'PM મોદીનું સંબોધન રાજકીય...', કોંગ્રેસ અધ્યક્ષ ખડગેના આકરા પ્રહાર, જનતાને ગેરમાર્ગે દોરતા હોવાનો આરોપ

PM Modi Address The Nation, Kharge Allegations: મહિલા અનામત બિલ લોકસભામાં પસાર ન થતાં આજે શનિવારે વડા પ્રધાન નરેન્દ્ર મોદીએ રાષ્ટ્ર જોગ સંબોધન કર્યું હતું, જેમાં તેમાં કોંગ્રેસ સહિત તમામ વિપક્ષના પક્ષો પર આકરા શાબ્દિક પ્રહાર કર્યા હતા. જેના જવાબમાં કોંગ્રસ અધ્યક્ષ મલ્લિકાર્જુન ખડગેએ પણ કેન્દ્ર સરકાર પર વળતો પલટવાર કરતાં કહ્યું છે કે 'છેલ્લા 12 વર્ષમાં બતાવવા જેવું કંઈ સાર્થક ન હોવાથી હતાશ અને નિરાશ થયેલા વડા પ્રધાન નરેન્દ્ર મોદીએ રાષ્ટ્રને સંબોધવાના સત્તાવાર કાર્યક્રમને રાજકીય ભાષણમાં ફેરવી નાખ્યો, જે કાદવ ઉછાળવા અને સંપૂર્ણ જૂઠાણાંથી ભરેલું હતું. આદર્શ આચારસંહિતા અમલમાં હોવા છતાં, પીએમ મોદીએ તેમના વિરોધીઓ પર હુમલો કરવા માટે સરકારી મશીનરીનો કેવી રીતે દુરુપયોગ કર્યો તે સ્પષ્ટ હતું. આ લોકશાહી અને ભારતના બંધારણની વિડંબના છે.'

મહિલા કરતાં કોંગ્રેસ શબ્દનો સૌથી વધુ ઉપયોગ

ખડગે કટાક્ષ કર્યો કે, મોદીજીએ 59 વખત કોંગ્રેસનો ઉલ્લેખ કર્યો અને મહિલાઓનો ભાગ્યે જ ઉલ્લેખ કર્યો. તે દેશને તેમની પ્રાથમિકતાઓ વિશે બધું જ કહી દે છે. મહિલાઓ ભાજપની પ્રાથમિકતા નથી. કોંગ્રેસ છે, કારણ કે કોંગ્રેસ ઈતિહાસની સાચી બાજુ પર ઉભી છે.

'કોંગ્રેસે મહિલા અનામતનું સમર્થન કર્યું છે'

'કોંગ્રેસે હંમેશા મહિલા અનામતનું સમર્થન કર્યું છે. અમે તે પક્ષ હતા જેણે 2010 માં રાજ્યસભામાં મહિલા અનામત બિલ પસાર કર્યું હતું જેથી તે રદ ન થાય. ભાજપ તે બિલ લોકસભામાં પસાર કરાવી શક્યું નથી. તેઓ 2023માં બીજું બિલ લાવ્યા અને કોંગ્રેસ પાર્ટીએ તેને પણ ટેકો આપ્યો. તે બિલ હજુ પણ અસ્તિત્વમાં છે. હકીકતમાં, તે 16 એપ્રિલના રોજ સૂચિત કરવામાં આવ્યું હતું, જ્યારે લોકસભા આ સીમાંકન બંધારણીય સુધારા બિલો પર ચર્ચા કરી રહી હતી. આ કામ એ જ વડાપ્રધાન દ્વારા કરવામાં આવ્યું હતું. ભાજપને પોતાનું બિલ નોટિફાય કરવામાં 3 વર્ષ લાગ્યા તે જ ભારતની નારી શક્તિ પ્રત્યેની તેમની પ્રતિબદ્ધતા દર્શાવે છે!

કોંગ્રસ અધ્યક્ષે કયા કયા પોઈન્ટ દેશ સમક્ષ મૂક્યા?

-'મોદીજીએ રાષ્ટ્ર સમક્ષ જૂઠું બોલવાનું બંધ કરવું જોઈએ, તેમણે 2023 ના કાયદા હેઠળ વર્તમાન 543 લોકસભા બેઠકોમાં મહિલાઓ માટે 33% અનામત અમલમાં મૂકવી જોઈએ. હવે મહિલાઓને તેમના યોગ્ય પ્રતિનિધિત્વથી વંચિત ન રાખો.'

