'કેપ્ટન તરીકે જીતનો શ્રેય મારો તો હારની જવાબદારી પણ મારી...', સેમિ ફાઈનલમાં હાર બાદ એમ્બાપ્પે

Spain Shatters France's World Cup Dream: ફીફા વર્લ્ડ કપ 2026ની પ્રથમ સેમિફાઇનલ મેચમાં એક મોટો ઉલટફેર જોવા મળ્યો છે. અમેરિકાના ડલાસ સ્ટેડિયમ ખાતે રમાયેલા રોમાંચક મુકાબલામાં સ્પેનની યુવા અને જોશથી ભરેલી ટીમે વર્લ્ડ કપ જીતવાની પ્રબળ દાવેદાર ગણાતી ફ્રાન્સની ટીમને 2-0થી કારમી હાર આપી છે. આ હારની સાથે જ ફ્રાન્સનું સતત ત્રીજી વખત વર્લ્ડ કપની ફાઇનલમાં પહોંચવાનું સપ્નું રોળાઈ ગયું છે. મેચ પૂરી થયા બાદ ફ્રાન્સના સ્ટાર ફૂટબોલર અને કેપ્ટન કિલિયન એમ્બાપ્પે અત્યંત નિરાશ દેખાયો હતો અને તેણે આ પરાજયનો પૂરો દોષ પોતાના પર લીધો છે.

આ હાઈ-વોલ્ટેજ મેચની વિગતવાર માહિતી અને એમ્બાપ્પેના નિવેદનના મુખ્ય અંશો નીચે મુજબ છે:

સ્પેનનો મજબૂત મિડફિલ્ડ પર કબજો અને ફ્રાન્સની રણનીતિ ફ્લોપ

મેચની શરૂઆતથી જ લુઈસ ડે લા ફુએન્તેની સ્પેનિશ ટીમે ફ્રાન્સ પર દબાણ બનાવવાનું શરૂ કર્યું હતું. સ્પેનના ખેલાડીઓએ ડિફેન્સ અને એટેક બંને મોરચે શાનદાર તાલમેલ બતાવ્યો હતો. મેચની 22મી મિનિટે મિકેલ ઓયારઝાબાલે પેનલ્ટીને ગોલમાં ફેરવીને સ્પેનને 1-0થી લીડ અપાવી હતી. ત્યારબાદ 58મી મિનિટે પેડ્રો પોરોએ બીજો શાનદાર ગોલ કરીને સ્પેનની જીત 2-0થી નિશ્ચિત કરી દીધી હતી. એમ્બાપ્પેએ સ્વીકાર્યું કે અમારી યોજના સ્પેનના મિડફિલ્ડને રોકવાની અને રમતની સ્પીડને કંટ્રોલ કરવાની હતી, પરંતુ ટીમના ખેલાડીઓ આ પ્લાનિંગને મેદાન પર સફળતાપૂર્વક લાગુ કરી શક્યા નહોતા.

એમ્બાપ્પેનું મોટું નિવેદન: ‘જીત પર પ્રશંસા મળે છે, તો હારની જવાબદારી પણ મારી જ’

મેચ બાદ મીડિયા સાથે વાતચીત કરતા ફ્રાન્સના કેપ્ટન એમ્બાપ્પેએ ખુલ્લા મનથી પોતાની ભૂલ સ્વીકારી હતી. તેમણે જણાવ્યું હતું કે,

"જ્યારે ટીમ જીતે છે ત્યારે તમામ પ્રશંસા કેપ્ટનને મળે છે, તેથી જ્યારે ટીમ હારે ત્યારે તેની સંપૂર્ણ જવાબદારી પણ મારી જ બને છે. અમે ફાઇનલમાં પહોંચવા માંગતા હતા, પરંતુ અમે તે કરી શક્યા નહીં. શરૂઆતી પેનલ્ટીના કારણે સ્પેનનો આત્મવિશ્વાસ વધી ગયો હતો અને બીજો ગોલ થયા બાદ અમારી ટીમ પાસે વાપસી કરવા માટે જે ક્વોલિટી હોવી જોઈએ તે જોવા મળી નહોતી. હવે અમારે લોકોની આકરી ટીકાઓ પણ સાંભળવી પડશે."

કોચ દિદિએર ડેશાંપને જીત સાથે વિદાય આપવાનો લક્ષ્ય

આ હાર બાદ ફ્રાન્સની ટીમ હવે ટૂર્નામેન્ટમાં ત્રીજા સ્થાન માટે મુકાબલો રમશે. આ મેચ ફ્રાન્સના અનુભવી અને લાંબા સમયથી ટીમના કોચ રહેલા દિદિએર ડેશાંપની કોચ તરીકેની છેલ્લી મેચ હશે. એમ્બાપ્પેએ પોતાના કોચ વિશે ભાવુક થતા કહ્યું કે,

"ફ્રાન્સના ફૂટબોલ ઇતિહાસ અને અમારી ટીમ માટે ડેશાંપનું જે યોગદાન છે તે અજોડ છે અને તેનું મહત્ત્વ ક્યારેય ઓછું નહીં થાય. તેમની પાસે હવે માત્ર 1 જ મેચ બાકી છે અને અમે અમારું સર્વશ્રેષ્ઠ પ્રદર્શન કરીને આ મેચ જીતી તેમને સન્માનજનક વિદાય આપવા માંગીએ છીએ. તેઓ અને અમારા ફેન્સ આ જીતના પૂરા હકદાર છે."

આ ઐતિહાસિક જીત સાથે જ સ્પેનની ટીમે 16 વર્ષ બાદ ફીફા વર્લ્ડ કપની ફાઇનલમાં પ્રવેશ કર્યો છે, જ્યાં તેમનો મુકાબલો બીજી સેમિફાઇનલના વિજેતા સાથે થશે.