રેલવે મુસાફરોને મોટી રાહત : 1 ઓગસ્ટથી બદલાઈ જશે તત્કાલ ટિકિટ બુકિંગ સિસ્ટમ, જાણો 5 મોટા ફેરફાર

Indian Railway Tatkal Ticket New Rules : જો તમે ટ્રેનમાં પ્રવાસ કરવા માટે રેલવે સ્ટેશનના રિઝર્વેશન કાઉન્ટર પરથી તત્કાલ ટિકિટ બુક કરાવતા હોવ, તો આ સમાચાર તમારા માટે ખૂબ જ મહત્વના છે. પહેલી ઓગસ્ટથી તત્કાલ ટિકિટ બુકિંગ સિસ્ટમમાં મોટો ફેરફાર થવા જઈ રહ્યો છે. ભારતીય રેલવેના પશ્ચિમ મધ્ય રેલવે (WCR) ઝોને ટિકિટ બુકિંગ પ્રક્રિયામાં પારદર્શિતા લાવવા અને મુસાફરોની સુવિધા વધારવાના હેતુથી નવી ટોકન સિસ્ટમ લાગુ કરવાનો નિર્ણય કર્યો છે.

1… પહેલી ઓગસ્ટથી લાગુ થશે તત્કાલ બુકિંગના નવા નિયમો

ભારતીય રેલવે દ્વારા 1 ઓગસ્ટથી કાઉન્ટર પરથી મળતી તત્કાલ ટિકિટની વ્યવસ્થા બદલાવા જઈ રહી છે. આ નવી સિસ્ટમનો મુખ્ય હેતુ ટિકિટ બારી પર થતી ભાગદોડ, લાંબી લાઈનો અને એજન્ટોની મનમાની અટકાવવાનો છે. નવા નિયમો મુજબ હવે મુસાફરોને ટોકન આપ્યા બાદ જ ટિકિટ કાઉન્ટર સુધી જવાની મંજૂરી મળશે.

2… ટોકન આપવાના સમયમાં ફેરફાર

અત્યાર સુધી મુસાફરોને તત્કાલ ટિકિટ બારી ખુલવાના થોડા સમય પહેલા જ ટોકન આપવામાં આવતા હતા, જેના કારણે લાઈનમાં અફરાતફરી સર્જાતી હતી. પહેલી ઓગસ્ટથી આ સમય બદલી નાખવામાં આવ્યો છે. હવે કાઉન્ટર ખુલવાના કલાકો પહેલા જ મુસાફરોને ટોકન વહેંચી દેવામાં આવશે, જેથી બુકિંગ શરૂ થતાની સાથે જ પ્રક્રિયા ઝડપથી પૂર્ણ થઈ શકે.
AC અને Non-AC તત્કાલ ટિકિટો માટે ટોકન આપવાનો સમય અલગ-અલગ નક્કી કરાયો છે. AC તત્કાલ બુકિંગ સવારે 10:00 વાગ્યે શરૂ થાય છે, જેના માટે ટોકન સવારે 8:30 થી 9:00 વાગ્યાની વચ્ચે મળશે. Non-AC (સ્લીપર) કેટેગરીનું બુકિંગ સવારે 11:00 વાગ્યે શરૂ થાય છે, જેના માટે ટોકન સવારે 9:30 થી 10:00 વાગ્યાની વચ્ચે આપવામાં આવશે.

3… દરેક કાઉન્ટર પર ટોકનની સંખ્યા મર્યાદિત

અવ્યવસ્થા રોકવા માટે રેલવેએ દરેક બુકિંગ કાઉન્ટર પરથી અપાતા ટોકનની મહત્તમ મર્યાદા નક્કી કરી દીધી છે. દરેક કાઉન્ટર પર AC તત્કાલ માટે 10 ટોકન અને Non-AC માટે 15 ટોકન જ આપવામાં આવશે. આનાથી લાઈનમાં ઊભેલા એવા મુસાફરોનો સમય બગડશે નહીં જેમને ટિકિટ મળવાની સંભાવના ખૂબ ઓછી હોય છે.

4… દલાલો અને કાળાબજારી પર વાગશે લગામ

ઘણીવાર એજન્ટો સવારથી જ લાઈનમાં કબજો જમાવી લેતા હોય છે. નવા નિયમો હેઠળ ટોકન મેળવવા માટે મુસાફરે પોતાનું મૂળ ઓળખપત્ર (Original ID Proof) બતાવવું ફરજિયાત રહેશે. ટોકન પર મુસાફરનું નામ અને વિગતો લખવામાં આવશે, જેથી અન્ય કોઈ વ્યક્તિ કે એજન્ટ તેનો દુરુપયોગ ન કરી શકે.

5… લાંબી લાઈનોમાંથી મુસાફરોને મળશે મુક્તિ

આ નવી વ્યવસ્થાથી સામાન્ય મુસાફરોને કલાકો સુધી લાઈનમાં ઊભા રહેવાની ઝંઝટમાંથી મુક્તિ મળશે. ટોકન મળ્યા બાદ મુસાફરો કાઉન્ટર નજીક આરામથી બેસીને રાહ જોઈ શકશે. ટોકન નંબરના આધારે જ ક્રમ મુજબ મુસાફરોને ટિકિટ બારી પર બોલાવવામાં આવશે.

આ બાબતોનું ખાસ ધ્યાન રાખવું

ઝોન : હાલમાં આ નવી ટોકન નીતિ પશ્ચિમ મધ્ય રેલવે (WCR)ના મુખ્ય સ્ટેશનો પર શરૂ કરવામાં આવી રહી છે.
સમયસર પહોંચવું : AC તત્કાલ માટે સવારે 8:30 વાગ્યે અને Non-AC માટે સવારે 9:30 વાગ્યે સ્ટેશન કાઉન્ટર પર પહોંચી જવું.
આઈડી પ્રૂફ : ટોકન લેતી વખતે અને ટિકિટ બુક કરાવતી વખતે ઓરિજિનલ આઈડી પ્રૂફ (જેમ કે આધાર કાર્ડ, વોટર આઈડી, ડ્રાઈવિંગ લાયસન્સ) સાથે રાખવું ફરજિયાત છે.
ફોર્મ તૈયાર રાખવું: ટોકન મેળવતી વખતે જ તમારું રિઝર્વેશન ફોર્મ સંપૂર્ણ ભરીને તૈયાર રાખવું જેથી કાઉન્ટર પર વિલંબ ન થાય.