જૂતામાં પેપર છુપાવ્યું ને ₹1.5 કરોડમાં વેચવાનો પ્લાન! મહારાષ્ટ્ર TET પેપર લીકનો માસ્ટરમાઇન્ડ બિહારથી ઝડપાયો
Summarized by AI; it may make mistakes. Check important info
Summarized by AI; it may make mistakes. Check important info
Maharashtra TET Paper Leak: મહારાષ્ટ્ર TET પેપર લીક કેસમાં પોલીસને મોટી સફળતા મળી છે. ભિવંડી પોલીસે આ સમગ્ર કૌભાંડના મુખ્ય માસ્ટરમાઇન્ડ બિજેન્દ્ર કુમાર ગુપ્તાની બિહારથી ધરપકડ કરી લીધી છે. તપાસમાં બહાર આવ્યું છે કે બિજેન્દ્ર ગુપ્તાએ પોતાના સાથી સોનુ સાથે મળીને પ્રિન્ટિંગ પ્રેસના કર્મચારીઓને પૈસા અને પ્રોપર્ટીની લાલચ આપીને પેપર હાંસલ કર્યું હતું.
આ પેપરને જૂતામાં છુપાવીને પ્રિન્ટિંગ પ્રેસ બહાર લઇ જવામાં આવ્યું હતું. આરોપીઓએ માત્ર ₹8000માં પેપર મેળવીને ભિવંડી અને પૂણેમાં લગભગ ₹1.5 કરોડમાં વેચવાનું કાવતરું ઘડ્યું હતું. જોકે, ભિવંડી પોલીસે બનાવટી ગ્રાહક બનીને આ આખા કૌભાંડનો પર્દાફાશ કર્યો હતો. આ કેસમાં અત્યાર સુધીમાં કુલ 13 આરોપીઓની ધરપકડ કરવામાં આવી છે.
પંજાબથી વૉન્ટેડ આરોપી કપિલ દહિયા અને સાથીદારોની ધરપકડ
મહારાષ્ટ્ર TET પેપર લીકની તપાસ કરી રહેલી SITએ કાર્યવાહી તેજ કરતા વૉન્ટેડ આરોપી કપિલ દહિયા સહિત ત્રણ વધુ આરોપીઓની ધરપકડ કરી છે. કપિલ દહિયા વિરુદ્ધ લુકઆઉટ સર્ક્યુલર (LOC) જાહેર કરવામાં આવ્યું હતું અને તેને પંજાબના પઠાનકોટથી ઝડપી પાડવામાં આવ્યો છે.
કપિલ પર ભિવંડીના કોણગાંવ વિસ્તારમાં લીક થયેલા પેપરના ગ્રાહકો શોધવાનો આરોપ છે. આ ઉપરાંત, મુખ્ય આરોપી બિજેન્દ્રને ફરાર થવામાં મદદ કરવા બદલ બિહારના હાજીપુરથી સોનુ સિંહ અને પટનાથી મિથુન સિંહની પણ ધરપકડ કરવામાં આવી છે. સોનુ પોતાની ઝેરોક્સની દુકાનમાંથી બોગસ આઇડી કાર્ડ અને લીક પેપરની પ્રિન્ટ કાઢી આપતો હતો, જ્યારે મિથુન સિંહ બિજેન્દ્રનો સાળો છે અને ખરીદદારો શોધવામાં સામેલ હતો.
બનાવટી ગ્રાહક બની પોલીસે ગોઠવી જાળ, માસ્ટરમાઇન્ડનો ગુનાઇત ઇતિહાસ
આ સમગ્ર કૌભાંડનો પર્દાફાશ ભિવંડી ડીસીપી પવન બંસોડેના નેતૃત્વ હેઠળના ગુપ્ત ઓપરેશનથી થયો હતો. એક પોલીસ ઇન્સ્પેક્ટરે પોતે ખરીદદાર બનીને આરોપીઓનો સંપર્ક કર્યો હતો. જેવો આરોપીઓને ગ્રાહક મળ્યાનો અહેસાસ થયો, બિજેન્દ્ર ગુપ્તાએ રાજીવ કુમાર અને આકાશ કુમારને લીક પેપરના ચાર સેટ મોકલ્યા હતા. પોલીસે કોણગાંવની એક હોટેલમાં જાળ બીછાવીને આરોપીઓને રંગેહાથ ઝડપી લીધા હતા.
પૂછપરછમાં સામે આવ્યું છે કે માસ્ટરમાઇન્ડ બિજેન્દ્ર ગુપ્તા અગાઉ પણ અનેક રાજ્યોમાં પેપર લીક અને હત્યાના કેસમાં પકડાઈ ચૂક્યો છે. તે દર વખતે જામીન પર છૂટીને નવી ઓળખ સાથે બીજા રાજ્યમાં સક્રિય થઈ જતો હતો. હાલમાં આ કેસના તમામ આરોપીઓ પોલીસ કસ્ટડી હેઠળ છે.