-'સીમાંકન બિલો, એટલે કે 3 બંધારણ સુધારા બિલોને મહિલા અનામત બિલ સાથે ભેળવવાનું બંધ કરો. રાષ્ટ્ર સમક્ષ જૂઠું બોલવાનું બંધ કરો કે આ મહિલા અનામત બિલ - નારી શક્તિ વંદન અધિનિયમમાં સુધારો હતો. તે ન હતું. આ શુદ્ધ સીમાંકન બિલ હતું, જે વધુ વિભાજન પેદા કરવા અને ચૂંટણી નકશાને એવી રીતે ફરીથી તૈયાર કરવા લાવવામાં આવ્યું હતું કે જેનો ફાયદો માત્ર ભાજપને જ થઈ શકે.'

-'140 કરોડ ભારતીયોની માફી માંગો. કોંગ્રેસ હંમેશા સુધારા તરફી રહી છે. કોંગ્રેસે હરિયાળી ક્રાંતિ દ્વારા ભારતીય કૃષિમાં પરિવર્તન લાવ્યું, શ્વેત ક્રાંતિ દ્વારા ડેરી વિકાસને મજબૂત બનાવ્યો, આપણું અંતરિક્ષ ક્ષેત્ર બનાવ્યું, ભારતને પરમાણુ શક્તિ બનાવ્યું, 1991 માં અર્થતંત્રનું ઉદારીકરણ કર્યું, મોદીજી સત્તા સંભાળે તે પહેલા 60 કરોડ આધાર કાર્ડ વિતરિત કરવામાં આવ્યા હતા. કોંગ્રેસે RTI, RTE, ફૂડ સિક્યુરિટી એક્ટ, MGNREGA પાસ કર્યા - જેને મોદીજીએ રદ કર્યા.

-'અમે ભારતીય ઈતિહાસમાં કેટલાક સૌથી મહત્વપૂર્ણ મહિલા તરફી કાયદાઓ પસાર કર્યા છે, હિંદુ કોડ બિલ કે જેનો તમારા વૈચારિક પૂર્વજોએ વિરોધ કર્યો હતો, તેનાથી લઈને કાર્યસ્થળ પર જાતીય સતામણી વિરોધી કાયદા, ઘરેલું હિંસા બિલથી લઈને જસ્ટિસ વર્મા કમિટીની ભલામણો પછી ફોજદારી કાયદામાં સુધારા સુધી.'

-'ભાજપ તેની ક્રિયા અને વલણ બંનેમાં મહિલા વિરોધી રહ્યું છે. તેમની પાસે હાથરસ માટે કોઈ જવાબ નથી. ઉન્નાવ માટે તેમની પાસે કોઈ જવાબ નથી. હરિયાણાની મહિલા કુસ્તીબાજો સાથેના વ્યવહાર માટે તેમની પાસે કોઈ જવાબ નથી. તેઓએ પોતાના પક્ષમાં દુષ્કર્મીઓને રક્ષણ આપ્યું છે. તેઓએ બિલ્કીસ બાનો કેસમાં દુષ્કર્મીઓને મુક્ત કર્યા. તેઓએ ગુનેગારો અને દુષ્કર્મીઓને ફૂલહાર કર્યા છે. NCRBના આંકડા પોતે જ દર્શાવે છે કે ભાજપ શાસિત રાજ્યોમાં મહિલાઓ સામેના ગુનાઓ સૌથી વધુ છે.'

આ પણ વાંચો: 'હું તમામ માતા બહેનોની માફી માગું છું, વિરોધ પક્ષે સારા પ્રયાસની ભ્રૂણહત્યા કરી', મહિલા અનામત મુદ્દે PM મોદી

પોસ્ટમાં છેલ્લે કોંગ્રેસ અધ્યક્ષે કહ્યું કે, 'સાડા 12 વર્ષ સત્તામાં રહ્યા પછી, આંતરરાષ્ટ્રીય કટોકટી, ઊંચા ફુગાવા, કથળતી અર્થવ્યવસ્થા, ગગડતા રૂપિયા અને ઊંડી જાહેર મુશ્કેલીઓ વચ્ચે, વડાપ્રધાન પાસે રાષ્ટ્રને આપવા માટે રાજકીય ભાષણ સિવાય બીજું કંઈ ન હતું. આદર્શ આચારસંહિતા અમલમાં હોવા છતાં, તેમણે પોતાની નિષ્ફળતાઓ, પોતાના વિશ્વાસઘાત અને પોતાની ઉદાસીનતા માટે વિપક્ષ, ખાસ કરીને કોંગ્રેસને જવાબદાર ઠેરવવાનું પસંદ કર્યું. છેલ્લે, ભાજપ-RSS દેશને વિભાજિત કરે છે. RSSએ ભારતીયો વિરુદ્ધ બ્રિટિશરોને ટેકો આપ્યો અને તેમને દયાની અરજીઓ લખી. દરેક ભારતીય જાણે છે કે મોદીજીના રાજકીય માસ્ટર્સ RSS મહિલાઓની વિરુદ્ધ છે. તેઓ મનુસ્મૃતિમાં માને છે, જે વિભાજનને પ્રોત્સાહન આપે છે, ભારતના બંધારણને નહીં.'