેમાં કોઈ શંકા નથી, પરંતુ રેડ-બોલ ક્રિકેટમાં હજુ તેની શીખવાની પ્રક્રિયા શરૂ થઈ છે અને તે અત્યારે એકદમ શરૂઆતના સ્ટેજ પર છે."

હર્ષા ભોગલેના આ નિવેદન બાદ ક્રિકેટ ફેન્સ અને વિવેચકો વચ્ચે સોશિયલ મીડિયા પર નવી ચર્ચા છેડાઈ છે. કેટલાક લોકોનું માનવું છે કે નેતૃત્વની આટલી મોટી જવાબદારી આપતા પહેલા વૈભવને ડોમેસ્ટિક ક્રિકેટમાં વધુ રન બનાવવાની અને મોટો અનુભવ મેળવવાની તક આપવી જોઈતી હતી.

સીમિત ઓવરોના પ્રદર્શનનું ઈનામ રેડ-બોલમાં કેમ?

બિહારના 15 વર્ષીય વૈભવ સૂર્યવંશીએ તાજેતરના મહિનાઓમાં આઈપીએલ (IPL), લિસ્ટ-એ ક્રિકેટ અને ઝિમ્બાબ્વે સામેની T20 સીરિઝ જેવા ટૂંકા ફોર્મેટમાં ધમાકેદાર પ્રદર્શન કરીને ભારતીય ક્રિકેટ જગતમાં ભારે સનસનાટી મચાવી દીધી છે. સીમિત ઓવરોના ક્રિકેટમાં તેના આ શાનદાર પ્રદર્શનને ધ્યાનમાં રાખીને પસંદગીકારોએ તેને ઈસ્ટ ઝોનની વાઇસ-કેપ્ટનશિપ સોંપી દીધી છે. પરંતુ ક્રિકેટ નિષ્ણાતોનું કહેવું છે કે વ્હાઇટ-બોલ અને રેડ-બોલ બંને સંપૂર્ણપણે અલગ ફોર્મેટ છે, તેથી માત્ર શોર્ટ ફોર્મેટના આધારે ચાર-દિવસીય કે પાંચ-દિવસીય મેચો માટે આટલી મોટી જવાબદારી આપવી ઉતાવળિયો નિર્ણય કહી શકાય.

મોહમ્મદ શમી અને મુકેશ કુમાર જેવા સીનિયર્સની ટીમમાં હાજરી

આ વિવાદ વચ્ચે રસપ્રદ બાબત એ છે કે ઈસ્ટ ઝોનની આ 15 સભ્યોની ટીમમાં ભારતીય ટીમના સ્ટાર ફાસ્ટ બોલર મોહમ્મદ શમી અને અનુભવી બોલર મુકેશ કુમાર પણ સામેલ છે. લાંબા સમયથી ઈજા અને અન્ય કારણોસર ટીમ ઈન્ડિયાની ટેસ્ટ ટીમમાંથી બહાર ચાલી રહેલા મોહમ્મદ શમી માટે આ ટૂર્નામેન્ટ રાષ્ટ્રીય ટીમમાં વાપસી કરવા માટે ગોલ્ડન ચાન્સ સમાન છે. સીનિયર ખેલાડીઓની હાજરી વચ્ચે 15 વર્ષના વૈભવને વાઇસ-કેપ્ટન બનાવવાનો આ પ્રયોગ દલીપ ટ્રોફીમાં કેવો સાબિત થાય છે, તેના પર હવે આખા ક્રિકેટ જગતની નજર રહેશે.

દલીપ ટ્રોફી માટે ઈસ્ટ ઝોનની સંપૂર્ણ સ્ક્વોડ:

ઈશાન કિશન (કેપ્ટન), વૈભવ સૂર્યવંશી (વાઇસ-કેપ્ટન), અભિમન્યુ ઈશ્વરન, સુદીપ કુમાર ઘરામી, શાહબાઝ અહેમદ, સૂરજ સિંધુ જયસ્વાલ, મોહમ્મદ શમી, મુકેશ કુમાર, કુમાર કુશાગ્ર, શિખર મોહન, અનુકૂલ રોય, વિરાટ સિંઘ, સુભ્રાંશુ સેનાપતિ, ડેનિશ દાસ અને અભિજીત સરકાર.