ગૂગલ પ્લે સ્ટોરમાં મોટો ઇશ્યુ: કેટલીક સિસ્ટમ એપ્સની અપડેટ્સ નથી દેખાઈ રહી

Google Play Store Update Issue: ગૂગલ પ્લે સ્ટોરમાં હાલમાં એક બદલાવ જોવા મળી રહ્યો છે, જેના કારણે ઘણાં યુઝર્સ ચિંતિત છે. એન્ડ્રોઇડ ડિવાઇસ સારી રીતે કામ કરે, એ માટે સિસ્ટમમાં પહેલેથી આવેલી ઍપ્લિકેશન્સને અપડેટ કરવી જરૂરી છે. એન્ડ્રોઇડની ઍપ્લિકેશન્સની સાથે અન્ય ઍપ્લિકેશન્સ પર પણ અસર થઈ રહી છે, જેમાં યુટ્યુબ અને પિક્સેલ કેમેરાનો પણ સમાવેશ થાય છે. આ તમામ ઍપ્લિકેશન્સની પ્લે સ્ટોરમાં અપડેટ દેખાતી નથી. ગમે એટલી વાર રિફ્રેશ કરવા છતાંય, એ દેખાતી નથી.

કઈ-કઈ ઍપ્લિકેશન પર અસર થઈ છે?

એન્ડ્રોઇડમાં આવેલા આ નવા મુદ્દાની અસર મુખ્યત્વે વધુ ઉપયોગમાં આવતી ઍપ્લિકેશન્સ પર પડી છે. તેમાં એન્ડ્રોઇડ સ્વિચ, એન્ડ્રોઇડ સિસ્ટમ ઇન્ટેલિજન્સ, ગૂગલ વાઇ-ફાઇ પ્રોવિઝનર, ગૂગલ પાર્ટનર સેટઅપ, સેટિંગ્સ સર્વિસીસ, પિક્સેલ કેમેરા, પિક્સેલ વેધર અને યુટ્યુબ મ્યુઝિકનો સમાવેશ થાય છે. પિક્સેલ કેમેરાને ડાયરેક્ટ સર્ચ કરવામાં આવે ત્યારે ફક્ત 9.9 અપડેટ જ દેખાય છે. યુટ્યુબ પહેલેથી ઇન્સ્ટોલ હોય, છતાંયે એની અપડેટ્સ લિસ્ટમાં દેખાતી નથી. જોકે, યુટ્યુબને શોધીને એ પેજ પરથી અપડેટ કરી શકાય છે.

ડેટા રિસ્ટોર ટૂલ પર પણ અસર

ગૂગલની ડેટા રિસ્ટોર ટૂલ પર પણ આ ઇશ્યુની અસર જોવા મળી છે. આ ટૂલ જૂના ફોનમાંથી ડેટા નવા ફોનમાં પરિવહન કરવા માટે મદદ કરે છે, જે ડેટા કેબલ અથવા ક્લાઉડની મદદથી શક્ય છે. જોકે, આ સિસ્ટમ એપ પર પણ આ પ્રોબ્લેમનો પડઘો પડ્યો છે. હવે, આ ઍપ્લિકેશનને એક્સેસ અને અપડેટ કરવા માટે ગૂગલ પ્લે લિંકની જરૂર છે, કારણ કે તે વિના એને શોધી શકાતી નથી. આ સમસ્યા ગૂગલની પાર્ટનર સેટઅપ ઍપ્લિકેશન પર પણ જોવા મળી રહી છે.

આ પણ વાંચો: સર્ચમાં AIની મદદથી યુઝર્સને મળશે ઓડિયો ઓવરવ્યુ: ગૂગલના નવા ફીચરથી વેબ સાઇટ્સના ટ્રાફિક પર અસર

આ સમસ્યાનું કારણ શું?

એન્ડ્રોઇડમાં આ સમસ્યા કેમ સર્જાઈ છે એ અંગે કોઈ સ્પષ્ટતા નથી. ગૂગલ પ્લે સ્ટોરમાં આ સ્થિતિ શા માટે સર્જાઈ છે, એ અંગે ગૂગલે હજી સુધી કોઈ માહિતી જાહેર કરી નથી. ઓપરેટિંગ સિસ્ટમની તકલીફ છે કે પછી ગૂગલ દ્વારા એના પર કોઈ બદલાવ કરવામાં આવી રહ્યો છે, એ એક સવાલ છે.