એક વર્ષમાં ૫૮૭૯૬ ગ્રાહકોએ રુફ ટોપ સોલાર પેનલો ઈન્સ્ટોલ કરાવી

પીએમ સૂર્ય ઘર યોજના હેઠળ રુફ ટોપ સોલાર પેનલ નાંખવામાં ગુજરાત આખા દેશમાં નંબર વન છે અને તેમાં મધ્ય ગુજરાતનો મોટો ફાળો રહેલો છે.નવા જોડાણોની સંખ્યાની દ્રષ્ટિએ પીએમ સૂર્ય ઘર યોજના હેઠળ વડોદરા જિલ્લાએ સમગ્ર દેશમાં છઠ્ઠુ સ્થાન પ્રાપ્ત કર્યું છે.
મધ્ય ગુજરાત વીજ કંપની પાસેથી મળતી જાણકારી પ્રમાણે ૨૦૨૪-૨૫માં ૪૩૧૪૩ ગ્રાહકોએ રુફ ટોપ સોલાર જોડાણ મેળવ્યા હતા અને તેના કારણે ૧૬૮ મેગાવોટ ક્ષમતાનો ઉમેરો થયો હતો.આ ગ્રાહકોને ૩૧૬ કરોડ રુપિયા સબસિડી અપાઈ હતી.
જોકે ૨૦૨૫-૨૬ના વર્ષમાં રુફ ટોપ જોડાણો મેળવનારાઓની સંખ્યામાં ભારે વધારો જોવા મળ્યો છે.એક વર્ષમાં ૫૮૭૯૬ નવા ગ્રાહકો ઉમેરાયા છે અને તેના કારણે સ્થાપિત વીજ ક્ષમતા ૨૩૦ મેગાવોટ સુધી પહોંચી છે.આ ગ્રાહકોને સબસિડી પેટે ૪૫૮ કરોડની માતબર રકમ ચૂકવવામાં આવી છે.
૨૦૨૬ના વર્ષમાં અત્યાર સુધીમાં ૫૭૭૧ ગ્રાહકોએ રુફ ટોપ સોલાર જોડાણો ઈન્સ્ટોલ કરાવ્યા છે.તેમાંથી ૨૧૩૩ ગ્રાહકોને ૧૬ કરોડ રુપિયાની સબસિડી ચૂકવાઈ ગઈ છે અને અન્ય ગ્રાહકોની સબસિડી ચૂકવવાની કાર્યવાહી ચાલી રહી છે.