પાકિસ્તાને રજૂ કર્યો નકલી મોહમ્મદ આસિફ, ભારતીય સેનાએ થોડા કલાકો પહેલાં જ એન્કાઉન્ટરમાં કર્યો હતો ઠાર

Indian Army Kills LeT Commander Hashim Musa: સોશિયલ મીડિયા પર પાકિસ્તાનના પ્રોપેગેન્ડાની ફરીએકવાર પોલ ખૂલી ગઈ છે. જો પ્રોપેગેન્ડા ફેલાવવા અને પોતાની મજાક બનાવવાનો કોઈ એવોર્ડ હોત, તો પાકિસ્તાન તેનો મોટો દાવેદાર હોત. ભારતીય સેનાએ લશ્કર-એ-તૈયબાના આતંકવાદી અને પૂર્વ સ્પેશિયલ સર્વિસ ગ્રુપ (SSG) ના કમાન્ડો મોહમ્મદ આસિફને એન્કાઉન્ટરમાં ઠાર કર્યો હતો, અને સેનાએ તેની તસવીરો પણ જારી કરી હતી. પરંતુ તેના એક દિવસ પછી, પાકિસ્તાને ગુરુવારે ભારતના દાવાને પડકારવા માટે મીડિયા સમક્ષ તેના જેવો દેખાતો એક હમશકલ (નકલી) વ્યક્તિ રજૂ કરવાનો પ્રયાસ કર્યો હતો.

પાકિસ્તાને મોહમ્મદ આસિફ મુદ્દે કર્યો હતો દાવો

ગુરુવારે પાકિસ્તાને એક વ્યક્તિને રજૂ કરીને દાવો કર્યો હતો કે, તે મોહમ્મદ આસિફ છે. તેના થોડા જ કલાકો પહેલાં ભારતે લશ્કર-એ-તૈયબાના આ કમાન્ડરને જમ્મુ-કાશ્મીરમાં એક એન્કાઉન્ટરમાં ઠાર કરવાનો દાવો કર્યો હતો, પરંતુ પાકિસ્તાન આ ઘટના પર પડદો પાડવાનો પ્રયાસ કરી રહ્યું હતું. પાકિસ્તાને તેને SSG નો પૂર્વ કમાન્ડો ગણાવ્યો હતો. બુધવારે સેનાએ જણાવ્યું હતું કે, તેણે જમ્મુ-કાશ્મીરના બડગામ જિલ્લામાં એક એન્કાઉન્ટર દરમિયાન મોહમ્મદ આસિફ (ઉર્ફે હાશિમ મૂસા) ને ઠાર કર્યો છે. જોકે, પાકિસ્તાને જે વ્યક્તિને મોહમ્મદ આસિફ ગણાવ્યો હતો, તે ટૂંક સમયમાં જ શંકાના ઘેરામાં આવી ગયો. સ્વતંત્ર OSINT એકાઉન્ટ્સે તે વ્યક્તિના ચહેરા અને શારીરિક બનાવટમાં કથિત તફાવત બતાવીને પાકિસ્તાનના દાવાને તરત જ ખોટો સાબિત કરી દીધો. આ રીતે ભારતના દાવાને પડકારવા માટે હમશકલ રજૂ કરવાના પાકિસ્તાનના નાપાક પ્રયાસનો પર્દાફાશ થઈ ગયો છે.

પાકિસ્તાનના પ્રોપેગેન્ડાની પોલ ખૂલી

ગુરુવારે એક પ્રેસ કોન્ફરન્સમાં DG ISPR લેફ્ટનન્ટ જનરલ અહમદ શરીફ ચૌધરીએ તે વ્યક્તિને રજૂ કર્યો હતો. મોહમ્મદ આસિફ તરીકે પોતાની ઓળખ આપતાં તેણે દાવો કર્યો હતો કે, તે 2023 માં SSG માંથી હવાલદારના પદ પરથી નિવૃત્ત થયો હતો. તેણે દાવો કર્યો કે, '2000 માં હું પાકિસ્તાની સેનામાં જોડાયો હતો. 2005 માં હું SSG માં સામેલ થયો, 18 વર્ષ સુધી ફરજ બજાવી અને 2023 માં નિવૃત્ત થયો… હું જીવતો છું અને તમારી સામે હાજર છું.'

