નકલી દવા બનાવવાના આંતર રાજ્ય રેકેટના પર્દાફાશ : છ લોકોની ધરપકડ

- બે કરોડ રૂપિયાની નકલી દવાઓ જપ્ત કરવામાં આવી

- જપ્ત જથ્થામાં ડાયાબિટિસ, બીપી અને લિવરની બિમારીઓ માટેની દવા સામેલ

- નકલી જીએસટી કંપનીઓનાં નેટવર્કનો પણ ભાંડો ફૂટયો ઃ નકલી બિલોનો આંકડો રૂ. 50 કરોડને પાર

આ ઓપરેશન દરમિયાન પોલીસે નકલી જીએસટી કંપનીઓનાં એક નેટવર્કનો પણ ખુલાસો કર્યો છે. આ કંપનીઓનો ઉપયોગ નકલી બિલો બનાવવા અને આ ગેરકાયદે વેપારથી થનારી આવકનું લોન્ડરિંગ કરવામાં આવતું હતું. તપાસકર્તાઓનાં અંદાજ મુજબ આ નકલી બિલોનું કુલ મૂલ્ય લગભગ ૫૦ કરોડ રૂપિયા છે. પોલીસના જણાવ્યા અનુસાર આ રેકેટ મોટા પાયે નકલી શિડયુલ-એચ દવાઓનાં નિર્માણ, સ્ટોરેજ અને વિતરણમાં સંડોવાયેલું હતું.

આ દવાઓ સામાન્ય રીતે ડાયાબિટિસ, હાયપર ટેન્શન અને લિવર સંબધી બિમારીઓની સારવાર માટે લખવામાં આવે છે. આ દવાઓનો નકલી જથ્થો જાહેર આરોગ્ય સામે એક ગંભીર ખતરો પેદા કરે છે.

ધરપકડ કરાયેલા આરોપીઓની ઓળખ શાહદરામાં હોલસેલ મેડિસિન ડીલર  નિખિલ અરોરા ઉર્ફે સની, ઉત્તર પ્રદેશનાં બે સપ્લાયર શિવમ ત્યાગી અને મયંક અગ્રવાલ, ઉત્તરાખંડનો મુખ્ય સપ્લાયર મોહિતકુમાર શર્મા, શાહરૂખ તથા રાહુુલ તરીકે કરવામાં આવી છે. 

આરોપ મૂકવામાં આવ્યો છે કે શાહરૂખ અને રાહુલ આ ગેરકાયદે વેપારને સુગમ બનાવવા માટે નકલી જીએસટી કંપનીઓનું સંચાલન કરતા હતાં. 

એક વરિષ્ઠ પોલીસ અધિકારીએ જણાવ્યું હતું કે આ કેસ કેટલીક ખાસ માહિતીઓને આધારે સામે આવ્યો હતો. ત્યારબાદ ૧૧ માર્ચે શાહદરાની બિહારી કોલોનીમાં દરોડા પાડવામાં આવ્યા હતાં. 

આ ઓપરેશન દરમિયાન અરોરાની ધરપકડ કરવામાં આવી હતી જે ભાગીરથી પેલેસમાં એક હોલસેલ દવાની દુકાન ચલાવતો હતો.