ઉપવાસ સામે સરકાર ઝૂકી: સોનમ વાંગચુકે કહ્યું- મને લેખિતમાં ખાતરી અપાઈ, સરકારે આ 3 માગ સ્વીકારી

Sonam Wangchuk Ends 26 Day Fast in Presence of JP Nadda : દેશભરમાં સ્પર્ધાત્મક પરીક્ષાઓ અને NEET પેપર લીકના વિરોધમાં આંદોલન કરી રહેલા જાણીતા પર્યાવરણવિદ્ અને એક્ટિવિસ્ટ સોનમ વાંગચુકે ગુરુવારે મધ્ય રાત્રિ બાદ પોતાના 26 દિવસ લાંબા ઉપવાસનો અંત આણ્યો છે. ગુરુગ્રામની મેદાંતા હોસ્પિટલમાં કેન્દ્રીય મંત્રી જેપી નડ્ડા અને ડૉ. જિતેન્દ્ર સિંહની હાજરીમાં તેમણે પોતાના અનશન સમેટ્યા હતા.

હોસ્પિટલના રૂમમાંથી સામે આવેલા દ્રશ્યોમાં કેન્દ્રીય મંત્રી જિતેન્દ્ર સિંહે વાંગચુકને પથારીમાં બેઠા થવામાં મદદ કરી હતી, જ્યારે કેન્દ્રીય મંત્રી જેપી નડ્ડાએ તેમને કપમાંથી પાણી પીવડાવીને ઉપવાસ છોડાવ્યા હતા. આ ક્ષણે વાંગચુકના પત્ની ગીતાંજલિ અંગમો પણ તેમની સાથે હાજર રહ્યા હતા.

હું મારા ઉપવાસ પૂરા કરીને ખૂબ જ આભારી અને ખુશ છું. તમારો આભાર. ગીતાંજલિ હંમેશા મારી પડખે ઊભી રહી છે. હું તેનો આભાર માનવાને બદલે મારી લાગણીઓ વ્યક્ત કરવા માંગુ છું.

— સોનમ વાંગચુક

સૂત્રોના જણાવ્યા અનુસાર, કેન્દ્રીય ગૃહમંત્રી અમિત શાહ સાથે યોજાયેલી ઉચ્ચ સ્તરીય ચર્ચા બાદ મંત્રીઓ જેપી નડ્ડા અને જિતેન્દ્ર સિંહ વાંગચુકને મળવા પહોંચ્યા હતા.

દેશમાં હિંસા ન ભડકે એટલે લીધો નિર્ણય — સોનમ વાંગચુકનું સોશિયલ મીડિયા સ્ટેટમેન્ટ

ઉપવાસ તોડ્યા બાદ તુરંત જ સોનમ વાંગચુકે X (ટ્વિટર) પર એક પોસ્ટ શેર કરીને આ મામલે સ્પષ્ટતા કરી હતી. તેમણે લખ્યું કે કેન્દ્ર સરકાર સાથેની 'લાંબી વાટાઘાટો' અને દેશમાં આંદોલન હિંસક સ્વરૂપ ન લે તે હેતુથી તેમણે આ નિર્ણય લીધો છે.

• 65 સાંસદોની અપીલ: તેમણે જણાવ્યું કે જુદા જુદા રાજકીય પક્ષોના 65 જેટલા સાંસદોએ તેમની મુલાકાત લીધી હતી અથવા તો ઉપવાસ છોડવા માટે અપીલ કરી હતી.
• શરતો સાથે પારણાં: ઘણી શરતો પર લાંબી વાટાઘાટો થયા પછી અને દેશમાં સંભવિત હિંસાને ધ્યાનમાં રાખીને મેં ઉપવાસ તોડ્યા છે. હું ટૂંક સમયમાં એક અલગ વિડિયોમાં આ શરતો વિશે વિગતવાર સમજાવીશ.
• શાંતિની અપીલ: તેમણે પોતાના સમર્થકોને સતર્ક રહેવા અને આંદોલનમાં કોઈપણ પ્રકારની હિંસા ન થવા દેવા વિનંતી કરી હતી.

