જૂના વાહનો પર એક્શનની તૈયારી, દિલ્હીમાં 2.5 લાખ ગાડીઓની ફિટનેસ ચેક કરાશે; કેન્દ્રીય મંત્રીની બેઠકમાં મોટો નિર્ણય

Delhi NCR Pollution Review High Level Meeting: કેન્દ્રીય મંત્રી ભૂપેન્દ્ર યાદવની અધ્યક્ષતામાં દિલ્હી અને NCR માં પ્રદૂષણને લઈને એક બેઠક યોજાઈ હતી, જેમાં પાયાના અનેક મુદ્દાઓ પર ચર્ચા કરવામાં આવી. રાજ્ય મંત્રી મનજિંદર સિંહ સિરસાએ જણાવ્યું કે, પ્રદૂષણ નિયંત્રણ માટે એક વ્યાપક યોજના પર કામ ચાલી રહ્યું છે. આ સાથે જ ઇલેક્ટ્રિક બસોની સંખ્યા વધારવા અને શિયાળા માટે ખાસ વ્યવસ્થા કરવાની વાત પણ કહી.

પ્રદૂષણ સામે કાર્યવાહીની યોજના પર ચર્ચા

રાજ્ય મંત્રી મનજિંદર સિંહ સિરસાએ કહ્યું, 'આજે કેન્દ્રીય મંત્રી ભૂપેન્દ્ર યાદવની અધ્યક્ષતામાં દિલ્હી અને NCR માં પ્રદૂષણને લઈને એક બેઠક યોજાઈ હતી, જેમાં દિલ્હીના મુખ્યમંત્રી રેખા ગુપ્તા, દિલ્હી PWD ના પ્રવેશ વર્મા સામેલ થયા હતા. આમાં પ્રદૂષણ સામે નક્કર કાર્યવાહીની યોજના પર ચર્ચા કરવામાં આવી. તેમણે જણાવ્યું કે, અમે NCR માં પ્રદૂષણ ઘટાડવા અને આ પ્રયાસોમાં દિલ્હી તથા NCR ની ભૂમિકા પર વાત કરી.'

નવી પોલિસી પર બેઠકમાં ચર્ચા

બેઠકમાં સૂચવવામાં આવેલા પગલાં વિશે માહિતી આપતા તેમણે કહ્યું, 'અમારી 'નો PUCC, નો ફ્યુઅલ' પોલિસીને વધુ કડક રીતે લાગુ કરવામાં આવશે. દિલ્હીના તમામ 500 પેટ્રોલ પંપો પર, જ્યાં ANPR કેમેરા લાગેલા છે, ત્યાં આ નિયમ લાગુ થશે. આ સાથે જ 'એન્ડ-ઓફ-લાઈફ' (પોતાની આયુષ્ય કે સમયમર્યાદા પૂરી કરી ચૂકેલા) વાહનો સામે કડક અભિયાન ચલાવવામાં આવશે. આ માટે ઓક્ટોબરમાં જન-જાગૃતિ અભિયાન શરૂ કરાશે અને નવેમ્બરમાં PUC સેન્ટરોને અપગ્રેડ કરવામાં આવશે. ત્રણ ઓટોમેટેડ ટેસ્ટિંગ સ્ટેશનો દ્વારા 2.5 લાખ વાહનોની ફિટનેસ તપાસવામાં આવશે.'

દિલ્હીને વધુ 150 ઈ-બસો મળશે

સિરસાએ જણાવ્યું કે, દિલ્હીમાં હાલ 588 ઇલેક્ટ્રિક બસો ચાલી રહી છે. જેમાં વધુ 150 બસો ઉમેરવામાં આવશે. તેમણે 11 જિલ્લાધિકારીઓની કચેરીઓની મુલાકાત લઈને પ્રદૂષણ હોટસ્પોટના 3 કિલોમીટરના દાયરામાં થતી પ્રવૃત્તિઓની સમીક્ષા કરી હતી. 62 ચિહ્નિત પ્રદૂષણ હોટસ્પોટમાંથી 42 પર પ્રદૂષણ સ્તર નિયંત્રિત કરી દેવામાં આવ્યું છે. બાકીના હોટસ્પોટ પર પણ કામ ચાલુ છે. શ્મશાન ગૃહ, ડમ્પિંગ સાઇટ અને બાંધકામ સ્થળો જેવા ચોક્કસ સ્થળો પર ખાસ ધ્યાન આપવામાં આવી રહ્યું છે. જિલ્લાધિકારીઓ મારફતે આ મુદ્દાઓનો અસરકારક રીતે નિકાલ કરવામાં આવી રહ્યો છે.

અન્ય પહેલ અને શિયાળાની તૈયારીઓ

રસ્તાઓના કિનારેથી ઊડતી ધૂળને રોકવા માટે 'બ્રાઉન પેચ' અને હરિયાળી વિકસાવવામાં આવશે. આ એક જનભાગીદારી અભિયાન હેઠળ થશે. રસ્તાઓની ઊંડાણપૂર્વક સફાઈ કરવાની પ્રક્રિયા પણ શરૂ કરવામાં આવી છે, જે દર પંદર દિવસે કરવામાં આવશે. 'ઝીરો બર્નિંગ' પહેલ હેઠળ આ વખતે 'હિટિંગ સ્પોટ' બનાવવામાં આવશે. અસ્થાયી આશ્રયસ્થાનોમાં ઠંડીથી બચવા માટે હિટીંગની વ્યવસ્થા કરવામાં આવશે.