દુનિયાનું સૌથી બુદ્ધિશાળી AI મોડેલ GPT-6 Astra લોન્ચ, 6 કલાકનું કામ 10 મિનિટમાં કરી આપશે!: ખામી આવતાં સેમ ઓલ્ટમેને માંગી માફી

Altman Apologizes For Astra Rollout: આર્ટિફિશિયલ ઇન્ટેલિજન્સ ક્ષેત્રની અગ્રણી કંપની OpenAIએ 3 સપ્ટેમ્બરના રોજ પોતાનું અત્યાર સુધીનું સૌથી અદ્યતન અને શક્તિશાળી AI મોડલ 'GPT-6 Astra' સત્તાવાર રીતે લોન્ચ કર્યું છે. કંપનીનો દાવો છે કે આ નવું મોડલ આર્ટિફિશિયલ જનરલ ઇન્ટેલિજન્સ (AGI) હાંસલ કરવાની દિશામાં એક ઐતિહાસિક પગલું છે. OpenAIના સીઈઓ સેમ ઓલ્ટમેને સોશિયલ મીડિયા પ્લેટફોર્મ X પર આ રિલીઝની જાહેરાત કરતાં જણાવ્યું હતું કે:

“GPT-6 Astra આવી ગયું છે. અમે આશા રાખીએ છીએ કે તે નવી પેઢીની ઉદ્યોગસાહસિકતા, વૈજ્ઞાનિક શોધો અને નિર્માણને સક્ષમ બનાવશે. અમારું માનવું છે કે કમ્પ્યુટર યુઝ, પ્રોફેશનલ વર્ક, વિજ્ઞાન, કોડિંગ, સાયબર સિક્યોરિટી અને અન્ય ક્ષેત્રો માટે આ વિશ્વનું શ્રેષ્ઠ મોડલ છે. અમને થોડો વધારાનો સમય જરૂર લાગ્યો…"

વિવાદાસ્પદ અને મુશ્કેલ રોલઆઉટ વચ્ચે સેમ ઓલ્ટમેનની માફી

શાનદાર ક્ષમતાઓ હોવા છતાં, એસ્ટ્રાનું લોન્ચિંગ ખૂબ જ અસ્તવ્યસ્ત રહ્યું હતું. શરૂઆતી રોલઆઉટમાં આવેલી ટેકનિકલ અડચણો અને વિલંબ બદલ સીઈઓ સેમ ઓલ્ટમેને જાહેર જનતા સમક્ષ માફી માંગી હતી અને સ્વીકાર્યું હતું કે આ રિલીઝ અત્યંત અવ્યવસ્થિત રહી છે. તેમણે ખાતરી આપી હતી કે OpenAI આ સમસ્યાઓનું તાત્કાલિક નિરાકરણ લાવવા અને યુઝર્સ સુધી એક્સેસ વિસ્તારવા સક્રિયપણે કામ કરી રહ્યું છે. અગાઉના લોન્ચિંગની જેમ જ આ વખતે પણ Pro સબસ્ક્રાઇબર્સને સૌથી પહેલાં આ મોડલનો એક્સેસ આપવામાં આવશે.

‘આપણે હવે AGI યુગમાં છીએ’: OpenAI પ્રેસિડન્ટ ગ્રેગ બ્રોકમેન

મીડિયા બ્રીફિંગ દરમિયાન પત્રકારો સાથે વાત કરતા OpenAIના પ્રેસિડન્ટ ગ્રેગ બ્રોકમેને આ મોડલને ક્ષમતાના સંદર્ભમાં એક મોટી પેઢીગત છલાંગ ગણાવતા કહ્યું હતું કે, "આપણે હવે AGI યુગમાં છીએ તેવું અનુભવવું અવાસ્તવિક નથી." તેમનું માનવું છે કે ભવિષ્યની પેઢીઓ પાછળ વળીને જોતાં એસ્ટ્રાના લોન્ચિંગને AI ઇતિહાસની એક નિર્ણાયક ક્ષણ તરીકે ઓળખાવશે. પ્રેસ બ્રીફિંગમાં તેમણે સ્પષ્ટ શબ્દોમાં ઉમેર્યું હતું કે:

“મારા અંગત મતે, મને લાગે છે કે આપણે ત્યાં પહોંચી ગયા છીએ. AGI યુગમાં તમારું સ્વાગત છે.”

