પહેલાં પ્રમોશન આપ્યું અને અડધી રાત્રે છીનવી લીધું! મહિલા પત્રકારોના સતામણીના આક્ષેપ બાદ ACP વિવેક ભગત મુશ્કેલીમાં

Delhi Government DANIPS Officers Additional Charge Revised : દિલ્હી સરકારે 12 સિલેક્શન ગ્રેડ DANIPS અધિકારીઓને વધારાના પોલીસ ઉપાયુક્ત એટલે કે એડિશનલ ડીસીપીનો કરંટ ડ્યુટી ચાર્જ આપવાના આદેશમાં મોટો ફેરફાર કર્યો છે. આ સંશોધિત આદેશ હેઠળ દિલ્હી પોલીસના એસીપી વિવેક ભગતને વધારાના ચાર્જ પરથી હટાવી દેવામાં આવ્યા છે. એસીપી વિવેક ભગત પર મુખ્ય ચૂંટણી આયુક્ત (CEC) જ્ઞાનેશ કુમાર વિરુદ્ધના વિરોધ પ્રદર્શન દરમિયાન મહિલા પત્રકારોની છેડતી અને ઉત્પીડનનો ગંભીર આરોપ છે. જેની હાલ નિષ્પક્ષ તપાસ ચાલી રહી છે. સરકારના જણાવ્યા અનુસાર, ખુદ વિવેક ભગતે જ અનુરોધ કર્યો હતો કે જ્યાં સુધી આ મામલાની સંપૂર્ણ તપાસ પૂરી ન થાય, ત્યાં સુધી તેમને આ વધારાની જવાબદારી ન સોંપવામાં આવે.

તપાસ પૂરી થાય ત્યાં સુધી નહીં સંભાળે પદ

દિલ્હી સરકારે તેના સત્તાવાર સોશિયલ મીડિયા હેન્ડલ પર સ્પષ્ટ કર્યું કે DANIPS અધિકારીઓને એડીસીપી પદનો કાર્યભાર સોંપવાનો 5 ઓક્ટોબરનો આદેશ અગાઉની પ્રક્રિયા મુજબ હતો, જે પ્રસ્તાવ 25 સપ્ટેમ્બરના રોજ શરૂ થયો હતો. આ વ્યવસ્થા માત્ર અસ્થાયી છે અને તેનાથી કોઈ નાણાકીય લાભ મળતો નથી. જોકે, વિવેક ભગતે સ્વેચ્છાએ વિનંતી કરી છે કે જ્યાં સુધી આરોપોની તપાસ સંતોષકારક રીતે પૂરી ન થાય, ત્યાં સુધી તેઓ આ ચાર્જ સ્વીકારશે નહીં. આના પગલે સરકારે બાકીના 11 અધિકારીઓ માટે સુધારેલો આદેશ કરવાનો નિર્ણય કર્યો છે. અગાઉ આ લિસ્ટમાં વિવેક ભગત સહિતના અધિકારીઓ સામેલ હતા, જેઓ હાલ કોટ પ્લેસમાં એસડીપીઓ તરીકે તૈનાત છે.

ત્રણ મહિલા પત્રકારોએ લગાવ્યા ગંભીર આરોપો

ગત શનિવારે જંતર-મંતર પર ચૂંટણી પંચ વિરુદ્ધ ચાલી રહેલા વિરોધ પ્રદર્શન દરમિયાન ત્રણ મહિલા પત્રકારોએ દિલ્હી પોલીસના અધિકારીઓ પર જાતીય ઉત્પીડન અને છેડતીના ગંભીર આરોપો લગાવ્યા હતા. દિલ્હી પોલીસે જણાવ્યું કે આ સંદર્ભમાં મળેલી ફરિયાદોને આગળની નિષ્પક્ષ તપાસ માટે ક્રાઈમ બ્રાન્ચમાં મોકલી આપવામાં આવી છે. આ ઘટના બાદ અનેક સ્વતંત્ર પત્રકારોએ દોષિત અધિકારીઓ સામે કડક કાર્યવાહી અને એફઆઈઆરની માંગ સાથે સંસદ માર્ગ પોલીસ સ્ટેશન બહાર જોરદાર વિરોધ પ્રદર્શન પણ કર્યું હતું.