શાળા કે શૈતાનનું ઘર? ઓડિશામાં ધોરણ-7ની બાળકીનું જાતીય શોષણ કરનારા 5 શિક્ષકો ઝડપાયા

Raping Minor in Odisha : ઓડિશાના કેન્દ્રાપાડા જિલ્લામાંથી ગુરુ-શિષ્યના પવિત્ર સંબંધને લજવતો એક અત્યંત શરમજનક કિસ્સો પ્રકાશમાં આવ્યો છે. અહીં એક ખાનગી શાળાના પાંચ શિક્ષકોએ મળીને 13 વર્ષની સગીરા પર સામૂહિક દુષ્કર્મ ગુજાર્યું હોવાની ઘટના સામે આવી છે. આ મામલે પોલીસે પાંચેય આરોપી શિક્ષકોની ધરપકડ કરી લીધી છે.

શું છે સમગ્ર ઘટના?

મળતી માહિતી મુજબ, ભોગ બનનાર સગીરા ધોરણ-7 માં અભ્યાસ કરે છે. બાળકીએ તેના માતા-પિતાને જાણ કરી હતી કે, શાળાના શિક્ષકો લાંબા સમયથી તેનું જાતીય શોષણ કરી રહ્યા છે. આ સાંભળી ચોંકી ઉઠેલા માતા-પિતાએ તાત્કાલિક જિલ્લા બાળ કલ્યાણ સમિતિ (CWC) નો સંપર્ક કર્યો હતો.

બાળ કલ્યાણ સમિતિનો અહેવાલ

બાળ કલ્યાણ સમિતિએ આ મામલે પ્રાથમિક તપાસ હાથ ધરી હતી. સમિતિના સભ્ય સ્વાગતિકા પાત્રાએ જણાવ્યું કે, "અમને 18 ફેબ્રુઆરીએ ફરિયાદ મળી હતી. 48 કલાકની તપાસ બાદ અમે આ મામલો કાયદેસરની કાર્યવાહી માટે પોલીસને સોંપ્યો હતો." સમિતિએ જિલ્લા શિક્ષણ અધિકારીને પણ આ બાબતે અલગથી તપાસ કરવા આદેશ આપ્યો છે.

આ પણ વાંચો : ઓડિશા હાઈવે પર મોતનું તાંડવ : ટ્રેલરે પોલીસ વાહનના ફુરચા ઉડાડ્યા, 5 જવાન શહીદ, 3 ગંભીર

પોલીસ કાર્યવાહી અને ધરપકડ

રાજકનિકા પોલીસ સ્ટેશનના ઇન્સ્પેક્ટર સંજય મલિકે જણાવ્યું કે, સગીરાના પિતા અને બાળ કલ્યાણ સમિતિની ફરિયાદના આધારે શનિવારે પાંચેય આરોપી શિક્ષકોની ધરપકડ કરવામાં આવી છે. પોલીસ હાલ આ મામલે ઊંડી તપાસ કરી રહી છે કે આ રેકેટમાં અન્ય કોઈ સંડોવાયેલું છે કે કેમ.

રાજકીય ગરમાવો

આ ઘટનાને પગલે સ્થાનિક લોકોમાં ભારે રોષ જોવા મળી રહ્યો છે. વિપક્ષ બીજેડી (BJD) એ આ મામલે કેન્દ્રાપાડા એસપીને આવેદનપત્ર પાઠવીને દોષિતોને કડકમાં કડક સજા કરવાની માંગ કરી છે.