EUના ફરમાન સામે ગૂગલ લાલઘૂમ: હરીફોને ડેટા આપવા સામે માંડી કાનૂની લડાઈ, કહ્યું—'યુઝર્સની પ્રાઈવસી જોખમમાં મૂકાશે'

Google Appeals EU Mandate On Sharing Search Data: ટેક જાયન્ટ ગૂગલે યુરોપિયન યુનિયન (EU)ના તે આદેશ વિરુદ્ધ કાનૂની અપીલ દાખલ કરી છે, જેમાં કંપનીને પોતાના યુઝર ડેટા હરીફ સર્ચ એન્જિનો સાથે શેર કરવા અને એન્ડ્રોઇડ ઓપરેટિંગ સિસ્ટમને હરીફ આર્ટિફિશિયલ ઇન્ટેલિજન્સ (AI) સેવાઓ માટે સુલભ બનાવવાની ફરજ પાડવામાં આવી છે. આ અપીલ લક્ઝમબર્ગ સ્થિત 'કોર્ટ ઓફ જસ્ટિસ ઓફ ધ યુરોપિયન યુનિયન'માં દાખલ કરવામાં આવી છે. આ સમગ્ર મામલો મોટી ટેક કંપનીઓ વચ્ચે મુક્ત સ્પર્ધાને પ્રોત્સાહન આપવા માટે ઘડાયેલા EUના 'ડિજિટલ માર્કેટ્સ એક્ટ' હેઠળ જોડાયેલો છે.

યુઝર પ્રાઈવસી જોખમાવા અંગે ગૂગલની ગંભીર ચેતવણી

ગૂગલના કોમ્પિટિશન વિભાગના સિનિયર ડિરેક્ટર ઓલિવર બેથેલે જણાવ્યું હતું કે:

• EUના આ નિર્ણયના કારણે કંપનીને યોગ્ય એનોનિમાઇઝેશન, યુઝર્સની જાણકારી કે તેમની સ્પષ્ટ સંમતિ વિના અંગત સર્ચ ડેટા શેર કરવાની ફરજ પડશે.
• લોકો સર્ચ એન્જિનનો ઉપયોગ પોતાના અત્યંત અંગત અને સંવેદનશીલ પ્રશ્નો પૂછવા માટે કરતા હોય છે.
• પૂરતા સુરક્ષા પગલાં અને સુરક્ષિત પ્રોટોકોલ વિના આવા અંગત પ્રશ્નો અને સર્ચ ક્વેરીઝ શેર કરવાથી યુઝર્સની પ્રાઈવસીને ક્યારેય સરભર ન થઈ શકે તેવું મોટું નુકસાન પહોંચી શકે છે.

યુરોપિયન કમિશનની સમયમર્યાદા

યુરોપિયન કમિશને ટેક ઉદ્યોગમાં સમાન તકો ઊભી કરવાના ઉદ્દેશ્યથી ગૂગલ સામે કડક સમયમર્યાદા નક્કી કરી છે. ગૂગલને હરીફ કંપનીઓ સાથે યુઝર સર્ચ ડેટા શેર કરવા માટે જાન્યુઆરી 2027 સુધીનો સમય આપવામાં આવ્યો છે. આ સાથે જ એન્ડ્રોઇડ ઓપરેટિંગ સિસ્ટમમાં જરૂરી ફેરફારો આવતા વર્ષે જુલાઈ મહિનાથી લાગુ થવાની શક્યતા છે. આ પગલાં પાછળનો હેતુ ગૂગલની 'જેમિની' જેવી પ્રમુખ AI સેવાઓ સામે માર્કેટમાં તંદુરસ્ત સ્પર્ધાને વેગ આપવાનો છે.