ગુરુગ્રામમાં નોકરી શોધતી મહિલાને જાળમાં ફસાવી સામૂહિક દુષ્કર્મ, પોલીસવાળો જ મુખ્ય આરોપી

Gurugram News : ગુરુગ્રામમાં માનવતાને શરમાવે તેવી એક ઘટના સામે આવી છે, જ્યાં ખાખી વર્દીમાં રહેલા એક હવાલદારે નોકરી અપાવવાના બહાને દિલ્હીની એક મહિલા સાથે ગેંગરેપ કર્યો હોવાનો આરોપ લાગ્યો છે. આરોપીએ પોતાની ઓળખ ઇન્સ્પેક્ટર તરીકે આપી મહિલાને વિશ્વાસમાં લીધી અને ત્યારબાદ હોટલમાં આચર્યું નરાધમ કૃત્ય.

પૈસા પણ પડાવ્યાનો દાવો 

દિલ્હીના કેન્ટ વિસ્તારની 25 વર્ષીય મહિલાએ પોલીસમાં ફરિયાદ નોંધાવી છે કે તેની મુલાકાત અંદાજે છ મહિના પહેલા બસ મુસાફરી દરમિયાન સતીશ કુમાર નામના વ્યક્તિ સાથે થઈ હતી. સતીશે પોતાની ઓળખ હરિયાણા પોલીસના ઇન્સ્પેક્ટર તરીકે આપી હતી અને દાવો કર્યો હતો કે તેની પત્ની પલવલ કોર્ટમાં જજ છે. તેણે મહિલાને મુખ્યમંત્રી કોટામાંથી હરિયાણા પોલીસમાં સરકારી કુકની નોકરી અપાવવાનું કહી 3 લાખ રૂપિયાની માંગણી કરી હતી.

હોટલમાં નશીલી ચા પીવડાવી આચર્યું દુષ્કર્મ

29 જુલાઈ 2025ના રોજ આરોપીએ મહિલાને દસ્તાવેજો સાથે ગુરુગ્રામ બોલાવી હતી. ત્યારબાદ ઓગસ્ટ મહિનામાં તેને એમજી રોડ પર આવેલી એક હોટલમાં લઈ ગયો હતો. ત્યાં હોટલના રૂમમાં સતીશનો એક અન્ય સાથી 'લંબુ' અગાઉથી હાજર હતો. પીડિતાનો આરોપ છે કે આ બંને શખ્સોએ તેને ચામાં નશીલી દવા પીવડાવી દીધી હતી અને ત્યારબાદ વારાફરતી તેની સાથે દુષ્કર્મ આચર્યું હતું.

ધમકી અને વીડિયો વાઈરલ કરવાનો ડર

દુષ્કર્મ બાદ આરોપીઓએ પીડિતાના અશ્લીલ ફોટા અને વીડિયો પણ બનાવી લીધા હતા. જ્યારે મહિલાએ વિરોધ કર્યો ત્યારે સતીશે પોલીસનો રોફ બતાવી તેને જાનથી મારી નાખવાની અને વીડિયો સોશિયલ મીડિયા પર વાઈરલ કરવાની ધમકી આપી હતી.

પોલીસ કાર્યવાહી

પીડિતાએ હિંમત ભેગી કરી દિલ્હી કેન્ટ પોલીસ સ્ટેશનમાં ફરિયાદ કરી હતી, જ્યાં પોલીસે ગુનાની ગંભીરતાને જોઈ 'ઝીરો FIR' નોંધી હતી. 18 ફેબ્રુઆરીના રોજ આ મામલો સત્તાવાર રીતે ગુરુગ્રામના ડીએલએફ ફેઝ-2 પોલીસ સ્ટેશનમાં ટ્રાન્સફર કરવામાં આવ્યો છે. પોલીસે ભારતીય ન્યાય સંહિતાની કલમ 70(1), 123 અને 3(5) હેઠળ ગુનો નોંધી હોટલના રેકોર્ડ અને કોલ ડિટેલ્સના આધારે તપાસ તેજ કરી છે.