- ભારતીય રાજકારણના ઈતિહાસમાં અનેરો દિવસ
- પીએમ મોદીએ ગુજરાતના મુખ્યમંત્રી તરીકે 13 વર્ષ અને વડાપ્રધાન તરીકે 12 વર્ષ શાસન સંભાળ્યું
- સતત ત્રણ વિધાનસભા અને ત્રણ લોકસભા ચૂંટણી જીતવાનો રેકોર્ડ પણ મોદીના નામે
નવી દિલ્હી: વડાપ્રધાન નરેન્દ્ર મોદીએ રવિવારે કોઈપણ સરકારના વડા તરીકે સૌથી વધુ દિવસ શાસન કરવાની સિદ્ધિ મેળવીને ભારતના રાજકારણમાં ઈતિહાસ રચ્યો છે. પીએમ મોદીએ ૧૩ વર્ષ સુધી ગુજરાતના મુખ્યમંત્રી અને ૧૨ વર્ષથી દેશના વડાપ્રધાન તરીકે શાસન સંભાળ્યું છે. અગાઉ આ રેકોર્ડ સિક્કિમના ભૂતપૂર્વ મુખ્યમંત્રી પવન કુમાર ચામલિંગના નામે હતો, જેમણે ૮,૯૩૦ દિવસ સુધી કોઈ સરકારના વડા તરીકે કામ કર્યું હતું. વડાપ્રધાન મોદીને આ ઈતિહાસ રચવા બદલ સાથી કેબિનેટ મંત્રીઓ સહિત સેલિબ્રિટીઓ અને જનતાએ અભિનંદન પાઠવ્યા હતા.
વડાપ્રધાન નરેન્દ્ર મોદીએ સરકારના વડા તરીકે સૌથી લાંબો સમય શાસન કરવાનો રેકોર્ડ કરતા ૨૫મા વર્ષમાં પ્રવેશ કર્યો છે. તેમણે ૭ ઑક્ટોબર ૨૦૦૧ના રોજ ગુજરાતના મુખ્યમંત્રી તરીકે શાસનની ધૂરા સંભાળી હતી. તેમણે ૨૧ મે, ૨૦૧૪ સુધી મુખ્યમંત્રીપદ સંભાળ્યું હતું. ત્યાર પછી મે ૨૬, ૨૦૧૪માં તેઓ વડાપ્રધાન બન્યા અને હજુ સુધી આ પદ પર શાસન કરી રહ્યા છે. આમ પીએમ મોદીએ ૨૦૦૧માં સરકારના વડા તરીકેનું પદ સંભાળ્યા પછી સતત ૮,૯૩૧ દિવસથી હેડ ઓફ ગવર્મેન્ટ તરીકે કામ કરી રહ્યા છે. તેમની આ સિદ્ધિ દાયકાઓ સુધી સતત નેતૃત્વ, જનસમર્થન અને રાજકીય સ્થિરતાની સ્થિતિ પણ રજૂ કરે છે.
પીએમ મોદીએ કોઈ સરકારના વડા તરીકે સૌથી વધુ દિવસ સુધી શાસન કરવાની સાથે અન્ય અનેક સિદ્ધિઓ મેળવી છે. તેઓ ગુજરાતના સૌથી લાંબો સમય સુધી મુખ્યમંત્રી રહેનારા એકમાત્ર નેતા છે. આ સિવાય ભારતીય રાજકારણમાં પીએમ મોદી સંભવતઃ એકમાત્ર એવા નેતા છે, જેમણે એક રાજ્યના મુખ્યમંત્રી તરીકે સતત ત્રણ ૨૦૦૨, ૨૦૦૭ અને ૨૦૧૨ની વિધાનસભા ચૂંટણી જીતી અને સતત ત્રણ વખત ૨૦૧૪, ૨૦૧૯ અને ૨૦૨૪માં લોકસભા ચૂંટણીમાં જીતવાનો ઈતિહાસ રચ્યો છે. કોઈપણ સરકારના વડા તરીકેની તેમની આ સિદ્ધિ ગરીબોને અધિકારો આપવા અને વૈશ્વિક સ્તરે ભારતને ગૌરવ અપાવવામાં રાષ્ટ્ર પ્રથમ પ્રત્યેની તેમની ઊંડી કટિબદ્ધતા દર્શાવે છે.
સંરક્ષણ મંત્રી રાજનાથ સિંહે જણાવ્યું કે, નરેન્દ્ર મોદીનું સંપૂર્ણ જીવન દેશ અને દેશવાસીઓની સેવામાં સમર્પિત છે. ગુજરાતના મુખ્યમંત્રીથી લઈને દેશના વડાપ્રધાન સુધીનો આ પ્રવાસ અદ્વિતિય રહ્યો છે.
કેન્દ્રીય ગૃહમંત્રી અમિત શાહે પીએમ મોદીની ૨૪ વર્ષની અટૂટ સેવાની પ્રશંસા કરી હતી.
