પવારને કન્ટ્રોલ કરવાનો પડકાર, શિંદેની માગથી વંશવાદના આરોપની શક્યતા, ભાજપ હવે શું કરશે?

Maharashtra CM Face: કેન્દ્રીય ગૃહમંત્રી અમિત શાહ અને મહાગઠબંધનના નેતાઓ વચ્ચે દિલ્હીમાં યોજાયેલી બેઠકમાં ભારતીય જનતા પાર્ટી (BJP)એ એકનાથ શિંદેને નાયબ મુખ્ય પ્રધાનમંત્રી પદની ઓફર કરી હતી. જો કે, શિંદે હાલમાં આ પ્રસ્તાવ સ્વીકારવામાં અચકાય છે. તેમની અસહમતીથી ભાજપ માટે રાજકીય સંકટ સર્જાયું છે. 

નાયબ મુખ્યમંત્રીનું પદ રાજકીય કદમાં ઘટાડો કરશે 

સૂત્રોના જણાવ્યા અનુસાર, એકનાથ શિંદેએ ભાજપ પાસે તેમના શિવસેના જૂથના અન્ય નેતાને નાયબ મુખ્યમંત્રી પદ આપવાની માંગ કરી છે. તેમણે સરકારમાંથી સંપૂર્ણ રીતે બહાર રહેવાનો વિચાર પણ વ્યક્ત કર્યો છે. જોકે, ભાજપ શિંદેને સાઇડલાઇન કરવા તૈયાર નથી.  શિંદેને લાગે છે કે નાયબ મુખ્યમંત્રીનું પદ સ્વીકારવું એ મુખ્યમંત્રી બન્યા પછી તેમના રાજકીય કદમાં ઘટાડો થશે.

શ્રીકાંત શિંદેને નાયબ મુખ્યમંત્રીનું પદ આપે તો  આંતરિક વિખવાદ વધે 

સૂત્રોના જણાવ્યા અનુસાર શિંદેએ નાયબ મુખ્યમંત્રી પદ માટે પોતાના પુત્ર શ્રીકાંત શિંદેનું નામ સૂચવ્યું છે. શ્રીકાંત શિંદેના અનુભવને ધ્યાનમાં લેતાં ભાજપ આ અંગે ખચકાટ અનુભવે છે. ભાજપને એવું પણ લાગે છે કે આમ કરવાથી વંશવાદની રાજનીતિના આરોપો લાગી શકે છે. ઉપરાંત, શિંદે જૂથના ઘણા વરિષ્ઠ નેતાઓ અસંતોષ વ્યક્ત કરી શકે છે, જે આંતરિક વિખવાદ તરફ દોરી શકે છે.

જો શ્રીકાંત શિંદે નાયબ મુખ્યમંત્રી બનશે તો તેમણે અજિત પવાર જેવા અનુભવી નેતાઓ સાથે કામ કરવું પડશે. આ બંને વચ્ચેની સરખામણી શિવસેનાના જૂથની છબીને નબળી બનાવી શકે છે. ભાજપના વ્યૂહરચનાકારોને પણ આશંકા છે કે શ્રીકાંતની આક્રમક રાજકીય શૈલી સરકારમાં સમસ્યા ઊભી કરી શકે છે.

શિંદેની લોકપ્રિયતા અને વિશ્વસનીયતા ભાજપ માટે મોટી સંપત્તિ

ભાજપ પોતાની સરકારમાં એકનાથ શિંદેને મહત્વપૂર્ણ માને છે. છેલ્લા એક વર્ષમાં શિંદે મહારાષ્ટ્રમાં મરાઠા સમુદાયના અગ્રણી ચહેરા તરીકે ઉભરી આવ્યા છે. કાર્યકર્તા મનોજ જરાંગે પાટીલ જેવા મરાઠા નેતાઓ સાથેના તેમના જોડાણે તેમની સ્થિતિ મજબૂત કરી છે. મરાઠાઓમાં શિંદેની લોકપ્રિયતા અને વિશ્વસનીયતા ભાજપ માટે મોટી સંપત્તિ છે. મરાઠા અનામત મુદ્દે ભવિષ્યમાં વિરોધ કે અશાંતિના કિસ્સામાં, ભાજપને લાગે છે કે શિંદેની ભૂમિકા સરકાર માટે ફાયદાકારક રહેશે.

આ પણ વાંચો: મહારાષ્ટ્રમાં અજિતને 'લોટરી'! ડે.સીએમ સાથે નાણા મંત્રાલયની ઓફર પણ શિંદેને ભાજપનો ઝટકો!

ડેપ્યુટી સીએમના બદલે અનેક મોટા વિભાગોની માગ

શિંદે નાયબ મુખ્યમંત્રીનું પદ સ્વીકારવા તૈયાર નથી, પરંતુ બદલામાં તેમણે ગૃહ, શહેરી વિકાસ અને જાહેર બાંધકામ જેવા મહત્ત્વના વિભાગોની માગણી કરી છે. આ મંત્રાલયોને સરકારમાં સૌથી મહત્વપૂર્ણ ગણવામાં આવે છે. ભાજપ આ માગણીઓ પર વિચાર કરી રહી છે, પરંતુ હજુ સુધી એ સ્પષ્ટ નથી થયું કે આ માગણીઓ સ્વીકારવામાં આવશે કે નહીં.

શિંદેની ગેરહાજરી ભાજપ માટે મોટો પડકાર

એકનાથ શિંદેની ભૂમિકા માત્ર મહાગઠબંધન સરકારમાં મંત્રી પદ સુધી મર્યાદિત નથી. તેમને મરાઠા સમુદાય સાથે જોડવા માટે એક મહત્વપૂર્ણ કડી માનવામાં આવે છે. મુખ્યમંત્રી તરીકેના તેમના કાર્યકાળ દરમિયાન, શિંદેએ ભાજપને શિવસેનામાં વિભાજન અને મરાઠા વિરોધ જેવી મુશ્કેલ પરિસ્થિતિઓનો સામનો કરવામાં મદદ કરી હતી. તેમની ગેરહાજરી ભાજપ માટે મોટો પડકાર બની શકે છે. ઉપરાંત, શિંદેનું પીછેહઠ અજિત પવારને વધુ હિંમત આપી શકે છે જેમણે મહાયુતિ ગઠબંધનમાં પહેલેથી જ પોતાનું સ્થાન મજબૂત કરી લીધું છે.