'લોકતંત્રમાં ભાઈ-ભત્રીજાવાદ ઘોર અપરાધ સમાન...', સુપ્રીમ કોર્ટનો મહત્ત્વપૂર્ણ ચુકાદો
Summarized by AI; it may make mistakes. Check important info
Summarized by AI; it may make mistakes. Check important info
Nepotism in Government Service: સુપ્રીમ કોર્ટે એક મહત્ત્વપૂર્ણ ચુકાદો આપતા સ્પષ્ટ કર્યું છે કે લોકતાંત્રિક વ્યવસ્થામાં ભાઈ-ભત્રીજાવાદ અને સ્વાર્થવૃત્તિ એ ઘોર અપરાધ છે, ખાસ કરીને જ્યારે સરકારી સેવા સાથે જોડાયેલા લોકો આવું કૃત્ય કરે. જસ્ટિસ સંજય કુમાર અને કે. વિનોદ ચંદ્રનની બેન્ચે હરિયાણા સરકારની એક હાઉસિંગ સોસાયટીની ગવર્નિંગ બોડી દ્વારા પોતાના જ સભ્યો અને કર્મચારીઓને કરવામાં આવેલી ફ્લેટની ફાળવણી રદ કરતા આ આકરી ટિપ્પણી કરી હતી.
સુપ્રીમ કોર્ટે પંજાબ અને હરિયાણા હાઈકોર્ટના જૂના આદેશને ફગાવ્યો
કોર્ટે પંજાબ અને હરિયાણા હાઈકોર્ટના અગાઉના આદેશને ફગાવી દીધો છે, જેમાં હાઈકોર્ટે ફાળવણી પ્રક્રિયામાં દખલ કરવાનો ઈન્કાર કર્યો હતો. સુપ્રીમ કોર્ટે નોંધ્યું કે ગવર્નિંગ બોડીના અધિકારીઓએ પોતાના પદનો દુરુપયોગ કરીને અંગત ફાયદા માટે નિયમોનું ઉલ્લંઘન કર્યું છે, જે લોકશાહી માટે એક અભિશાપ સમાન છે.
યોગ્યતા હોવા છતાં થયેલી ગેરરીતિ બદલ સુપ્રીમ કોર્ટનો કડક આદેશ
આ કેસની વિગત એવી છે કે, હરિયાણા શહેરી વિકાસ સત્તામંડળ(HUDA)અને સંબંધિત સંસ્થા અર્બન એસ્ટેટ અને ટાઉન એન્ડ કન્ટ્રી પ્લાનિંગ એમ્પ્લોઈઝ વેલફેર ઓર્ગેનાઈઝેશનના સભ્ય દિનેશ કુમારે બે હાઈ-એન્ડ સુપર ડીલક્સ ફ્લેટની ફાળવણીમાં થયેલા પક્ષપાત સામે અપીલ કરી હતી.
સુપ્રીમ કોર્ટે તપાસમાં જાણ્યું કે અપીલકર્તા દિનેશ કુમાર જાહેરાત મુજબની તમામ શરતો, જેમ કે ડેપ્યુટેશન પિરિયડ અને મૂળ પગારના માપદંડો પૂર્ણ કરતા હોવા છતાં તેમને અન્યાય કરવામાં આવ્યો હતો. આ ગેરરીતિ બદલ કોર્ટે HUDA પર 1 લાખ રૂપિયાનો દંડ ફટકાર્યો છે, જ્યારે અન્ય પ્રતિવાદીઓ બી.બી. ગુપ્તા પર 50,000 રૂપિયા અને પુરન ચંદ પર 25,000 રૂપિયાનો દંડ લગાવ્યો છે.
HUDA દ્વારા દિનેશ કુમારને ₹50,000 ચૂકવવાનો આદેશ
ચુકાદા મુજબ, HUDA એ અપીલકર્તા દિનેશ કુમારને કાનૂની લડાઈના ખર્ચ પેટે 50,000 રૂપિયા ચૂકવવા પડશે. દંડની બાકીની રકમ સુપ્રીમ કોર્ટના લીગલ સર્વિસીસ ઓથોરિટી પાસે જમા કરાવવાની રહેશે. કોર્ટે આદેશ આપ્યો છે કે ફ્લેટની ફાળવણી માટે જમા કરાયેલી રકમ બંને ફાળવણીદારોને એક મહિનામાં પરત કરી દેવી અને રકમ પરત મળ્યાના એક મહિનાની અંદર ફાળવણીદારોએ ફ્લેટ ખાલી કરવા પડશે. આ ચુકાદો સરકારી સંસ્થાઓમાં પારદર્શિતા જાળવવા અને પદના દુરુપયોગ સામે એક મજબૂત ઉદાહરણ પૂરું પાડે છે.
