2013માં બ્રિટન સ્થાયી થયેલા પરિવારની સિદ્ધિ
ભારતીય મૂળનો સૌથી યુવા મેયર બનેલો તુષાર વીસ વર્ષની વયે કાઉન્સિલર બન્યો હતો
નવી દિલ્હી: હરિયાણાના ભારતીય મૂળના પરિવારના ૨૩ વર્ષીય તુષાર કુમાર અને તેની માતા પરવીન રાની બંને યુ.કે.માં મેયર તરીકે ચૂંટાઈ આવ્યા છે. મૂળ હરિયાણાના સોનિપત જિલ્લામાં રોહના ગામનો આ પરિવાર ૨૦૧૩માં બ્રિટન સ્થાયી થવા અગાઉ રોહતકમાં રહેતો હતો.
૧૩ મેના રોજ એલ્સ્ટ્રી અને બોરહેમવૂડ ટાઉન કાઉન્સિલના મેયર તરીકે પદ સંભાળીને તુષારે યુ.કે.માં ભારતીય મૂળના સૌથી યુવા મેયર બનીને ઈતિહાસ રચ્યો. અઠવાડિયા પછી તેની માતા પરવીન રાની પણ હર્ટ્સમેર બરો કાઉન્સિલની ભારતીય મૂળની પ્રથમ મેયર તરીકે ચૂંટાઈ આવી. તેમના પિતા સુનિલ દહિયાએ આ ઉપલબ્ધિને પરિવાર તેમજ ભારતીય સમુદાય માટે ગર્વની પળ ગણાવી.
સુનિલ દહિયાએ જણાવ્યું કે તુષાર અને પરવીન બંને કાયમ સમાજ સેવા અને સ્વયંસેવક તરીકે વ્યસ્ત રહ્યા હતા. તુષાર કિંગ્સ કોલજ લંડન ખાતે રાજનીતિનો અભ્યાસ કરી રહ્યો હતો ત્યારે માત્ર વીસ વર્ષની વયે કાઉન્સિલર બન્યો હતો.
યુ.કે.માં સ્થાયી થવા છતાં પરિવાર હરિયાણામાં તેમના મૂળ સાથે જોડાયેલો રહ્યો છે અને નિયમિતપણે રોહતકની મુલાકાત લે છે. તુષાર અને પરવીન બંનેએ હિન્દી અને ભારતીય સંસ્કૃતિને પ્રોત્સાહન આપવા સ્વૈચ્છિક શિક્ષણ આપીને તેમજ સામાજિક કાર્યો દ્વારા યોગદાન આપ્યું છે.
