Faridabad player murder: હરિયાણાના ફરીદાબાદમાં પ્રેમપ્રકરણમાં એક આશાસ્પદ રમતવીરની ક્રૂર હત્યાનો મામલો સામે આવ્યો છે. અહીં સગીર પ્રેમિકાના પરિવારે કથિત રીતે સ્ટેટ લેવલના બેડમિન્ટન ખેલાડીનું અપહરણ કરી ત્રણ દિવસ સુધી ગોંધી રાખ્યો હતો અને બેરહેમીથી માર માર્યો હતો. ગંભીર હાલતમાં હોસ્પિટલમાં દાખલ કરાયેલા આ યુવકે સારવાર દરમિયાન દમ તોડી દીધો છે. પોલીસે આ કેસમાં ગુનો નોંધી બે આરોપીઓની ધરપકડ કરી આગળની તપાસ હાથ ધરી છે.
મામાના ઘરે આવતી છોકરી સાથે બંધાયા હતા પ્રેમસંબંધો
મૃતક યુવકની ઓળખ 21 વર્ષીય મોનુ તરીકે થઈ છે, જે ભિવાડીના સૈદપુર ગામનો રહેવાસી હતો. તેના પિતા ભીમ સિંહ ડ્રાઈવિંગ કરી પરિવારનું ગુજરાન ચલાવે છે. મોનુ ભણવામાં તેજસ્વી હતો અને તાજેતરમાં જ તેણે 70 ટકા માર્ક્સ સાથે ધોરણ 12ની પરીક્ષા પાસ કરી હતી. આ ઉપરાંત તે એક સારો રમતવીર પણ હતો. તેણે સ્કૂલ તરફથી સ્ટેટ લેવલ પર બેડમિન્ટન ચેમ્પિયનશિપમાં ભાગ લીધો હતો અને જિલ્લા કક્ષાએ ઘણા મેડલ પણ જીત્યા હતા. ફરીદાબાદના તિગાંવ પોલીસ સ્ટેશન વિસ્તારની રહેવાસી એક સગીરા સૈદપુર ગામમાં તેના મામાના ઘરે આવતી-જતી હતી, તે દરમિયાન મોનુ અને સગીરા વચ્ચે પ્રેમસંબંધ બંધાયો હતો.
એપ્રિલ મહિનામાં નોંધાઈ હતી છોકરીને ભગાડી જવાની ફરિયાદ
પોલીસ પ્રવક્તા યશપાલના જણાવ્યા અનુસાર, ગત એપ્રિલ મહિનામાં મોનુ આ સગીરાને ભગાડી ગયો હતો, જેને પગલે છોકરીના પિતાએ તિગાંવ પોલીસ સ્ટેશનમાં તેની સામે ફરિયાદ નોંધાવી હતી. આ મામલે કાર્યવાહી કરીને પોલીસે સગીરાને તો તેના ઘરેથી હેમખેમ શોધી કાઢી હતી, પરંતુ મોનુ પોલીસની પકડથી બચવા માટે સતત નાસતો ફરતો હતો.
કાકા નરેન્દ્રએ લગાવ્યા ગંભીર આક્ષેપો
મૃતકના કાકા નરેન્દ્રના જણાવ્યા અનુસાર, 17 મેના રોજ મોનુ એવું કહીને ઘરેથી નીકળ્યો હતો કે તે તિગાંવ પોલીસ સ્ટેશનમાં પોલીસ તપાસમાં સામેલ થવા માટે જઈ રહ્યો છે. પરંતુ ત્યાં પહોંચે તે પહેલા જ છોકરીના પરિવારના સભ્યોએ રસ્તામાંથી તેનું અપહરણ કરી લીધું હતું. આરોપ છે કે છોકરીના પરિવારે મોનુને કોઈ અજાણી જગ્યાએ બંધક બનાવી દીધો હતો અને સતત ત્રણ દિવસ સુધી તેને ભયાનક શારીરિક ટોર્ચર કરીને ઢોર માર માર્યો હતો.
સારવાર દરમિયાન તોડ્યો દમ, પોલીસે શરૂ કરી તપાસ
20 મેના રોજ પોલીસનો ફોન આવ્યો કે મોનુ ગંભીર હાલતમાં છોકરીના ઘર બહારથી મળ્યો છે અને તેને હોસ્પિટલ લઈ જવાય છે. આ સાંભળી પરિવારજનો પહોંચ્યા અને તેને ખાનગી હોસ્પિટલમાં દાખલ કર્યો, જ્યાં બે દિવસની સારવાર બાદ તેનું મોત નીપજ્યું. આ મામલે પોલીસે અપહરણ અને હત્યાનો ગુનો નોંધી બે આરોપીઓની ધરપકડ કરી આગળની તપાસ શરૂ કરી છે.
