- તમિલનાડુમાં એક જ તબક્કામાં 84.69 ટકા મતદાન થયું
- પશ્ચિમ બંગાળમાં 92.69 ટકા મહિલા, 90.92 ટકા પુરુષો, તમિલનાડુમાં 85.76 મહિલા, 83.57 ટકા પુરુષોનું મતદાન
- 2011માં પશ્ચિમ બંગાળમાં 84.72 ટકા અને તમિલનાડુમાં 78.29 ટકા વિક્રમી મતદાન થયું હતું
- પશ્ચિમ બંગાળમાં 1,478 જ્યારે તમિલનાડુમાં 4,023 ઉમેદવારોના ભાવી સીલ
કોલકાતા/ચેન્નઈ : પાંચ રાજ્યોની વિધાનસભા ચૂંટણીના ભાગરૂપે ગુરુવારે પશ્ચિમ બંગાળમાં પહેલા તબક્કામાં ૧૫૨ બેઠકો પર જ્યારે તમિલનાડુમાં બધી જ ૨૩૪ બેઠકો પર મતદાન થયું હતું. એસઆઈઆરની કાર્યવાહી હેઠળ લાખો મતદારોના નામ કપાવાની સાથે ભારે હિંસા તેમજ ત્રણ ઉમેદવારો સાથે મારામારી વચ્ચે પશ્ચિમ બંગાળમાં પહેલા તબક્કામાં ઐતિહાસિક ૯૨.૧૪ ટકા મતદાન થયું હતું. બીજીબાજુ તમિલનાડુમાં એક જ તબક્કામાં ૮૪.૯૮ ટકા મતદાન થયું હતું. એટલે કે ગુરુવારે બંને રાજ્યોમાં વિક્રમી મતદાન નોંધાયું છે. બંને રાજ્યોમાં મહિલાઓએ ખૂબ જ ઉત્સાહપૂર્વક મતદાન કરતાં ટકાવારી ઊંચી રહી છે તેમ ચૂંટણી પંચના સૂત્રોએ જણાવ્યું હતું.
પશ્ચિમ બંગાળમાં ગુરુવારે પહેલા તબક્કામાં ૧૬ જિલ્લામાં ૧૫૨ બેઠકો પર સાંજે મતદાન પૂરું થઈ ગયું હતું. અધિકારીઓએ કહ્યું કે, સાંજે ૬.૦૦ વાગ્યા પહેલા મતદાન કેન્દ્રો પર પહોંચી ગયેલા મતદારોને મતદાનની મંજૂરી અપાઈ હતી, જેને પગલે મતદાનની કુલ ટકાવારીમાં આંશિક ફેરફાર જોવા મળી શકે છે. બંગાળમાં હવે બીજા તબક્કાનું મતદાન ૨૯ એપ્રિલે થશે. પાંચ રાજ્યોની વિધાનસભા ચૂંટણીના ભાગરૂપે ૯ એપ્રિલે આસામ અને પુડુચેરીમાં પણ વિક્રમી ૮૫.૩૮ ટકા અને ૮૯.૮૩ ટકા મતદાન થયા હતા. પશ્ચિમ બંગાળ અને તમિલનાડુમાં મતદાન માટે મહિલા મતદારો વિક્રમી સંખ્યામાં આગળ આવી હતી. પશ્ચિમ બંગાળમાં ૯૨.૬૯ ટકા મહિલાઓ જ્યારે ૯૦.૯૨ ટકા પુરુષો મતાધિકાર માટે મતદાન કેન્દ્રોમાં પહોંચ્યા હતા. એ જ રીતે તમિલનાડુમાં પણ ૮૫.૭૬ ટકા મહિલાઓ તથા ૮૩.૫૭ ટકા પુરુષોએ મતદાન કર્યું હતું. એટલે કે બંને રાજ્યોમાં પુરુષો કરતાં મહિલા મતદારો વધુ હતી.
