AI જગતમાં નવો ધમાકો, એન્થ્રોપિકે શક્તિશાળી મોડેલ 'ક્લૉડ ઓપસ 5.5' લોન્ચ કર્યું

Anthropic Launches Powerful Claude Opus 5.5 Model: આર્ટિફિશિયલ ઇન્ટેલિજન્સ (AI) ક્ષેત્રની અગ્રણી કંપની એન્થ્રોપિકે મંગળવારે પોતાનું નવું અને અદ્યતન AI મોડલ 'ક્લોડ ઓપસ 5.5' સત્તાવાર રીતે લોન્ચ કર્યું છે. કંપનીનો દાવો છે કે આ નવું મોડલ તેના ફેબલ 5.1 જેટલી જ ક્ષમતા અને પાવર ધરાવે છે, પરંતુ તેને ઓપરેટ કરવાનો ખર્ચ અગાઉના મોડલની સરખામણીએ સીધો 40 ટકા ઓછો આવે છે.

જોખમોની ચર્ચા વચ્ચે સ્વતંત્ર સુરક્ષા પરીક્ષણ

ક્લોડ ઓપસ 5.5ને એવા સમયે માર્કેટમાં ઉતારવામાં આવ્યું છે જ્યારે વિશ્વભરમાં AI સાથે જોડાયેલા જોખમો અને સલામતી અંગે ગંભીર ચર્ચાઓ ચાલી રહી છે. એન્થ્રોપિકે સ્પષ્ટ કર્યું છે કે આ મોડલના લોન્ચિંગ પહેલાં સ્વતંત્ર AI સેફ્ટી રિસર્ચ ગ્રુપ્સ—'ફ્રન્ટિયર ડિઝાઇન' અને 'METR' દ્વારા તેનું કડક સુરક્ષા પરીક્ષણ કરવામાં આવ્યું હતું. કંપનીએ એ પણ જણાવ્યું કે તેમના આંતરિક સેફ્ટી ટેસ્ટ્સમાં પણ આ મોડલ અગાઉની તમામ સિસ્ટમ્સ કરતાં વધુ સુરક્ષિત અને બહેતર સાબિત થયું છે.

સોફ્ટવેર ડેવલપમેન્ટમાં OpenAIના મોડલને પછાડ્યું

એન્થ્રોપિકના જણાવ્યા અનુસાર, ક્લોડ ઓપસ 5.5એ સોફ્ટવેર ડેવલપમેન્ટ બેંચમાર્ક પર પોતાના સૌથી મોટા હરીફ OpenAIના GT-5.6 Soul કરતાં પણ વધુ શ્રેષ્ઠ પ્રદર્શન નોંધાવ્યું છે, જે કોડિંગ અને પ્રોગ્રામિંગ કાર્યોમાં તેની ઉચ્ચ ક્ષમતા દર્શાવે છે.

ટોકન પ્રાઇસિંગમાં 20%નો ઘટાડો અને કિંમતનું ગણિત

આ નવા મોડલની કિંમત પ્રતિ મિલિયન ઇનપુટ ટોકન માટે 4 ડોલર અને પ્રતિ મિલિયન આઉટપુટ ટોકન માટે 20 ડોલર રાખવામાં આવી છે, જે અગાઉના ઓપસ 5ની સરખામણીએ 20 ટકા ઓછી છે:

• ઇનપુટ ટોકન ખર્ચ: પ્રતિ મિલિયન ઇનપુટ ટોકન એટલે કે વપરાશકર્તા દ્વારા પ્રોસેસિંગ માટે મોકલવામાં આવતા પ્રત્યેક 10 લાખ શબ્દોના ટુકડાઓ પર થતો ખર્ચ.
• આઉટપુટ ટોકન ખર્ચ: મોડલ દ્વારા જવાબો કે પરિણામો તૈયાર કરતી વખતે વપરાતા પ્રત્યેક 10 લાખ ટોકન્સ પર લાગતો ચાર્જ.
  મુખ્ય ક્લાઉડ પ્લેટફોર્મ્સ પર ઉપલબ્ધતા

ડેવલપર્સ અને એન્ટરપ્રાઇઝ વપરાશકર્તાઓ માટે ક્લોડ ઓપસ 5.5 મોડલ અગ્રણી ક્લાઉડ સર્વિસ પ્રોવાઇડર્સ જેવા કે એમેઝોન વેબ સર્વિસીસ, ગૂગલ ક્લાઉડ અને માઇક્રોસોફ્ટ અઝુરે પર તાત્કાલિક ઉપયોગ માટે ઉપલબ્ધ કરી દેવામાં આવ્યું છે.