વોટ્સએપમાં આવી રહ્યું છે પ્રાઇવસી સાથેનું સમરી ફીચર, અનરીડ મેસેજ વાંચવાની ઝંઝટ થશે ખતમ

WhatsApp New Summeries Feature: વોટ્સએપ દ્વારા એક નવું કમાલનું ફીચર પર કામ કરવામાં આવી રહ્યું છે. આ ફીચરની મદદથી ઘણાં બધા મેસેજ અનરીડ હશે તો એ તમામને એક ક્લિક કરતાં વાંચી શકાશે. દરેક અનરીડ ચેટ્સની એક સિક્યોર સમરી તૈયાર કરવામાં આવશે. વોટ્સએપના આ ફીચર વિશે WABetaInfo દ્વારા તેમના રિપોર્ટમાં આ વિશે જાણકારી આપવામાં આવી છે. આ ફીચરની મદદથી હવે કોઈ પણ ગ્રુપ ચેટમાં મેસેજ ન વાંચ્યા હોય અને ઢગલો મેસેજ થઈ ગયા હોય તો માત્ર એક ક્લિક કરતાંની સાથે જ હવે એ તમામ મેસેજની એક સમરી જાણવા મળશે જેથી યુઝરને ખબર પડી જશે કે વાત શેના વિશે થઈ રહી છે.

આ ફીચર આવતાં યુઝરને હવે એક-એક કરીને દરેક મેસેજ વાંચવાની જરૂર નહીં પડે. જો સમરી વાંચ્યા બાદ યુઝરને દરેક મેસેજ વાંચવા હોય તો એ પણ વાંચી શકશે. આથી સમરી બાદ યુઝર્સ એ પણ નક્કી કરી શકશે કે ચેટ વાંચવા પાછળ સમય બરબાદ કરવો કે નહીં. આ ફીચર હાલમાં ડેવલપમેન્ટ હેઠળ છે અને એને બીટા વર્ઝનમાં લોન્ચ કરવામાં આવ્યું છે. ગૂગલ પ્લે સ્ટોર પર બીટા પ્રોગ્રામ હેઠળ 2.26.12.10 વર્ઝનમાં આ ફીચર વિશે જાણવા મળ્યું છે. વોટ્સએપ નવા ફીચર પર કામ કરે ત્યારે બીટા વર્ઝનમાં એ રજૂ કરે છે જેથી એમાં શું ખામી છે એ યુઝર્સ ઉપયોગ કરે ત્યારે એ વિશે જાણી શકાય.

પ્રાઇવસીથી ભરપૂર છે આ ફીચર

મેટા દ્વારા વોટ્સએપનું આ નવું ફીચર પ્રાઇવેટ પ્રોસેસિંગ ટેક્નોલોજી પર આધારિત છે. આ મેટા દ્વારા તૈયાર કરવામાં આવેલી સુરક્ષિત ટેક્નોલોજી છે જેમાં યુઝરના તમામ ડેટા પ્રાઇવેટ રહે છે. આ ટેક્નોલોજીના આધારે ડેટાને પ્રોસેસ પ્રાઇવેટલી કરવામાં આવે છે. આ કારણે મેટા અથવા તો વોટ્સએપ પણ આ ડેટાને વાંચી અથવા તો જોઈ શકતી નથી.

પ્રાઇવેટ પ્રોસેસિંગ ટેક્નોલોજીનું થયું ઓડિટ

મેટા દ્વારા જ્યારે પ્રાઇવેટ પ્રોસેસિંગ ટેક્નોલોજી તૈયાર કરવામાં આવી ત્યારે દરેકને નવાઈ લાગી હતી. આ ફીચર પ્રાઇવેટ કેવી રીતે કામ કરી શકે. આથી NCC ગ્રૂપ અને ટ્રેલ ઓફ બાઇટ્સ કંપની દ્વારા તેનું ઓડિટ પણ કરવામાં આવ્યું હતું. આ ઓડિટ બાદ કન્ફર્મ થયું કે મેટાનું આ ફીચર સાચે જ સિક્યોરિટી સ્ટાન્ડર્ડ સાથે બનાવવામાં આવ્યું છે અને એ સુરક્ષિત છે.

આ પણ વાંચો: નોકિયા layoffs: 14,000 કર્મચારીઓની છટણી, ભારત માટે ખરાબ સમાચાર

કેવી રીતે કામ કરશે આ ફીચર?

આ ફીચરનો ઉપયોગ જે યુઝર કરવો હોય એ જ કરી શકે છે. આથી એને ફરજિયાત બનાવવામાં નથી આવ્યું. યુઝર્સ ઇચ્છે તો આ ફીચરને ચાલુ અથવા તો બંધ જે કરવું હોય એ કરી શકે છે. પ્રાઇવેટ પ્રોસેસિંગ ફીચર ડિફોલ્ટ તરીકે બંધ રહેશે. આથી યુઝરે સેટિંગ્સમાં જઈને એને ચાલુ કરવાનું રહેશે. એક વાર આ ચાલુ કર્યા બાદ આ ફીચરનો ઉપયોગ કરી શકાશે.