પાકિસ્તાનના દાવાની પોલ ખુલી ગઈ

ભારતના કોઈ દાવાનો જવાબ આપવા માટે પાકિસ્તાન દ્વારા કોઈ વર્તમાન કે નિવૃત્ત પાકિસ્તાની સૈનિકને કેમેરા સામે લાવવાનું ભાગ્યે જ કોઈ ઉદાહરણ મળે છે. જોકે, પાકિસ્તાન દ્વારા રજૂ કરાયેલા વ્યક્તિની સરખામણી મૂસાની જૂની તસવીરો સાથે કરનારા વિશ્લેષકોએ તેમના ચહેરાની બનાવટમાં અનેક તફાવતો દર્શાવ્યા છે, જેમાં કાન, નાકનો આકાર અને આંખોની સીધ સામેલ છે. રક્ષા નિષ્ણાતો અને ભારતીય સેનાના પૂર્વ અધિકારીઓએ પાકિસ્તાનના પ્રોપેગેન્ડાનો પર્દાફાશ કર્યો છે. મેજર જનરલ હર્ષા કાકર (નિવૃત્ત) એ ટ્વીટ કર્યું, 'હંમેશાની જેમ, પાકિસ્તાને એક નકલી વ્યક્તિ રજૂ કર્યો અને તેનું નામ હાશિમ મૂસા રાખ્યું, જ્યારે તેને ખબર છે કે સત્ય સામે આવી ચૂક્યું છે.'

કોણ હતો MD આસિફ ઉર્ફે હાશિમ મૂસા?

મૂસા પીર પંચાલ વિસ્તાર અને કાશ્મીર ખીણમાં સામાન્ય નાગરિકો અને સુરક્ષા દળો પર થયેલા અનેક જીવલેણ હુમલાઓ પાછળ મુખ્ય માસ્ટરમાઇન્ડ હતો, અને લાંબા સમયથી સુરક્ષા દળોની પકડથી ભાગતો ફરતો હતો. બુધવારે યુસમર્ગમાં એક એન્કાઉન્ટરમાં તે માર્યો ગયો હતો. તે LeT ના એ ચાર આતંકવાદીઓમાંથી એક હતો, જેમના ફોટા 2025 ના પહેલગામ આતંકી હુમલા પછી વાઈરલ થયા હતા, જેમાં 26 હિન્દુ પ્રવાસીઓ માર્યા ગયા હતા. હવે તે ચારેય આતંકીઓ સુરક્ષા દળો સાથે અલગ-અલગ એન્કાઉન્ટરમાં માર્યા ગયા છે.

મૂસા આ જૂથનો છેલ્લો બચેલો સભ્ય હતો. સારી રીતે તાલીમબદ્ધ હોવાને કારણે તે પીર પંચાલ વિસ્તારના મુશ્કેલ રસ્તાઓ પર સરળતાથી ચાલતો હતો, અને વર્ષોથી સુરક્ષા દળોથી બચતો રહ્યો હતો. 2006 થી 2008 વચ્ચે મૂસા પાકિસ્તાનના પૂર્વ રાષ્ટ્રપ્રમુખ પરવેઝ મુશર્રફની સુરક્ષા ટીમનો પણ હિસ્સો રહ્યો હતો. મૂસાનું માર્યા જવું એ ભારતના આતંકવાદ વિરોધી અભિયાન માટે મોટી જીત અને જમ્મુ-કાશ્મીરમાં લશ્કરના નેટવર્ક માટે મોટો ઝટકો છે.