સંસદ માર્ચમાં વિદ્યાર્થી પર પેલેટ ગન ચલાવનારા RAF જવાનની ઓળખ થઇ, 7 રાઉન્ડ કર્યુ ફાયરિંગ

CRPF Probe Pellet Gun Firing : નીટ પેપર લીક વિરોધ પ્રદર્શન અને સંસદ માર્ચ દરમિયાન પ્રદર્શનકારીઓ પર પેલેટ ગનના ઉપયોગના મામલે સેન્ટ્રલ રિઝર્વ પોલીસ ફોર્સ(CRPF)ની તપાસમાં મોટો ખુલાસો થયો છે. તપાસ ટીમ દ્વારા તે રેપિડ એક્શન ફોર્સ(RAF)ના જવાનની ઓળખ કરી લેવામાં આવી છે, જેણે પ્રદર્શન દરમિયાન પેલેટ ગનથી ફાયરિંગ કર્યું હતું.

7 રાઉન્ડ ફાયર થયા હતા

CRPFના સૂત્રોના જણાવ્યા અનુસાર, તપાસમાં સામે આવ્યું છે કે સંબંધિત જવાન દ્વારા કુલ 7 રાઉન્ડ ફાયર કરવામાં આવ્યા હતા. આમાંથી 5 રાઉન્ડ પ્રદર્શનકારીઓને વાગ્યા હતા, જ્યારે 2 રાઉન્ડ જમીન પર વાગ્યા હતા. આ તમામ ફાયરિંગ કનૉટ પ્લેસ વિસ્તારમાં થયું હતું. હવે તપાસ ટીમ એ પણ શોધી રહી છે કે કઈ પરિસ્થિતિઓમાં પેલેટ ગનનો ઉપયોગ કરવામાં આવ્યો હતો અને ફાયરિંગ કયા-કયા સ્થળોએ થયું હતું. આ મામલે તપાસ રિપોર્ટ આગામી 1 અઠવાડિયામાં આવવાની સંભાવના છે. જેના આધારે આગળની કાર્યવાહી કરવામાં આવશે.

RAFની ટીમે આંતરિક તપાસ હાથ ધરી

ઉલ્લેખનીય છે કે 20 જુલાઈએ સંસદ માર્ચ દરમિયાન હિંસા ફાટી નીકળ્યા બાદ પોલીસે લાઠીચાર્જ અને ટીયર ગેસના શેલ છોડ્યા હતા. વિદ્યાર્થીઓ દ્વારા પેલેટ ગનનો ઉપયોગ કરવાનો આરોપ લગાવવામાં આવ્યો હતો. જેને દિલ્હી પોલીસે અગાઉ નકાર્યો હતો. જો કે, સફદરજંગ હૉસ્પિટલે એક ઘાયલના શરીરમાં પેલેટની ઈજાઓની પુષ્ટિ કરી હતી. આ ઘટના બાદ RAFની મહાનિરીક્ષક સીમા ધૂંડિયાની અધ્યક્ષતામાં મળેલી બેઠકમાં દિલ્હીમાં આગામી આદેશ સુધી પ્રોજેક્ટાઈલ એક્શન ગન, એન્ટી રાયટ ગન અને ઈલેક્ટ્રિક શૉક હથિયારોના ઉપયોગ પર રોક લગાવવાના નિર્દેશો આપવામાં આવ્યા છે.