આ ઘટનાક્રમ બાદ વડાપ્રધાન નરેન્દ્ર મોદીએ પણ સોશિયલ મીડિયા પર પોસ્ટ કરીને વાંગચુકના ઝડપી સ્વાસ્થ્ય સુધારાની કામના કરી હતી અને તેમને ડૉક્ટરોની સલાહ મુજબ પોતાનું જૂનું વજન ઝડપથી પુનઃપ્રાપ્ત કરવા વિનંતી કરી હતી.

28 જૂનથી શરૂ થયેલી લડાઈ: હોસ્પિટલ ટ્રાન્સફર અને 11 કિલો વજન ઘટ્યું

NEET પેપર લીક અને પરીક્ષાઓમાં થતી ગેરરીતિઓ સામે જંતર મંતર પર વિદ્યાર્થીઓ દ્વારા શરૂ કરાયેલા આંદોલનના સમર્થનમાં સોનમ વાંગચુકે 28 જૂનથી અનિશ્ચિત મુદતના ઉપવાસ શરૂ કર્યા હતા. આ આંદોલનનું નેતૃત્વ કોકરોચ જનતા પાર્ટી (CJP) દ્વારા કરવામાં આવી રહ્યું છે, જે શિક્ષણ ક્ષેત્રે મોટા સુધારા, પરીક્ષા પ્રક્રિયામાં જવાબદારી અને કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની માંગ કરી રહી છે.

અનશન પૂરા કરતા થોડા કલાકો પહેલા જ વાંગચુકે સોશિયલ મીડિયા પર આશંકા વ્યક્ત કરી હતી કે કેટલાક "અસામાજિક તત્વો" શાંતિપૂર્ણ આંદોલનને હિંસક બનાવવાનો પ્રયાસ કરી રહ્યા છે, તેથી તેમણે શાંતિ જાળવવાની ભારપૂર્વક હાકલ કરી હતી.

સોનમ વાંગચુકના ઉપવાસ સમેટાયા તે પહેલા જ ગુરુવારે મોડી રાત્રે કેન્દ્ર સરકારે NEET અને પેપર લીક મામલે કેટલાક નિર્ણયો લીધા હતા.

1. કડક કાયદો અને ફાસ્ટ ટ્રેક કોર્ટ: વડાપ્રધાન નરેન્દ્ર મોદીએ જાહેરાત કરી કે કેન્દ્રીય કેબિનેટ પેપર લીક કરનારાઓ સામે સખત સજા અને ફાસ્ટ ટ્રેક કોર્ટની જોગવાઈ ધરાવતા ડ્રાફ્ટ કાયદા પર ચર્ચા કરશે. ચાલુ ચોમાસુ સત્રમાં જ આ બિલ સંસદમાં રજૂ કરવામાં આવશે.
2. શિક્ષણ મંત્રાલયમાં મોટો ફેરબદલ: સરકારે તાત્કાલિક અસરથી નરેશ કુમાર ગંગવાર ની નવા હાયર એજ્યુકેશન સેક્રેટરી તરીકે અને ટી કે અનિલ કુમાર ની સ્કૂલ એજ્યુકેશન ડિપાર્ટમેન્ટના સેક્રેટરી તરીકે નિમણૂક કરી દીધી છે. અગાઉના સચિવ વિનીત જોશીની બદલી કરી દેવામાં આવી છે.

સરકારના આ પગલાં અને કાયદાકીય ખાતરીઓ બાદ વાંગચુકે અનશન સમેટ્યા છે. જોકે, CJP દ્વારા ચલાવવામાં આવી રહેલું દેશવ્યાપી આંદોલન હજુ પણ ચાલુ જ છે અને તેઓ શિક્ષણ મંત્રીના રાજીનામાની પોતાની માંગ પર મક્કમ છે.