1,00,000થી વધુ GPUs પર તાલીમ અને મલ્ટી-સ્ટેપ કમ્પ્યુટર ટાસ્ક ક્ષમતા

ChatGPT 6 Astraને 1,00,000થી વધુ અદ્યતન GPUs પર તાલીમ આપવામાં આવી છે. આ વિશાળ કમ્પ્યુટિંગ પાવરના કારણે એસ્ટ્રા જટિલ કોડિંગ, તાર્કિક વિશ્લેષણ અને મલ્ટી-સ્ટેપ વર્કફ્લોને સંભાળવામાં GPT-5.6 કરતાં ઘણું વધારે ચડિયાતું સાબિત થાય છે. આ મોડલ વિવિધ કમ્પ્યુટર સિસ્ટમ્સમાં માનવીય હસ્તક્ષેપ વિના સ્વાયત્ત રીતે મોટા કાર્યો ચલાવવા માટે ડિઝાઇન કરવામાં આવ્યું છે. તે દસ્તાવેજો, સ્પ્રેડશીટ્સ અને પ્રેઝન્ટેશન્સ બનાવવા, વેબસાઇટ્સનું નિર્માણ કરવા તેમજ તેની કાર્યક્ષમતાનું પરીક્ષણ કરવા સક્ષમ છે.

લેટન્સી સિમ્યુલેશન્સ અને સોફ્ટવેર એન્જિનિયરિંગમાં GPT-5.6 Solને પછાડ્યું

લેટન્સી સિમ્યુલેશન્સમાં એસ્ટ્રાએ OSWorld 2.0ના ઓફલાઇન સબસેટ પર GPT-5.6 Sol કરતાં ઉત્કૃષ્ટ પરિણામો દર્શાવ્યા હતા અને દરેક ટાસ્ક દીઠ લગભગ 47% ઓછા સમયમાં પરિણામ હાંસલ કર્યું હતું. આ ઉપરાંત કંપનીએ દાવો કર્યો છે કે તે સોફ્ટવેર એન્જિનિયરિંગ માટેનું અત્યાર સુધીનું સર્વશ્રેષ્ઠ મોડલ છે. DeepSWE v1.1 બેન્ચમાર્ક પર બંને મોડલના હાઈએસ્ટ-સ્કોરિંગ કન્ફિગરેશનની સરખામણી કરતાં એસ્ટ્રાએ GPT-5.6 Solને પાછળ છોડી દીધું હતું અને તેનો અંદાજિત API ખર્ચ પણ ટાસ્ક દીઠ લગભગ 57% ઓછો રહ્યો હતો. અન્ય મુશ્કેલ બેન્ચમાર્ક્સમાં એસ્ટ્રાએ FrontierMath Tier 4 પર 98%નો સ્કોર અને ARC-AGI 3 પર 99.9%નો ઐતિહાસિક સ્કોર નોંધાવ્યો છે.

ઓનલાઇન રિસર્ચ, સાયન્ટિફિક એનાલિસિસ અને ટેક્સ રિટર્ન

એસ્ટ્રા કમ્પ્યુટર પર જાતે જ ઓનલાઇન ફોર્મ ભરવા, કેલેન્ડર મેનેજ કરવા, ઇન્ટરનેટ સંશોધન કરવા અને વૈજ્ઞાનિક ડેટાનું વિશ્લેષણ કરવા સક્ષમ છે. આ સાથે સોફ્ટવેર ઇન્સ્ટોલ-ટેસ્ટિંગ, કાનૂની દસ્તાવેજો તૈયાર કરવા કે ટેક્સ રિટર્ન ફાઇલ કરવા જેવા સમય માંગી લેતા કાર્યો પણ તે આપમેળે કરી શકે છે. કંપનીના જણાવ્યા અનુસાર, ફ્લેટ કે એપાર્ટમેન્ટ શોધવા જેવું 6 કલાકનું કામ આ મોડલ 10 મિનિટથી પણ ઓછા સમયમાં પૂરું કરી શકે છે.

