દિલ્હીમાં ગેંગસ્ટર લોરેન્સ બિશ્નોઈના વકીલની કાર પર 4 રાઉન્ડ ફાયરિંગ, 1 ઘાયલ

Lawrence Bishnoi Lawyer Firing: દિલ્હીના કાશ્મીરી ગેટ વિસ્તારમાં એક સનસનીખેજ ઘટના સામે આવી છે. અહીં ગેંગસ્ટર લોરેન્સ બિશ્નોઈના વકીલની કાર પર ફાયરિંગ થયું છે. પ્રાથમિક વિગતો અનુસાર કુલ 4 રાઉન્ડ ફાયરિંગ થયું છે. દિલ્હી પોલીસને રાત્રે 10 વાગ્યાના સુમારે ફાયરિંગની સૂચના મળી હતી. ઘટનાની જે તસવીર સામે આવી છે, તેમાં કાર પાછળનો કાચ તૂટી ગયેલો દેખાઈ રહ્યો છે. 

ફાયરિંગમાં એક વ્યક્તિ ઘાયલ

ઘટના સ્થળે પહોંચેલી દિલ્હી પોલીસે જણાવ્યું છે કે, કાશ્મીરી ગેટ ક્ષેત્રમાં પાંચ લોકોને લઈને જઈ રહેલી કાર પર ફાયરિંગ થયું છે, જેમાંથી એક વ્યક્તિ ઘાયલ થયો છે. ગાડીમાં સવાર લોકોમાંથી એક વકીલ છે, જે લોરેન્સ બિશ્નોઈની કાયદાકીય ટીમનો હિસ્સો હોવાનો દાવો કરે છે.

ઘટના બાદ વિસ્તારમાં અફરાતફરી મચી ગઈ હતી. પોલીસે તપાસનો ધમધમાટ શરૂ કરી હુમલાખોરોને પકડવાની તજવીજ હાથધરી છે. ગેંગસ્ટર લોરેન્સ બિશ્નોઈનું નામ જોડાતા મામલાની ગંભીરતાને ધ્યાને રાખી દિલ્હી પોલીસના વરિષ્ઠ અધિકારીઓ સહિત ફોરેન્સિક ટીમ ઘટનાસ્થળે પહોંચી હતી. તપાસ એજન્સીઓ એ એંગલ પણ ખંગાળી રહી છે કે ફાયરિંગ પાછળ લોરેન્સ બિશ્નોઈની વિરોધી ગેંગની ભૂમિકા છે કે પછી વકીલ કે સવાર લોકોના વ્યક્તિગત દુશ્મનાવટનું પરિણામ છે.