12 છગ્ગા, 39 બોલમાં સેન્ચુરી... ખતરનાક ઓલરાઉન્ડરે આન્દ્રે રસેલનો રેકોર્ડ ધ્વસ્ત કર્યો

Shanaka Smashes Fastest CPL Century: કેરેબિયન પ્રીમિયર લીગ (CPL) 2026ની મેચ નંબર-25માં સેન્ટ કિટ્સ એન્ડ નેવિસ પેટ્રિઅટ્સ અને સેન્ટ લુસિયા કિંગ્સ વચ્ચે રોમાંચક મુકાબલો ખેલાયો હતો. બાસેટરેના વોર્નર પાર્ક સ્ટેડિયમમાં રમાયેલી આ મેચમાં સેન્ટ કિટ્સ એન્ડ નેવિસ પેટ્રિઅટ્સે 137 રનના જંગી અંતરથી એકતરફી જીત હાંસલ કરી હતી. ટીમની આ ઐતિહાસિક જીતના અસલ હીરો શ્રીલંકાના પૂર્વ કેપ્ટન અને 34 વર્ષીય ઓલરાઉન્ડર દાસુન શનાકા રહ્યા હતા. શનાકાએ મેદાન પર ચોતરફ તોફાની શોટ્સ ફટકારીને માત્ર 39 બોલમાં સદી પૂરી કરી લીધી હતી અને CPL ઇતિહાસની સૌથી ઝડપી સદી ફટકારવાનો નવો વર્લ્ડ રેકોર્ડ પોતાના નામે નોંધાવ્યો હતો.

43 બોલમાં અણનમ 121 રનની વિસ્ફોટક ઇનિંગ

દાસુન શનાકાએ ક્રિઝ પર આવતાની સાથે જ આક્રમક વલણ અપનાવ્યું હતું અને સેન્ટ લુસિયાના બોલરોની બરાબરની ધોલાઈ કરી હતી. તેમણે માત્ર 43 બોલનો સામનો કરીને અણનમ 121 રનની તોફાની પારી રમી હતી, જેમાં 12 ગગનચુંબી છગ્ગા અને 8 ચોગ્ગા સામેલ હતા. શનાકાએ 281.40ના અસાધારણ સ્ટ્રાઇક રેટથી બેટિંગ કરીને પોતાની ટીમને નિર્ધારિત 20 ઓવરમાં 235/4ના વિશાળ સ્કોર સુધી પહોંચાડવામાં મુખ્ય ભૂમિકા ભજવી હતી. આ તેમના T20 કરિયરની ચોથી સદી રહી છે.

આન્દ્રે રસેલ, સીફર્ટ અને હેટમાયરનો સંયુક્ત રેકોર્ડ તોડ્યો

શનાકાએ માત્ર 39 બોલમાં સદી પૂરી કરીને CPLનો વર્ષો જૂનો રેકોર્ડ તોડી નાખ્યો છે. આ અગાઉ આ ટુર્નામેન્ટમાં સૌથી ઝડપી સદી 40 બોલમાં નોંધાઈ હતી, જે સંયુક્ત રીતે આન્દ્રે રસેલ, ટિમ સીફર્ટ અને શિમરોન હેટમાયરના નામે હતી. આ સાથે જ શનાકાએ પોતાની વ્યક્તિગત સિદ્ધિની પણ બરાબરી કરી છે; અગાઉ તેઓ શ્રીલંકાની ડોમેસ્ટિક T20 ક્રિકેટમાં પણ 39 બોલમાં સદી ફટકારી ચૂક્યા છે, એટલે કે T20 ક્રિકેટમાં આ બીજી વખત બન્યું છે જ્યારે તેમણે 39 બોલમાં સદી ફટકારી હોય.

સેન્ટ લુસિયા કિંગ્સનો ધબડકો: માત્ર 98 રનમાં ટીમ ઓલઆઉટ

જીતવા માટે 236 રનના વિશાળ લક્ષ્યાંકનો પીછો કરવા ઉતરેલી સેન્ટ લુસિયા કિંગ્સની બેટિંગ લાઇન-અપ પત્તાના મહેલની જેમ વિખેરાઈ ગઈ હતી. પેટ્રિઅટ્સના ઘાતક બોલિંગ આક્રમણ સામે સમગ્ર ટીમ માત્ર 98 રનમાં જ ઓલઆઉટ થઈ ગઈ હતી. ટીમ તરફથી માત્ર ટિમ સીફર્ટ લડત આપી શક્યા હતા, જેમણે 8 ચોગ્ગાની મદદથી 36 બોલમાં 50 રન બનાવ્યા હતા; તેમના સિવાય અન્ય કોઈ બેટ્સમેન ટકી શક્યો નહોતો. સેન્ટ કિટ્સ એન્ડ નેવિસ પેટ્રિઅટ્સ તરફથી શાનદાર બોલિંગ પ્રદર્શન કરતાં જેરેમિયા લુઇસે 5 વિકેટ ઝડપી હતી.