PM Modi gifts Giorgia Meloni: રાજદ્વારી સંબંધોમાં વૈશ્વિક પ્રોટોકોલની સાથે આત્મીયતા અને સાંસ્કૃતિક ગૌરવ ભળે છે, ત્યારે મુલાકાતો માત્ર ઔપચારિક નથી રહેતી, પણ યાદગાર બની જાય છે. વડાપ્રધાન નરેન્દ્ર મોદી તાજેતરમાં જ યુએઈ, નેધરલૅન્ડ, સ્વીડન, નોર્વે અને ઈટાલી સહિતના 5 દેશોના પ્રવાસથી પરત ફર્યા છે. આ પ્રવાસ દરમિયાન તેમણે વૈશ્વિક નેતાઓને ભારતની પ્રાચીન કલા, સમૃદ્ધ વારસો અને સ્વાદની એવી અનોખી સોગાદો આપી, જેની ચર્ચા આજે સોશિયલ મીડિયાથી લઈને આંતરરાષ્ટ્રીય સ્તરે થઈ રહી છે.
સોશિયલ મીડિયા પર વાયરલ થઈ 'મેલોડી' અને 'મેલોની'ની જુગલબંદી
વડાપ્રધાન મોદીની આ મુલાકાતનો સૌથી રસપ્રદ કિસ્સો ઈટાલીના વડાપ્રધાન જ્યોર્જિયા મેલોની સાથે જોડાયેલો રહ્યો. સોશિયલ મીડિયા પર બંને નેતાઓનો એક વીડિયો જોરદાર વાયરલ થયો, જેમાં વડાપ્રધાન મોદીએ ઈટાલીના વડાપ્રધાન મેલોનીને ભારતની પ્રખ્યાત 'મેલોડી ટોફી'નું પેકેટ ભેટમાં આપ્યું હતું. આ હળવાશભરી અને મીઠી ક્ષણે ઇન્ટરનેટ યુઝર્સના દિલ જીતી લીધા હતા.
આ મીઠાશ ઉપરાંત, વડાપ્રધાન મોદીએ ભારતીય કલાની ભવ્યતા દર્શાવતી અન્ય ખાસ વસ્તુઓ પણ ઈટાલીના નેતાઓને અર્પણ કરી હતી.
ઈટાલીના વડાપ્રધાનને આસામ અને મણિપુરની સિલ્ક સોગાદ
ઈટાલી ફેશન અને વૈભવી કાપડ માટે જાણીતું છે, તેથી વડાપ્રધાન મોદીએ ઈટાલીના વડાપ્રધાન જ્યોર્જિયા મેલોનીને ભારતની બે અજોડ સિલ્ક ભેટો આપી.
આસામનું શાહી 'મુગા સિલ્ક' સ્ટોલ: આ કાપડ તેની કુદરતી સોનેરી ચમક માટે વિશ્વભરમાં પ્રખ્યાત છે. અહોમ રાજવંશ(1228-1826)ના સમયથી આ રેશમ માત્ર રાજવીઓ માટે જ અનામત રાખવામાં આવતું હતું. તેની ખાસિયત એ છે કે તેને કોઈ કૃત્રિમ રંગ વગર તૈયાર કરવામાં આવે છે અને સમય સાથે તેની ચમક વધુ ઘાટી બને છે. વર્ષ 2007માં તેને GI ટેગ મળ્યો હતો. ભારત આખા વિશ્વમાં મુગા સિલ્કનું સૌથી મોટું ઉત્પાદક છે, જેમાં આસામ એકલું 95% હિસ્સો ધરાવે છે. રસપ્રદ વાત એ છે કે, જાપાન આ સિલ્કનો મોટો આયાતકાર છે, જ્યાં તેનો ઉપયોગ પરંપરાગત 'કિમોનો' ડ્રેસ બનાવવા થાય છે.
મણિપુરનું 'શિનરુઈ લિલી' સિલ્ક સ્ટોલ: આ સ્ટોલ મણિપુરના શિનરુઈ કાશોંગ શિખર પર ઉગતા એક અત્યંત દુર્લભ ફૂલથી પ્રેરિત છે. તાંગખુલ નાગા સમુદાય માટે આ ફૂલ પવિત્રતા અને ગૌરવનું પ્રતીક છે. ખાસ વાત એ છે કે લિલીનું ફૂલ ઈટાલિયન પુનરુજ્જીવન(Renaissance) કલામાં પણ સુંદરતાનું પ્રતીક ગણાય છે, જે બંને દેશોના સાંસ્કૃતિક તાર જોડે છે.
ઈટાલીના રાષ્ટ્રપતિને આગ્રાની પિએટ્રા ડુરા કલા અને સંગીતની ભેટ
વડાપ્રધાન મોદીએ ઈટાલીના રાષ્ટ્રપતિ સર્જિયો મેટારેલાને આગ્રાના માસ્ટર કારીગરો દ્વારા હાથથી તૈયાર કરાયેલું એક કિંમતી સફેદ આરસપહાણનું (માર્બલ) બોક્સ ભેટ આપ્યું. આ બોક્સ પર 'પિએટ્રા ડુરા' એટલે કે જડતર કામની પ્રાચીન કલાનો ઉપયોગ કરીને લેપિસ લાઝુલી, પીરોજ, માલાકાઇટ અને મોતી જેવા અર્ધ-કિંમતી પથ્થરોથી સુંદર ફ્લોરલ પેટર્ન કંડારવામાં આવી છે.
આ પણ વાંચો: પેટ્રોલ પંપ પર ઈંધણ આપવાની ના પાડી તો ખેર નથી! સરકારે આપ્યો કડક આદેશ
આ સુંદર માર્બલ બોક્સની અંદર ભારતીય શાસ્ત્રીય સંગીતની ધરોહર સમાન બે મહાનુભાવો ભારત રત્ન ‘પંડિત ભીમસેન જોશી’ અને સંયુક્ત રાષ્ટ્ર(UN)માં પરફોર્મ કરનાર પ્રથમ ભારતીય સંગીતકાર ભારત રત્ન ‘એમ.એસ. સુબ્બુલક્ષ્મી’ની અમર સંગીત રચનાઓનો સમાવેશ કરવામાં આવ્યો છે.
યુએઈના રાષ્ટ્રપતિ માટે ભારતીય સ્વાદ: કેસર કેરી
સાંસ્કૃતિક ભેટોની સાથે સાથે ભારતના સ્વાદની સુવાસ પણ વિદેશમાં ફેલાઈ. વડાપ્રધાન મોદીએ સંયુક્ત આરબ અમીરાત(UAE)ના રાષ્ટ્રપતિ શેખ મોહમ્મદ બિન ઝાયેદ અલ નાહ્યાનને ભારતીય ફળોના રાજા ગણાતી પ્રખ્યાત 'કેસર કેરી' ભેટમાં આપીને બંને દેશોના સંબંધોમાં વધુ મીઠાશ ઉમેરી હતી.
વડાપ્રધાન મોદીના આ પાંચ દેશોના પ્રવાસે માત્ર રાજદ્વારી પ્રોટોકોલ જ પૂરા નથી કર્યા, પરંતુ ભારતના સ્થાનિક કારીગરોની કલા અને 'વોકલ ફોર લોકલ' ના મંત્રને વૈશ્વિક મંચ પર એક નવી ઓળખ આપી છે. ભેટમાં અપાયેલી આ દરેક વસ્તુ ભારતની વૈવિધ્યસભર એકતા અને ભવ્ય ઇતિહાસની સાક્ષી પૂરે છે.
