Elon Musk in PM Modi-Trump Call: મિડલ ઈસ્ટમાં ચાલી રહેલા યુદ્ધ વચ્ચે મંગળવારે (24મી માર્ચ) ભારતના વડાપ્રધાન નરેન્દ્ર મોદી અને અમેરિકાના પ્રમુખ ડોનાલ્ડ ટ્રમ્પ વચ્ચે ટેલિફોનિક વાતચીત થઈ હતી. જોકે, આ હાઈ-પ્રોફાઈલ કોલ માત્ર બે નેતાઓ પૂરતો સીમિત નહોતો. ન્યૂ યોર્ક ટાઈમ્સના અહેવાલ મુજબ, વિશ્વના સૌથી ધનિક વ્યક્તિ ઈલોન મસ્ક પણ આ વાતચીત દરમિયાન હાજર હતા.
કૂટનીતિમાં મસ્કની અસામાન્ય હાજરી
ન્યૂ યોર્ક ટાઈમ્સે બે અમેરિકી અધિકારીઓને ટાંકીને અહેવાલ આપ્યો છે કે, પીએમ મોદી અને ટ્રમ્પ વચ્ચે જ્યારે મિડલ ઈસ્ટની કટોકટી પર ચર્ચા થઈ રહી હતી, ત્યારે ઈલોન મસ્ક પણ ફોન પર હતા. જોકે, મસ્કે આ વાતચીતમાં કોઈ સલાહ આપી કે માત્ર સાંભળ્યું તે સ્પષ્ટ નથી, પરંતુ બે શક્તિશાળી લોકશાહી દેશોના વડાઓની વાતચીતમાં એક બિઝનેસમેનની હાજરી ભારત-અમેરિકા વચ્ચેના ભવિષ્યના સંબંધોમાં મસ્કની વધતી જતી ભૂમિકા તરફ ઈશારો કરે છે.
હોર્મુઝ સ્ટ્રેટની સુરક્ષા પર ભાર
આ વાતચીતનો મુખ્ય એજન્ડા મિડલ ઈસ્ટમાં ઈરાનના પ્રભાવ હેઠળની ‘હોર્મુઝ સ્ટ્રેટ’ હતી. આ જળમાર્ગ વિશ્વના કુલ ક્રૂડ ઓઈલના 20-25 ટકા પરિવહન માટે અત્યંત મહત્ત્વનો છે. વડાપ્રધાન મોદીએ ભારપૂર્વક જણાવ્યું હતું કે હોર્મુઝ સ્ટ્રેટ ખુલ્લું અને સુરક્ષિત રહે તે સમગ્ર વિશ્વની અર્થવ્યવસ્થા માટે અનિવાર્ય છે. બંને નેતાઓ આ વિસ્તારમાં શાંતિ અને સ્થિરતા જાળવવા સતત સંપર્કમાં રહેવા સંમત થયા હતા.
આ પણ વાંચો: યુદ્ધ વચ્ચે ટ્રમ્પ ફસાયા, અમેરિકામાં એરપોર્ટ પર અચાનક જ નેશનલ ઈમરજન્સી જાહેર કરી
સત્તાવાર માહિતીમાંથી મસ્કનું નામ ગાયબ
ભારત કે અમેરિકાની સરકાર દ્વારા જાહેર કરવામાં આવેલી સત્તાવાર અખબારી યાદીમાં ક્યાંય પણ ઈલોન મસ્કની હાજરીનો ઉલ્લેખ કરવામાં આવ્યો નથી. નોંધનીય છે કે ડોનાલ્ડ ટ્રમ્પની જીત બાદ મસ્કને ‘ડિપાર્ટમેન્ટ ઓફ ગવર્નમેન્ટ એફિશિયન્સી’ (DOGE)ની જવાબદારી સોંપાઈ છે, જેનો મુખ્ય હેતુ ફેડરલ ખર્ચ ઘટાડવાનો છે. જોકે, વિદેશ નીતિના નિર્ણયોમાં પણ મસ્કની સક્રિયતા હવે જગજાહેર થઈ રહી છે.
ભારત માટે મસ્ક કેમ મહત્વના?
ભારતમાં અમેરિકાના રાજદૂત સર્જિયો ગોરે પણ પુષ્ટિ કરી છે કે પશ્ચિમ એશિયાની સ્થિતિ મુદ્દે બંને નેતાઓ ગંભીર છે. જો ઈલોન મસ્ક આ સમીકરણમાં સામેલ હોય, તો તે ભારત માટે ટેકનોલોજી, રોકાણ અને રક્ષણના ક્ષેત્રે અમેરિકા સાથેના સંબંધોને વધુ મજબૂત બનાવવાની નવી તક પૂરી પાડી શકે છે.
