ટેસ્ટ ક્રિકેટના 7 બદનસીબ ક્રિકેટર જેમણે 400+ વિકેટો ઝડપી છતાં ક્યારેય રેન્કિંગમાં નંબર-1 ન બન્યા

Legends Who Missed No. 1 ICC Rank: ટેસ્ટ ક્રિકેટ ઇતિહાસમાં એવા કેટલાક સર્વકાલીન મહાન બોલરો રહ્યા છે જેમણે પોતાની ઘાતક બોલિંગથી વિશ્વભરમાં તરખાટ મચાવ્યો હતો અને 400થી 600થી વધુ વિકેટો ઝડપી હતી. જોકે, આશ્ચર્યજનક બાબત એ છે કે આટલી ભવ્ય સફળતા અને સાતત્ય છતાં આ દિગ્ગજો પોતાના સમગ્ર કરિયર દરમિયાન ક્યારેય ICC ટેસ્ટ બોલિંગ રેન્કિંગમાં No. 1ના સ્થાને પહોંચી શક્યા નહોતા. પોતાના સમકાલીન બોલરો સાથેની તીવ્ર સ્પર્ધાને કારણે તેઓ ટોચનું સ્થાન હાંસલ કરવાથી વંચિત રહી ગયા હતા.

ICC ટેસ્ટ બોલિંગ રેન્કિંગમાં નંબર-1 પર પહોંચ્યા વિના સૌથી વધુ ટેસ્ટ વિકેટ લેનારા બોલરોની સંપૂર્ણ યાદી

અનિલ કુંબલે (ભારત) – 619 વિકેટ: ભારતના સર્વકાલીન મહાન લેગ-સ્પિનર અનિલ કુંબલે ટેસ્ટમાં ભારત તરફથી સૌથી વધુ વિકેટ લેનારા બોલર છે. એક ઇનિંગમાં તમામ 10 વિકેટ લેવાની સિદ્ધિ છતાં મુથૈયા મુરલીધરન, શેન વોર્ન અને ગ્લેન મેકગ્રાના વર્ચસ્વ વચ્ચે તેઓ ક્યારેય નંબર-1 બની શક્યા નહીં.

નાથન લાયન (ઓસ્ટ્રેલિયા) – 571 વિકેટ: ઓસ્ટ્રેલિયાના દિગ્ગજ ઓફ-સ્પિનર નાથન લાયને ટેસ્ટ ક્રિકેટમાં 571 વિકેટો ઝડપી છે. પેટ કમિન્સ, રવિચંદ્રન અશ્વિન અને જસપ્રીત બુમરાહ જેવા સમકાલીન બોલરો સાથેની સ્પર્ધાને કારણે લાયન હજુ સુધી ICC રેન્કિંગમાં નંબર-1 પર પહોંચી શક્યા નથી.

કર્ટની વોલ્શ (વેસ્ટ ઈન્ડિઝ) – 519 વિકેટ: ટેસ્ટ ક્રિકેટમાં સૌપ્રથમ 500 વિકેટનો આંકડો પાર કરનારા વેસ્ટ ઈન્ડિઝના ઘાતક ફાસ્ટ બોલર કર્ટની વોલ્શે 519 વિકેટો ઝડપી હતી, પરંતુ પોતાની જ ટીમના કર્ટલી એમ્બ્રોઝ અને અન્ય બોલરોના દબદબાને લીધે તેઓ ક્યારેય ટોચનું રેન્કિંગ મેળવી શક્યા નહોતા.

કપિલ દેવ (ભારત) – 434 વિકેટ: ભારતને પ્રથમ વર્લ્ડ કપ અપાવનારા દિગ્ગજ ઓલરાઉન્ડર કપિલ દેવે 434 ટેસ્ટ વિકેટો ઝડપીને લાંબા સમય સુધી વિશ્વ રૅકોર્ડ જાળવી રાખ્યો હતો. જોકે, રિચાર્ડ હેડલી, માલ્કમ માર્શલ અને ઈમરાન ખાન જેવા બોલરોની હાજરીને લીધે કપિલ દેવ ક્યારેય નંબર-1 બોલર બની શક્યા નહોતા.

રંગના હેરાથ (શ્રીલંકા) – 433 વિકેટ: શ્રીલંકાના ડાબોડી સ્પિનર રંગના હેરાથે મુથૈયા મુરલીધરનની નિવૃત્તિ બાદ શ્રીલંકાના સ્પિન આક્રમણની શાનદાર આગેવાની કરતાં 433 ટેસ્ટ વિકેટ ઝડપી હતી, પરંતુ તેઓ પણ ICC ટેસ્ટ બોલિંગ રેન્કિંગમાં નંબર-1ના તાજ સુધી પહોંચવાથી ચૂકી ગયા હતા.

હરભજન સિંહ (ભારત) – 417 વિકેટ: ભારતના દિગ્ગજ ઑફ-સ્પિનર 'ટર્બનેટર' હરભજન સિંહે ભારતને અનેક ઐતિહાસિક ટેસ્ટ જીત અપાવીને 417 વિકેટો હાંસલ કરી હતી, પરંતુ મુથૈયા મુરલીધરન અને અન્ય સમકાલીન બોલરોના પ્રભાવ વચ્ચે તેઓ નંબર-1 ન બની શક્યા.

વસીમ અકરમ (પાકિસ્તાન) – 414 વિકેટ: 'સુલતાન ઑફ સ્વિંગ' તરીકે જાણીતા પાકિસ્તાનના મહાન ડાબોડી ફાસ્ટ બોલર વસીમ અકરમે ટેસ્ટમાં 414 વિકેટો ઝડપી હતી. રિવર્સ સ્વિંગના બાદશાહ હોવા છતાં વકાર યુનિસ, એલન ડોનાલ્ડ અને કર્ટલી એમ્બ્રોઝ સાથેની સ્પર્ધાને કારણે તેમનું સર્વોચ્ચ રેન્કિંગ નંબર-2 સુધી જ સીમિત રહ્યું હતું.