લાઠીના ભુરખિયામાં ધાર્મિક વિધિના નામે ઠગાઈ કરનારા બે શખ્સો ઝડપાયા

અમરેલી: લાઠીમાં ધામક વિધિ કરવાના બહાને એક પરિવાર સાથે છેતરપિંડી કરી રોકડ તથા સોનાની વીંટી લઈને બે શખ્સો ફરાર થઈ ગયા હતા. જોકે, પોલીસે ટેકનિકલ સોર્સ અને બાતમીના આધારે બંને આરોપીને ઝડપી પાડી કુલ રૂ.૭૫૦૦૦ મુદ્દામાલ કબજે કરી આગળની કાર્યવાહી હાથ ધરી છે.
ગત તા. ૨૨ના મોટર સાયકલ લઇને લાઠી તાલુકાના ભુરખીયા ગામે બે શખસો એક રહેણાંક મકાને પાણી પીવાના બહાને ગયા હતા. જ્યાં એક વ્યકિત મીની ટ્રેકટર લઇ તેની પત્ની સાથે ઘરના ડેલા પાસે શેરીમાં ઉભો હતો. જેમાં બંને શખસો ઘર આગળ ઉભેલા દંપતી પાસે જઈ અને તેઓ સરધાર રામાપીરની જગ્યાએથી આવ્યા હોવાનું કહીને પાડરશીંગા ગામે રામાપીરની જગ્યાએ જવાના રસ્તા વિશે પૂછયું હતું. આ દરમિયાન આરોપીઓએ દંપતીને પાણી પીવડાવવા કહ્યું હતું. પાણી પીધા બાદ બંને શખસોએ દંપતીને કહ્યું કે, 'તમારા દિકરાના લગ્ન થયા ત્યારે કોઇએ તમારા પરિવાર ઉપર મેલુ નાખ્યું છે, જેના લીધે તમારો ધંધો સેટ થતો નથી એટલે તમારે વિધિ કરવી પડશે.'
દંપતીએ વિધિ કરવાની હા પાડતા, બંને શખસોએ વિધિના બહાને રૂ.૨૦૦૦૦ તથા એક સોનાની વીંટી લઈને ભાગી ગયા હતા. આથી પરિવારે બંને શખસો વિરુદ્ધ લાઠી પોલીસ સ્ટેશનમાં ફરિયાદ નોંધાવી હતી. ઘટના અંગે ટેકનીકલ સોર્સ અને અન્ય સોર્સથી આ દીપકનાથ નારણનાથ ધાંધુુ રહે. જસદણ અને રોહિતનાથ ભગવાનનાથ ધાંધુ નામના બે શખ્સોની અટકાયત કરી તેની પાસેથી રૂ.૭૫૦૦૦નો મુદ્દામાલ જપ્ત કર્યો હતો જેમાં રૂ.૨૦૦૦૦ રોકડ રકમ ૨.૪૧ ગ્રામની રૂ.૩૦૦૦૦ની કિંમતની એક સોનાની વીંટી ગુનામાં વપરાયેલું આશરે રૂ.૨૫૦૦૦ની કિંમતનું મોટર સાયકલ કબજે લીધા હતા. પકડાયેલા બંને આરોપીઓ વિરૂધ્ધ હળવદ, રાજકોટ શહેર બી ડિવિઝન પો.સ્ટેશન અને પડધરી પો.સ્ટશને જુદા જુદા ગુનો નોંધાયેલો છે.