‘કોર્ટ મેં મારેંગે... જજ કો પસીના આયેગા’: આ ગીતના કારણે થઈ સિંગર અંકિતની હત્યા! પોલીસે કર્યો પર્દાફાશ

Ankit Balyan: ઉત્તર પ્રદેશના શામલીમાં હરિયાણાના સિંગર અંકિત બાલિયાનની ગોળી મારીને કરવામાં આવેલી હત્યા મામલે એક ચોંકાવનારો ખુલાસો થયો છે. અંકિતની હત્યા પાછળ સાડા ત્રણ વર્ષ પહેલાં રિલીઝ થયેલું તેનું એક ગીત જવાબદાર હતું. આ ગીતના બોલ હતા – 'કોર્ટ મેં મારેંગે મેરી જાન, જજ કો પસીના આયેગા'. આ ગીતથી કેટલાક અપરાધીઓ અસ્વસ્થ હતા. તેમને શંકા હતી કે અંકિત વિરોધી ગેંગ સાથે મળીને તેમને ડરાવવાના હેતુથી આવાં ગીતો બનાવી રહ્યો છે. ગીત રિલીઝ થયા બાદ અંકિતને દિલ્હીમાં ધમકી પણ આપવામાં આવી હતી. સોમવારે સવારે અંકિત હત્યાકાંડમાં સામેલ બે શૂટર્સના એન્કાઉન્ટરમાં માર્યા ગયા બાદ શામલીના એસપી એનપી સિંહે આ વિગતો જાહેર કરી હતી.

ગૌગી ગેંગના ગોલૂ શાહપુરિયાએ મોકલ્યા હતા શૂટર્સ

એસપીએ જણાવ્યું કે શૂટર્સને ગૌગી ગેંગના ગોલૂ શાહપુરિયાએ મોકલ્યા હતા. બંને શૂટર્સને સૂચના આપવામાં આવી હતી કે શામલીમાં અન્ય બે સ્થાનિક યુવકો મળશે, જેમના સાથે મળીને અંકિત બાલિયાનની હત્યા કરવાની છે. યોજના મુજબ, ચારેય શૂટર્સ બુધવારે અંકિત જિમમાંથી બહાર નીકળે તેની રાહ જોઈને ઊભા હતા. અંકિત બહાર આવતાં જ ચારેય બાજુથી ઘેરીને તેના પર અંધાધૂંધ ગોળીબાર કરી ફરાર થઈ ગયા હતા.

જેલમાં બંધ ગેંગસ્ટરો અને કેનેડા કનેક્શન

દિલ્હીની રોહિણી કૉર્ટમાં ગેંગસ્ટર ગૌગીની હત્યા અને ત્યારબાદ તિહાડ જેલમાં ટિલ્લૂ તાજપુરિયાની હત્યા બાદ ગૌગી ગેંગને શંકા હતી કે અંકિત વિરોધી જૂથ સાથે મળી ગયો છે. ગૌગીના મોત પછી હાલ તિહાડ અને કરનાલ જેલમાં બંધ બે ગુનેગારો આ ગેંગ ચલાવી રહ્યા છે, જેમની નીચે એક લાખ રૂપિયાનું ઇનામ ધરાવતો ગોલૂ શાહપુરિયા કામ કરે છે. ગોલૂના કાકાના દીકરા ચિરાગે, જે કેનેડામાં રહે છે, સોશિયલ મીડિયા પર પોસ્ટ મૂકીને આ હત્યાની જવાબદારી લીધી હતી.

CCTVમાં કેદ થઈ શૂટર્સની મૂવમેન્ટ અને ભાગવાનો રસ્તો

શૂટર્સ હરિયાણાના કરનાલથી શામલી આવ્યા હોવાની તમામ વિગતો 15 સ્થળોના CCTV કેમેરામાં કેદ થઈ ગઈ હતી. પરંતુ હત્યા કર્યા બાદ ફરાર થવા માટે તેમણે આવ્યા તે રસ્તો પસંદ કર્યો ન હતો. બચવા માટે તેમણે દિલ્હી રોડથી બડૌત-બાગપત થઈને હરિયાણા તરફ જવાનો સુરક્ષિત માર્ગ પસંદ કર્યો હતો. બાગપતના ગૌરીપુર પાસે પહોંચ્યા બાદ ચારેય શૂટર્સ બે-બેની ટુકડીમાં વહેંચાઈ ગયા હતા. એક બાઇક પરના બે શૂટર્સ સોનીપત તરફ અને બાકીના બે લોની તરફ મુખ્ય માર્ગોને બદલે અંદરના વૈકલ્પિક રસ્તાઓનો ઉપયોગ કરીને ભાગી છૂટ્યા હતા.