કરોડો વિદ્યાર્થીઓના ભવિષ્યને લગતા બિલ પર મંગળવારે થશે ચર્ચા : તમામ પક્ષો ગૃહમાં ચર્ચા કરવા સંમત

Anti Paper Leak Bill 2026 : લોકસભા અધ્યક્ષ ઓમ બિરલાની પહેલ અને સતત સંવાદના પરિણામે સંસદમાં જાહેર પરીક્ષા (અનુચિત સાધનો નિવારણ) સુધારા વિધેયક 2026 પર સર્જાયેલો ગતિરોધ આખરે ઉકેલાઈ ગયો છે. તમામ રાજકીય પક્ષો મંગળવારથી આ મહત્વપૂર્ણ બિલ પર સદનમાં ચર્ચા શરૂ કરવા માટે સહમત થયા છે. લોકસભા સ્પીકર ઓમ બિરલાએ તમામ પક્ષોના ફ્લોર લીડર્સ સાથે મુલાકાત કરીને આગ્રહ કર્યો હતો કે, આ વિષય દેશના કરોડો વિદ્યાર્થીઓ અને યુવાનોના ભવિષ્ય તેમજ સ્પર્ધાત્મક પરીક્ષાઓની પારદર્શિતા સાથે જોડાયેલો છે. આથી તેના પર સાર્થક ચર્ચા થવી જરૂરી છે.

પેપર લીક અને પરીક્ષા માફિયાઓ પર કડક લગામ

આ વિધેયકનો મુખ્ય ઉદ્દેશ્ય જાહેર પરીક્ષાઓમાં પેપર લીક, ચોરી (નકલ), સંગઠિત પરીક્ષા માફિયાઓ અને અન્ય ગેરરીતિઓ પર કડક નિયંત્રણ લાવવાનો છે. ચર્ચા દરમિયાન વિવિધ પક્ષો પોતાના સૂચનો રજૂ કરશે, જેના આધારે સરકાર જવાબ આપશે, અને બિલને મંજૂરી માટે મૂકવામાં આવશે.

સંસદના બંને ગૃહ મંગળવાર સુધી સ્થગિત

સોમવારે વિપક્ષના ભારે હંગામા અને નારેબાજીને કારણે લોકસભા અને રાજ્યસભાની કામગીરી મંગળવારે સવારે 11.00 વાગ્યા સુધી સ્થગિત કરી દેવામાં આવી હતી. કેન્દ્રીય મંત્રી કિરેન રિજિજુ અને ભાજપના સાંસદ નિશિકાંત દુબેએ વિપક્ષ પર આકરા પ્રહારો કરતા જણાવ્યું હતું કે, સરકાર વિદ્યાર્થીઓના હિતમાં પેપર લીક સામે સખત સજાની જોગવાઈ ધરાવતું બિલ લાવવા માંગે છે, પરંતુ વિપક્ષ ચર્ચાથી ભાગી રહ્યો હતો. હવે આખરે મંગળવારે આ મુદ્દે ચર્ચા થવા જઈ રહી છે.