VIDEO : હવે Gen-આલ્ફાએ ઉઠાવ્યો અવાજ : બે રાજ્યોમાં વિદ્યાર્થીઓનો વિરોધ, CM એક્શન મોડમાં

Gen Alpha Student Protest In Uttar Pradesh and Uttarakhand : નવી પેઢીના બાળકો હવે પોતાની સમસ્યાઓને લઈને ખુલીને અવાજ ઉઠાવી રહ્યા છે. ઉત્તર પ્રદેશના હમીરપુર અને ઉત્તરાખંડના ખટીમામાં શાળાના વિદ્યાર્થીઓના વિરોધ પ્રદર્શને આ ઉદાહરણ પૂરું પાડ્યું છે. હમીરપુરમાં બાળકોએ શાળા સુધી રસ્તો બનાવવાની માંગ સાથે હાથમાં તિરંગો લઈને 5 કિલોમીટર લાંબી પદયાત્રા કાઢી કલેક્ટર કચેરી પહોંચ્યા હતા. જ્યારે ખટીમામાં નિવાસી શાળાના વિદ્યાર્થીઓએ ખરાબ ભોજન, દૂષિત પાણી અને ગંદા શૌચાલય જેવી અસુવિધાઓ સામે શાળા પરિસરમાં જ આંદોલન શરૂ કરી દીધું હતું.

ઉત્તર પ્રદેશ : વિદ્યાર્થીઓ કાચા અને ઉબડખાબડ રસ્તાથી પરેશાન

હમીરપુર જિલ્લાના ચંદૂપુર ગ્રામ પંચાયતના ગંગવા કા ડેરા અને બચ્ચી કા ડેરા વિસ્તારના વિદ્યાર્થીઓ લાંબા સમયથી કાચા અને ઉબડખાબડ રસ્તાથી પરેશાન હતા. ચોમાસામાં કાદવ-કીચડના કારણે શાળાએ જવું મુશ્કેલ બની જતું હતું. આ સમસ્યાના કાયમી ઉકેલ માટે બાળકો અને ગ્રામજનો હાથમાં તિરંગો લઈને 5 કિલોમીટર ચાલીને કલેક્ટર કચેરીએ પહોંચ્યા હતા. પ્રદર્શનકારીઓ રસ્તો મંજૂર ન થાય ત્યાં સુધી ડીએમ ગેટ આગળ જ ધરણા પર બેસી ગયા હતા.

વિદ્યાર્થીઓએ અવાજ ઉઠાવતા પ્રશાસનની આંખો ખુલી

પરિસ્થિતિ ગંભીર બનતાં એડીએમ રાકેશ કુમાર (Rakesh Kumar)એ વિદ્યાર્થીઓ પાસેથી આવેદનપત્ર લીધું હતું. તેમણે માહિતી આપી હતી કે, આ રસ્તાના નિર્માણ માટે વન વિભાગ તરફથી એનઓસી મળી ગઈ છે અને ટૂંક સમયમાં જ કામ શરૂ કરવામાં આવશે. આ રસ્તો બનાવવા માટે આશરે 1.81 કરોડ રૂપિયાનો ખર્ચ થશે, જેથી બાળકોની વર્ષો જૂની માંગ પૂરી થઈ ગઈ છે.

ઉત્તરાખંડ : શાળાની ગંભીર અસુવિધાઓ સામે વિદ્યાર્થીઓનો મોરચો

બીજી ઘટના ઉત્તરાખંડના ખટીમા સ્થિત સરકારી એકલવ્ય મોડલ રેસિડેન્શિયલ સ્કૂલની છે, જ્યાં ધોરણ 6થી 12માં ભણતા આશરે 400 આદિવાસી વિદ્યાર્થીઓએ શાળાની ગંભીર અસુવિધાઓ સામે મોરચો માંડ્યો હતો. બાળકો અને વાલીઓનો આરોપ હતો કે શાળામાં લાંબા સમયથી ખરાબ ગુણવત્તાનું ભોજન પીરસવામાં આવતું હતું, પીવાનું પાણી દૂષિત હતું અને શૌચાલયોમાં ભારે ગંદકી હતી. વારંવાર રજૂઆત કરવા છતાં કોઈ સુધારો ન થતાં સોમવારે સાંજે વિદ્યાર્થીઓ અને વાલીઓએ શાળા પરિસરમાં જ ધરણા શરૂ કરી દીધા હતા.

સીએમ ધામીના આદેશથી પ્રિન્સિપાલ સામે કાર્યવાહી

આ મામલો સ્થાનિક જનપ્રતિનિધિઓ મારફતે મુખ્યમંત્રી પુષ્કર સિંહ ધામી (CM Pushkar Singh Dhami) સુધી પહોંચતા તેમણે તાત્કાલિક સંજ્ઞાન લીધું હતું. મુખ્યમંત્રીના આદેશથી શાળાના પ્રિન્સિપાલ ભારતી યાદવ (Bharti Yadav) ને તાત્કાલિક અસરથી પદ પરથી હટાવી દેવામાં આવ્યા હતા. તંત્ર તરફથી શાળાની વ્યવસ્થામાં સુધારો કરવાનું આશ્વાસન મળ્યા બાદ વિદ્યાર્થીઓએ પોતાના ધરણા સમેટી લીધા હતા.