1 ઑક્ટોબરથી રેલવેનું મોટું મેગા ચેકિંગ: માત્ર ટિકિટથી કામ નહીં ચાલે, આ દસ્તાવેજો સાથે રાખવા ફરજિયાત

Central Railway Ticket Checking : ઑક્ટોબરમાં ટ્રેનમાં મુસાફરી કરતાં હોવ તો ટિકિટની સાથે જરૂરી દસ્તાવેજો રાખવા પડશે. સેન્ટ્રલ રેલવે દ્વારા 1 ઑક્ટોબરથી 31 ઑક્ટોબર 2026 સુધી ખાસ ટિકિટ ચેકિંગ અભિયાન ચલાવવામાં આવશે. આ દરમિયાન માત્ર ટિકિટ જ નહીં, પરંતુ ટિકિટના આધારે મુસાફરી કરવાની તમારી પાત્રતા અને જરૂરી ઓળખપત્રની પણ તપાસ થઈ શકે છે. ખાસ કરીને કન્સેશન, નિર્ધારિત રિઝર્વેશન કોટા, ઈ-પાસ અથવા પ્રિવિલેજ ટિકિટ ઑર્ડર(PTO)ના આધારે મુસાફરી કરતાં મુસાફરોએ સાવચેત રહેવું પડશે. આવા મુસાફરો પાસે મુસાફરી દરમિયાન નિયમ મુજબનું મૂળ ઓળખપત્ર અને જરૂરી દસ્તાવેજો હોવા જરૂરી છે.

કયા મુસાફરોની થશે તપાસ?

સેન્ટ્રલ રેલવેના જણાવ્યા મુજબ, કન્સેશન અથવા નિર્ધારિત રિઝર્વેશન કોટા હેઠળ ટિકિટ મેળવનારા મુસાફરોની ઓળખ અને પાત્રતા ચકાસવામાં આવી શકે છે. જો એક જ ટિકિટ પર એકથી વધુ મુસાફરો મુસાફરી કરતાં હોય, તો નિયમ મુજબ ઓછામાં ઓછા એક મુસાફર પાસે જરૂરી ઓળખપત્ર હોવું જોઈએ. રેલવેના નિયમો અનુસાર, PTO રેલવેના પાત્ર કર્મચારીઓ અને તેમના પરિવારજનો માટે આપવામાં આવતી કન્સેશન સુવિધા છે. સેન્ટ્રલ રેલવેના દસ્તાવેજ મુજબ PTO હેઠળ ટિકિટ માટે મૂળ ભાડાના એક તૃતીયાંશ જેટલું ભાડું લેવામાં આવે છે.

દસ્તાવેજ ન હોય તો શું થશે?

જો ચેકિંગ દરમિયાન જરૂરી મૂળ દસ્તાવેજ રજૂ ન કરી શકાય, તો લાગુ નિયમો મુજબ મુસાફરને માન્ય ટિકિટ વિના મુસાફરી કરનાર ગણવામાં આવી શકે છે. એટલે કન્સેશન અથવા ખાસ કોટા હેઠળની ટિકિટ હોય તો માત્ર ટિકિટ રાખવી પૂરતી ન પણ હોય. ઈ-પાસ અથવા PTOથી મુસાફરી કરનારા મુસાફરોએ પણ મૂળ ઓળખપત્ર સાથે રાખવું પડશે. મુસાફરી શરૂ કરતાં પહેલાં ઈ-પાસ અથવા PTOને નિયમ મુજબ અધિકૃત પ્રક્રિયા હેઠળ ટિકિટ ઇશ્યુ થયેલી હોય તે જરૂરી છે.

કયું ઓળખપત્ર માન્ય રહેશે?

રેલવેની નિયમાવલી મુજબ મુસાફરી દરમિયાન ઓળખ માટે આધાર કાર્ડ, મતદાર ઓળખપત્ર, પાસપોર્ટ, પાન કાર્ડ, ડ્રાઇવિંગ લાઇસન્સ, કેન્દ્ર અથવા રાજ્ય સરકારનું ફોટો ઓળખપત્ર, વિદ્યાર્થી ઓળખપત્ર, ફોટોવાળી રાષ્ટ્રીયકૃત બૅંક પાસબુક અને લેમિનેટેડ ફોટોવાળું ક્રેડિટ કાર્ડ જેવા દસ્તાવેજો માન્ય હોઈ શકે છે. જોકે, કન્સેશન અથવા ખાસ કોટા સાથે જોડાયેલી ટિકિટમાં માત્ર ઓળખપત્ર પૂરતું ન હોય અને પાત્રતા સાબિત કરતાં વધારાના દસ્તાવેજો પણ જરૂરી બની શકે છે.

અનારક્ષિત ટિકિટની પણ તપાસ થશે

આ અભિયાન દરમિયાન અનારક્ષિત ટિકિટ પર મુસાફરી કરતાં મુસાફરોની પણ તપાસ કરવામાં આવશે. જરૂર પડે ત્યારે ટિકિટની વિગતો ચકાસવા માટે રેલવેના TTE એપનો ઉપયોગ પણ થઈ શકે છે. સેન્ટ્રલ રેલવે મુજબ આ અભિયાનનો મુખ્ય હેતુ ટિકિટ અને રિઝર્વેશનમાં થતી ગેરરીતિઓ અટકાવવી, આવકનું નુકસાન ઘટાડવું અને કન્સેશન, પાસ તથા અન્ય રેલવે સુવિધાઓના દુરુપયોગ પર રોક લગાવવાનો છે.