મુખ્ય ચૂંટણી કમિશનર જ્ઞાાનેશ કુમારે જણાવ્યું હતું કે, પશ્ચિમ બંગાળ અને તમિલનાડુમાં આ વખતે આઝાદી પછી અત્યાર સુધીમાં સૌથી વધુ મતદાન થયું છે. એટલે કે આ બંને રાજ્યોમાં પહેલી વખત આટલી મોટી ટકાવારી નોંધાઈ છે. તેમણે બધા જ મતદારોની પ્રશંસા કરતા કહ્યું કે, ચૂંટણી પંચ દરેક મતદારને સલામ કરે છે, જેમણે મોટી સંખ્યામાં પોતાના મતાધિકારનો ઉપયોગ કર્યો હતો. આ પહેલાં બંને રાજ્યોમાં ૨૦૧૧માં વિક્રમી મતદાન થયું હતું, જેમાં પશ્ચિમ બંગાળમાં ૮૪.૭૨ ટકા અને તમિલનાડુમાં ૭૮.૨૯ ટકા મતદાન નોંધાયું હતું.
પશ્ચિમ બંગાળમાં રાજકીય મોબિલાઈઝેશન અને એસઆઈઆરની કાર્યવાહીના પગલે આંકડાકીય અસરો પણ મતદાનની ટકાવારી પર જોવા મળી છે. એસાઈઆરમાં સમગ્ર રાજ્યમાંથી ૯૧ લખ મતદારોના નામ કપાયા છે. રાજ્યમાં ગુરુવારે પહેલા બે કલાકમાં ૧૮.૭૬ ટકા મતદાન થયું હતું અને ત્યાર પછી સવારે ૧૧ વાગ્યા સુધીમાં ૪૧.૧૧ ટકા તથા ૧.૦૦ વાગ્યા સુધીમાં ૬૨.૧૮ ટકા મતદાન થઈ ગયું હતું.
રાજ્ય ચૂંટણી પંચના આંકડા મુજબ પશ્ચિમ બંગાળમાં સાંજે ૬.૦૦ કલાકે નોંધાયેલા આંકડા મુજબ રાજ્યમાં છ વાગ્યા સુધીમાં ૯૧.૭૪ ટકા મતદાન નોંધાયું હતું, જેમાં દક્ષિણ દિનાજપુર જિલ્લામાં સૌથી વધુ ૯૩.૧૨ ટકા મતદાન થયું હતું. બીજીબાજુ તમિલનાડુની બધી જ ૨૩૪ બેઠકો પર મતદારોએ ખૂબ જ ઉત્સાહપૂર્વક મતદાન કરતા સાંજે ૬.૦૦ વાગ્યા સુધીમાં ૮૪.૨૪ ટકા મતદાન થઈ ગયું છે. જોકે, મતદાનની અંતિમ ટકાવારીના આંકડામાં આંશિક ફેરફાર જોવા મળી શકે છે.
પશ્ચિમ બંગાળ વિધાનસભા ચૂંટણી માટે સાંજે ૬.૦૦ કલાક સુધીમાં ૩.૬૦ કરોડથી વધુ મતદારોમાંથી લગભગ ૯૨.૧૪ ટકાએ મતદાન કર્યું હતું. મતદાનની આ વિક્રમી ટકાવારી તાજેતરના ઈતિહાસમાં સૌથી વધુ છે. રાજ્યના ૧૬ જિલ્લામાં ૪૪,૩૭૬ મતદાન કેન્દ્રોમાં ૧૬૭ મહિલાઓ સહિત ૧,૪૭૮ ઉમેદવારોના ચૂંટણી ભાગ્યનો નિર્ણય થશે. પશ્ચિમ બંગાળમાં તૃણમૂલ કોંગ્રેસ અને ભાજપ વચ્ચે ભારે ખેંચતાણ જોવા મળી રહી છે.
બીજીબાજુ તમિલનાડુમાં ૨૩૪ વિધાનસભા બેઠકો પર ૭૫,૦૦૦થી વધુ મતદાન મથકોમાં ૫.૭૩ કરોડ મતદારોમાંથી લગભગ ૮૪.૯૮ ટકાએ મતાધિકારનો ઉપયોગ કરીને ૪,૦૨૩ ઉમેદવારોનું ભાવી સીલ કર્યું હતું. તમિલનાડુમાં કરુર જિલ્લામાં સૌથી વધુ ૯૧.૮૬ ટકા મતદાન થયું હતું. તમિલનાડુમાં ડીએમકે, એઆઈએડીએમકે અને અભિનેતા વિજયના ટીવીકે પક્ષ વચ્ચે રસપ્રદ સ્પર્ધા થશે.
