| AI Image |
Apple Smart Glass: ટેક જગતની દિગ્ગજ કંપની એપલ તેના આગામી સ્માર્ટ ગ્લાસીસ દ્વારા માત્ર મેટા કંપનીને જ નહીં, પરંતુ સમગ્ર આઈવેર ઉદ્યોગને હચમચાવી દેવા માટે કમર કસી રહી છે. આ નવી પ્રોડક્ટ માટે કંપનીની વ્યૂહરચના બિલકુલ તેવી જ છે જેવી ‘એપલ વોચ’ લોન્ચ કરતી વખતે હતી. જ્યારે એપલ વોચ બજારમાં આવી, ત્યારે તેની સ્પર્ધા માત્ર પેબલ કે મોટોરોલા જેવી ટેક કંપનીઓ સામે જ નહોતી, પરંતુ સ્વોચ, ફોસિલ અને સિકો જેવી પ્રખ્યાત વોચ બ્રાન્ડ્સ સામે પણ હતી. હવે, એપલ તેના સ્માર્ટ ગ્લાસીસ દ્વારા $200 થી $500 (અંદાજે ₹16,500 થી ₹41,000)ના સેગમેન્ટમાં ઓકલે અને રે-બન જેવી સ્થાપિત બ્રાન્ડ્સને સીધી ટક્કર આપવાની યોજના બનાવી રહી છે.
ઘડિયાળ કરતાં પણ મોટું છે ચશ્માનું વૈશ્વિક બજાર
માર્કેટ રિસર્ચ સંસ્થા ‘મોર્ડર ઇન્ટેલિજન્સ’ના અહેવાલ અનુસાર, વૈશ્વિક ઘડિયાળ બજાર આશરે $132 બિલિયનનું હોવાનો અંદાજ છે. તેની સરખામણીમાં આઈવેર ઉદ્યોગ ઘણો મોટો છે, જેનું વાર્ષિક ટર્નઓવર $180 થી $200 બિલિયન વચ્ચે છે. જોકે, એપલ આ બજારના હાઈ-એન્ડ લક્ઝરી સેગમેન્ટને લક્ષ્ય બનાવી રહ્યું નથી. અગાઉ કંપનીએ $10,000 (અંદાજે ₹8.3 લાખ)ની કિંમતની સોનાની એપલ વોચ લોન્ચ કરીને લક્ઝરી માર્કેટમાં નસીબ અજમાવ્યું હતું, પરંતુ તેમાં ધાર્યા મુજબની સફળતા મળી નહોતી.
સ્માર્ટ ગ્લાસીસ માટે Appleની ‘વોચ ફોર્મ્યુલા’ વ્યૂહરચના
ભૂતકાળની ભૂલમાંથી શીખીને, આ વખતે એપલ સ્માર્ટ ગ્લાસીસ માટે મેઇનસ્ટ્રીમ કન્ઝ્યુમર્સ પર ધ્યાન કેન્દ્રિત કરી રહ્યું છે. કંપનીને વિશ્વાસ છે કે તેની મજબૂત બ્રાન્ડ વેલ્યુ, આકર્ષક ઇન્ડસ્ટ્રિયલ ડિઝાઇન અને આઇફોન સાથેનું સરળ કનેક્ટિવિટી જોડાણ ગ્રાહકોને આકર્ષિત કરશે. સામાન્ય ચશ્મા ખરીદવાનું વિચારતા લોકો સ્માર્ટ ફીચર્સના કારણે એપલ ગ્લાસીસ તરફ વળે તેવી પૂરી શક્યતા છે. આ ઉપરાંત, આ ચશ્મામાં આર્ટિફિશિયલ ઇન્ટેલિજન્સ ફીચર્સ પણ ઉપલબ્ધ હશે, જે યુઝર્સને તેમની આસપાસની દુનિયા સાથે ડિજિટલ રીતે વાત કરવામાં મદદ કરશે. AIની આ ક્ષમતા એપલના આ આગામી પ્રોડક્ટને વધુ આકર્ષક અને લોકપ્રિય બનાવશે.