સાયબર સિક્યોરિટીમાં 100% સ્કોર અને નિયંત્રિત રોલઆઉટ

પ્રોડક્શન સેફગાર્ડ્સ વિના કરવામાં આવેલા પરીક્ષણમાં આ મોડલે ExploitBench પર સંપૂર્ણ 100% સ્કોર હાંસલ કર્યો છે. મોડલે સુરક્ષિત સિસ્ટમ્સમાં રહેલી ખામીઓ શોધી તેને એક્સપ્લોઇટ કરવાની ક્રિટિકલ ક્ષમતા દર્શાવી છે, જેમાં મૂલ્યાંકન દરમિયાન તેણે બે અજાણી ખામીઓ શોધી કાઢી હતી. હગિંગ ફેસની સિસ્ટમ્સ સાથે જોડાયેલી અગાઉની ઘટના બાદ OpenAI એ સેફ્ટી પર ભાર મૂકતાં જણાવ્યું કે એસ્ટ્રા તેનું અત્યાર સુધીનું "most aligned model" છે. જેથી એડવાન્સ્ડ સાયબર સિક્યોરિટી ફીચર્સ હાલ 'ડેબ્રેક બ્લુ' પ્રોગ્રામ હેઠળ પસંદગીના ડિફેન્ડર્સ સુધી સીમિત રખાયા છે.

કેપેસિટી લિમિટ્સ, API પ્રાઇસિંગ અને સર્વિસ આઉટેજ વચ્ચે ઉપલબ્ધતા

એસ્ટ્રાના લોન્ચિંગ વખતે OpenAIને તમામ પ્રોડક્ટ્સ પર વપરાશ અને ક્ષમતા મર્યાદાનો સામનો કરવો પડ્યો છે. એક્સેસ દબાણ ઘટાડવા માટે Codex યુઝર્સને દૈનિક એલોકેશન રીસેટ ઓફર કરવામાં આવ્યું હતું, જ્યારે નેટવર્ક કેપેસિટી તપાસવા માટે કંપનીએ કેટલાક ફ્રન્ટિયર ટ્રેનિંગ કાર્યોને પણ ધીમા કર્યા હોવાનું સામે આવ્યું છે.

Astra ડેવલપર્સ માટે ફાસ્ટ મોડ પણ પ્રદાન કરે છે, જે સ્ટાન્ડર્ડ પ્રોસેસિંગ કરતાં બમણી સ્પીડ 2x કિંમતે આપે છે. તેનું પ્રાઇસિંગ પ્રતિ મિલિયન ઇનપુટ ટોકન્સ માટે $10 (આશરે ₹940) અને પ્રતિ મિલિયન આઉટપુટ ટોકન્સ માટે $50 (આશરે ₹4,700)થી શરૂ થાય છે. ડેબ્રેક સિક્યોરિટી પ્રોગ્રામના ગ્રાહકો માટે રોલઆઉટ શરૂ થઈ ચૂક્યું છે અને આગામી દિવસોમાં તે ChatGPT Plus, Pro, Business, Enterprise યુઝર્સ તેમજ API, AWS અને Amazon Bedrock પર ઉપલબ્ધ થશે. લોન્ચિંગના દિવસે જ ChatGPT, Claude અને Grok પ્લેટફોર્મ્સ પર વ્યાપક સર્વિસ આઉટેજ પણ જોવા મળ્યો હતો.