WhatsApp નંબર બદલતાં પહેલાં આ ભૂલ ન કરતાં! નહીંતર જૂની તમામ ચેટ્સ ડિલીટ થઈ જશે

Check Rules Before Changing WhatsApp: જો તમે તમારો WhatsApp નંબર બદલવાનું વિચારી રહ્યા હોવ, તો સીધું નવું એકાઉન્ટ બનાવવાને બદલે એપ્લિકેશનમાં આપેલા સત્તાવાર 'Change Number' ફીચરનો ઉપયોગ કરવો જોઈએ. આ ફીચરની મદદથી જૂનું એકાઉન્ટ, ગ્રુપ્સ, સેટિંગ્સ અને ચેટ હિસ્ટ્રી કોઈપણ અવરોધ વિના નવા નંબર પર શિફ્ટ થઈ જાય છે. જોકે, નંબર બદલતી વખતે કરવામાં આવેલી નાની બેદરકારીથી તમારા મહત્ત્વપૂર્ણ મેસેજ અને મીડિયા કાયમ માટે ડિલીટ થઈ શકે છે. તેથી પ્રક્રિયા શરૂ કરતાં પહેલાં આ 5 બાબતોનું ખાસ ધ્યાન રાખવું જરૂરી છે:

નંબર બદલતાં પહેલાં જૂનું એકાઉન્ટ એક્ટિવ છે કે નહીં તે ચકાસો

સૌથી પહેલાં એ સુનિશ્ચિત કરો કે તમારું જૂનું WhatsApp એકાઉન્ટ ફોનમાં યોગ્ય રીતે લોગઇન અને એક્ટિવ હોય. આ ઉપરાંત નવો સિમ કાર્ડ ફોનમાં લાગેલો હોવો જોઈએ અને તેના પર SMS કે કોલિંગ સુવિધા ચાલુ હોવી અનિવાર્ય છે, કારણ કે વેરિફિકેશન કોડ આ નવા નંબર પર જ મોકલવામાં આવશે.

WhatsApp Web કે Desktop પરથી નંબર નહીં બદલાય

ઘણા યુઝર્સ કમ્પ્યુટર કે લેપટોપ પર બ્રાઉઝર અથવા ડેસ્કટોપ એપથી નંબર ચેન્જ કરવાનો પ્રયાસ કરે છે. ધ્યાનમાં રાખો કે નંબર બદલવાની સુવિધા માત્ર મુખ્ય સ્માર્ટફોન એપમાં જ ઉપલબ્ધ છે, તેને વેબ કે ડેસ્કટોપ વર્ઝન દ્વારા બદલી શકાતી નથી.

નવા નંબર પર સ્વિચ કરતાં પહેલાં ચેટ બેકઅપ અવશ્ય લો

નંબર બદલવાની પ્રક્રિયા હાથ ધરતાં પહેલાં તમારી તમામ ચેટ્સ અને મીડિયા ફાઇલોનો નવો બેકઅપ લઈ લેવો હિતાવહ છે. તેના માટે WhatsApp Settings > Chats > Chat Backupમાં જઈને ગૂગલ ડ્રાઇવ કે આઇક્લાઉડ પર લેટેસ્ટ બેકઅપ સેવ કરી લો, જેથી કોઈ ડેટા લોસ ન થાય.

જો નવો ફોન પણ બદલી રહ્યા હોવ તો શું કરવું?

જો તમે નંબર સાથે નવો મોબાઇલ હેન્ડસેટ પણ બદલી રહ્યા હોવ, તો સીધા નવા ફોનમાં લોગઇન કરવાને બદલે પહેલાં જૂના ફોનમાં જ 'Change Number' ફીચરથી નંબર બદલો. જૂના ફોનમાં પ્રક્રિયા પૂર્ણ થયા બાદ નવો બેકઅપ બનાવો અને ત્યારબાદ જ નવા હેન્ડસેટમાં એપ ઇન્સ્ટોલ કરી નવા નંબરથી ચેટ રિસ્ટોર કરો.

ગ્રુપ્સ અને સંપર્કોને ઓટોમેટિક નોટિફિકેશન

નંબર બદલાતાંની સાથે જ તમારા તમામ WhatsApp ગ્રુપ્સમાં આપોઆપ મેસેજ જતો રહે છે કે તમે નંબર બદલ્યો છે. વ્યક્તિગત કોન્ટેક્ટ્સ માટે 'Notify Contacts' ફીચર દ્વારા તમે નક્કી કરી શકો છો કે તમારા તમામ સંપર્કોને જાણ કરવી છે કે માત્ર પસંદગીના સંપર્કોને જ સૂચના મોકલવી છે.

WhatsAppમાં નંબર બદલવાની સ્ટેપ-બાય-સ્ટેપ રીત

1. સ્માર્ટફોનમાં WhatsApp ખોલીને Settingsમાં જાઓ.
2. Account પર ટેપ કરીને Change Number પસંદ કરો અને 'Next' આપો.
3. પહેલા ખાનામાં જૂનો મોબાઇલ નંબર અને બીજા ખાનામાં નવો મોબાઇલ નંબર દાખલ કરો.
4. 'Next' પર ક્લિક કરી, નોટિફિકેશન વિકલ્પ પસંદ કર્યા બાદ 'Done' કરો.
5. નવા નંબર પર આવેલો 6 આંકડાનો OTP એન્ટર કરીને વેરિફિકેશન પૂર્ણ કરો.