હોર્મુઝ સ્ટ્રેઇટ ખોલવા માટે અમેરિકી પ્રમુખે ઇરાનને પાંચ દિવસનું આખરીનામું આપ્યું છે : છતાં દુનિયા હજી એે અદ્ધર શ્વાસે જીવી રહી છે
નવી દિલ્હી: ટ્રમ્પ કે ખોમેનેઈ મમતે ચઢ્યા છે. ઈરાન યુદ્ધનો અંત ક્યારે આવશે તે કોઈ કહી શકે તેમ નથી. ખુદ ટ્રમ્પ કે ખોમેનેઈ પણ તે વિષે કશું જાણી શકે તેમ જ નથી. ત્યાં તે સંબંધે કોઈ નિવેદન કરવાની વાત જ રહેલી નથી.
ઇરાને હોર્મુઝ સ્ટ્રેઇટ બંધ કરી દુનિયાનું નાક દબાવ્યું છે. આથી અમેરિકાના પ્રમુખે તે ખોલવા પહેલા તો બે દિવસનું આખરીનામું આપતાં કહ્યું હતું કે, 'જો તેમ નહીં કરાય તો તમારા પરમાણુ ઊર્જા સંચાલિત વિદ્યુત- ઉત્પાદન સંયંત્રો ખતમ કરી નાખીશું.' આ સાથે ખાડી દેશોમાં હડકંપ ફેલાઈ ગયો છે. જો પરમાણુ સંયંત્રો તોડવામાં આવે તો તેમાંથી વહેતા કિરણોત્સર્ગથી આસપાસનો સમુદ્ર પ્રદૂષિત થઈ જાય.
આ ખાડી દેશો તે સમુદ્રજળ શુદ્ધ કરી તે પીવા માટે તેમજ અન્ય ઉપયોગ માટે લે છે. પરંતુ મુશ્કેલી તે છે કે અન્ય પ્રદૂષણો દૂર કરવાના સંયંત્રો છે પરંતુ કિરણોત્સર્ગથી થતું પ્રદૂષણ દૂર કરવાની કોઈ ટેક્નિક હજી શોધાઈ નથી. તે સંભવિત પણ લાગતું નથી. આથી ખાડી દેશોમાં હડકંપ ફેલાઈ ગયો છે.
એવું લાગે છે કે, ખાડી દેશોના પ્રતિનિધિઓ અમેરિકાના ઉચ્ચ અધિકારીઓને મળવા ગયા હતા અને તેઓ સાથેની મંત્રણા પછી તે અધિકારીઓએ જ ટ્રમ્પને તત્કાળ હુમલા ન કરવા સમજાવ્યા હશે.
ટૂંકમાં આ તબક્કે તો આફત પાંચ દિવસ સુધી ટળી છે. પરંતુ પછી શું થશે તેની ચિંતા વિશ્લેષણકારોને કોરી ખાય છે. એક વિશ્લેષણકારે તો તેવી આશંકા દર્શાવી હતી કે જેમ પૉલેન્ડ ઉપરના હીટલરના હુમલાએ બીજું વિશ્વયુદ્ધ શરૂ કરી દીધું હતું તેમાં ઇરાન પરનો અમેરિકી હુમલો વિશ્વને ત્રીજા વિશ્વયુદ્ધ તરફ ઢસડી જાય તો પણ કોઈને આંચકો નહીં લાગે વિશ્વ 'વિસુવિયસના શિખર' તરફ જઈ રહ્યું છે.
