સેલ્ફીની ઘેલછા ભારે પડી, પુણેમાં પિકનિક મનાવતા 3 મિત્રો ડેમમાં ડૂબી જતાં કરુણાંતિકા

Pune 3 Friend Died in Dam | મહારાષ્ટ્રના પુણે જિલ્લામાં પિકનિક મનાવવા ગયેલા મિત્રોની ખુશી ક્ષણભરમાં માતમમાં ફેરવાઈ ગઈ હતી. માવલ તાલુકાના નવલખ ઉમ્બ્રે ગામ પાસે આવેલા જાદવવાડી ડેમ પર શુક્રવારે બપોરે સેલ્ફી લેતી વખતે ત્રણ યુવાનોના ડૂબી જવાથી કરુણ મોત નીપજ્યા છે.

કેવી રીતે સર્જાઈ દુર્ઘટના?

આ ઘટના શુક્રવારે બપોરે આશરે 3:00 વાગ્યે જાદવવાડી ડેમ પર બની હતી. પુણેના ભોસારી વિસ્તારમાંથી છ મિત્રોનું એક જૂથ પિકનિક મનાવવા માટે અહીં આવ્યું હતું. પોલીસના જણાવ્યા અનુસાર, જૂથના ચાર સભ્યો ઘૂંટણ સુધીના પાણીમાં ઉભા રહીને એકબીજાના ગળે હાથ નાખીને સેલ્ફી લઈ રહ્યા હતા.

એક લપસ્યો અને બધા ડૂબ્યા

સેલ્ફી લેતી વખતે કિનારે ઉભેલા એક મિત્રનો પગ લપસ્યો અને તે ઊંડા પાણીમાં પડ્યો. ચારેય મિત્રોએ એકબીજાના ગળે હાથ નાખ્યા હોવાથી, તેઓ સાંકળની જેમ એક પછી એક ઊંડા પાણીમાં ખેંચાતા ગયા. આ ઘટના સમયે થોડે દૂર ઉભેલો જૂથનો અન્ય એક મિત્ર તરત જ દોડી આવ્યો હતો. તે પાણીમાં ડૂબી રહેલા ચાર મિત્રો પૈકી એકને બહાર કાઢવામાં સફળ રહ્યો હતો, પરંતુ બાકીના ત્રણ મિત્રો ઊંડા પાણીમાં ગરકાવ થઈ ગયા હતા.

બચાવ કામગીરી અને મૃતકોની ઓળખ

દુર્ઘટનાની જાણ થતા જ સ્થાનિક પોલીસ, વન્યજીવ રક્ષક માવલ સંસ્થા, શિવદુર્ગ બચાવ દળ અને નેશનલ ડિઝાસ્ટર રિસ્પોન્સ ફોર્સ (NDRF) ની ટીમ ઘટનાસ્થળે પહોંચી હતી. સર્ચ ઓપરેશન બાદ ત્રણેય યુવાનોના મૃતદેહ બહાર કાઢવામાં આવ્યા હતા.

મૃતકોના નામ:

1. અજય ગરુડે

2. સંતોષ એડકે

3. અનિકેત પવાર