FASTag વાર્ષિક પાસના યુઝર્સ 1 કરોડને પાર, 1150 ટોલ પ્લાઝા પર મળશે ફાયદો; જાણો ₹3,075ના પાસથી શું બદલાયું

FASTag Annual Pass Crosses One Crore Users: ફાસ્ટેગના એન્યૂઅલ પાસને લઈને સરકારે એક મોટી માહિતી આપી છે. માર્ગ પરિવહન અને રાજમાર્ગ મંત્રાલયે જણાવ્યું છે કે, ફાસ્ટેગના એન્યૂઅલ પાસને અત્યાર સુધી દેશમાં 1 કરોડથી વધુ યુઝર્સ સબસ્ક્રાઈબ કરી ચૂક્યા છે. આ પાસ દેશના 1150 ટોલ પ્લાઝાને કવર કરે છે. ફાસ્ટેગનો એન્યૂઅલ પાસ 15 ઓગસ્ટ 2025ના રોજ લોન્ચ કરવામાં આવ્યો હતો. એન્યૂઅલ પાસ માટે એકવારમાં 3075 રૂપિયાની ફી ચૂકવવાની હોય છે, જે એક વર્ષ અથવા 200 વખત ટોલ પ્લાઝા પરથી પસાર થવા સુધી માન્ય રહે છે. માર્ગ પરિવહન મંત્રાલયે જણાવ્યું છે કે, એક કરોડ પાસ ઈશ્યૂ થવા એ દર્શાવે છે કે, દેશભરમાં નેશનલ હાઈવે પર અવિરત અને આર્થિક રીતે ફાયદાકારક મુસાફરીને પ્રોત્સાહન આપવામાં આ પાસ કેટલો અસરકારક રહ્યો છે.

1150 ટોલ પ્લાઝા થાય છે પાસથી કવર

ફાસ્ટેગનો એન્યૂઅલ પાસ હોવાથી તમારે દરેક વખતે ટોલ પર બેલેન્સ કપાવા કે વારંવાર ફાસ્ટેગ રિચાર્જ કરવાની ચિંતા કરવી પડતી નથી. દેશભરના નેશનલ હાઈવે અને એક્સપ્રેસવે પર બનેલા લગભગ 1150 ટોલ પ્લાઝા પર આ પાસ સરળતાથી કામ કરે છે. જોકે આ સુવિધા માત્ર પ્રાઈવેટ એટલે કે નોન-કમર્શિયલ વાહનો માટે છે, જેમના પર પહેલાથી જ યોગ્ય FASTag લાગેલો હોય.

FASTag પર જ ચાલુ થઈ જાય છે એન્યૂઅલ પાસ

જો તમારું હાઈવે પર સતત આવવા-જવાનું રહેતું હોય તો આ પાસ તમારા પૈસા અને સમય બંને બચાવવાનો એક ઉત્તમ અને આર્થિક ઉપાય છે. એન્યૂઅલ પાસ માટે તમારે કોઈ નવો ટેગ ખરીદવો પડતો નથી, પરંતુ આના માટે નેશનલ હાઈવેની રાજમાર્ગયાત્રા (Rajmargyatra) એપ પર 3075 રૂપિયા આપીને પાસ મેળવી શકાય છે. આ તમારા વાહનના હાલના FASTag પર જ એક્ટિવેટ થઈ જાય છે.