2 દિવસ સુધી આકરી વાટાઘાટો ચાલી, મને લેખિતમાં ખાતરી જોઈતી હતી

ઉપવાસ તોડ્યા બાદ રેકોર્ડ કરેલા પોતાના પ્રથમ વિડિયો મેસેજમાં સોનમ વાંગચુકે સરકાર સાથે થયેલી ગહન વાટાઘાટો વિશે ખુલાસો કર્યો હતો:

છેલ્લા બે દિવસથી અમારી વચ્ચે ખૂબ જ આકરી વાટાઘાટો ચાલી રહી હતી. મને ખાતરી જોઈતી હતી અને તે પણ લેખિતમાં! આ જ કારણે મારે બે દિવસ વધુ ભૂખ હડતાળ લંબાવવી પડી હતી. અંતે આજે સરકારે મને લેખિતમાં ખાતરી આપી છે.

— સોનમ વાંગચુક

તેમણે ઉમેર્યું કે જુદા જુદા રાજકીય પક્ષોના 65 જેટલા સાંસદોએ તેમને ઉપવાસ છોડવા અપીલ કરી હતી અને સંસદમાં NEET વિવાદ તથા પરીક્ષા સુધારા પર ચર્ચા કરવાની ખાતરી આપી હતી.

સરકારે લેખિતમાં કઈ 3 મોટી માંગણીઓ સ્વીકારી?

વાંગચુકે સરકાર તરફથી મળેલા સત્તાવાર લેખિત પત્રની વિગતો વાંચી સંભળાવી હતી, જેમાં સરકારે નીચે મુજબના વચનો આપ્યા છે:

1. શાંતિપૂર્ણ પ્રદર્શનકારીઓ સામે કેસ નહીં: 20 જુલાઈના 'ચલો સંસદ' માર્ચ સહિત અત્યાર સુધીના શાંતિપૂર્ણ આંદોલનમાં ભાગ લેનારા વિદ્યાર્થીઓ અને વિરોધકર્તાઓ સામે કોઈ પણ નવી કાનૂની કાર્યવાહી કે FIR નોંધવામાં આવશે નહીં.
2. મૃતક વિદ્યાર્થીઓના પરિવારજનોને વળતર: NEET પેપર લીક અને ગેરરીતિથી હતાશ થઈને આત્મહત્યા કરનારા વિદ્યાર્થીઓના પરિવારોને યોગ્ય વળતર આપવા અંગે સરકાર 'સાનુકૂળ વિચારણા' કરી રહી છે.
3. સંસદમાં જવાબદારી પર ચર્ચા: સંસદના વર્તમાન ચોમાસુ સત્રમાં પરીક્ષા પ્રક્રિયાની જવાબદારી અને NEET-UG પેપર લીક પર વિસ્તૃત ચર્ચા કરવામાં આવશે.

CJPનું આંદોલન યથાવત: ધર્મેન્દ્ર પ્રધાનના રાજીનામા સુધી લડાઈ ચાલુ રહેશે

બીજી તરફ, આ આંદોલનનું નેતૃત્વ કરી રહેલી કોકરોચ જનતા પાર્ટી (CJP) એ વાંગચુકના અનશન સમેટાવાના નિર્ણયને આવકાર્યો છે અને તેમના બલિદાનની પ્રશંસા કરી છે. CJP ના સ્થાપક અભિજીત દીપકે વાંગચુકનો આભાર માનતા કહ્યું કે તેમણે પોતાના પ્રાણ દાવ પર લગાવીને સમગ્ર દેશની ચેતના જગાડી છે.

જોકે, CJP એ સ્પષ્ટ કર્યું છે કે જંતર મંતર પર તેમનો શાંતિપૂર્ણ વિરોધ બંધ નહીં થાય.